Krótkopowěsće (30.08.16)
38 milionow eurow za wokrjes
Budyšin. Wokrjes Budyšin dóstanje we wobłuku programa „Mosty do přichoda“ 38 milionow eurow. Wulki dźěl toho, cyłkownje 25 milionow eurow, je za města a gmejny. Zbytk dóstanje wokrjes, kotryž planuje mjez druhim twar noweje pěstowarnje na Budyskim Třělnišću. Za jednotliwe projekty maja komuny 10 procentow kóštow same přewzać.
Ličba turistow přiběra
Drježdźany/Choćebuz. Turizm na wuchodźe Němskeje zwjesela so nad dale a wjace wopytowarjemi. Tak je so ličba přenocowanjow w Błótach porno lońšemu wo 11,3 procenty stopnjowała. Tole wuchadźa z ličbow Zwjazkoweho statistiskeho zarjada. Mnozy turisća předewšěm z Berlina wužiwaja składnosć a so w Błótach wočerstwjeja.
Přewjeduja naprašowanje
Budyšin. Tele dny je Budyski wokrjes zahajił online-naprašowanje k temje: „Kak derje sće na wulku wodu přihotowani?“ Ze statistiku chce krajnoradny zarjad zwěsćić, hdźe su słabosće nastupajo swójske zawěsćenje. Tak chcedźa zjawnostne dźěło zaměrnje na rozswětlowanje, na lěpše komunikaciske puće a móžne strategije wusměrić.
Krótkopowěsće (29.08.16)
Přistup znowa rjadować
Drježdźany. Přistup k dalewjeducym šulam po 4. lětniku dyrbja w Sakskej po wšěm zdaću znowa rjadować. Tole wuchadźa z wobzamknjenja Drježdźanskeho zarjadniskeho sudnistwa. Sudnicy maja kubłanske poručenje za njedosahacy zakonski zakład. Skoržiłoj staj staršej holcy, kotraž njebě žadany přerězk 2,0 w předmjetach matematika, němčina a wěcna wučba docpěła.
Wo zmysle dawkow zhonili
Drježdźany. Sobudźěłaćerjo financneho zarjada su w běhu jednoho lěta na wjac hač 200 zarjadowanjach we wyšich šulach a gymnazijach šulerjow wo zmysle dawkow informowali. Tak dóstachu wuknjacy zrozumjenje za to, zo su dawki za žiwjenski zakład bytostne, hódnoćeše dźensa sakski financny minister Georg Unland (CDU) zaměr projekta.
Mjenje jězbow po Łobju
Bad Schandau. Trajneje suchoty dla móža łódźe jenož hišće we wobmjezowanej měrje po Łobju jězdźić. Tak sakske parne łódźnistwo zdźěla, zo su jězby mjez Drježdźanami a Bad Schandauwom redukowali. W Drježdźanach je pegel Łobja jenož hišće 70 centimetrow, normalnej stej dwaj metraj.
Krótkopowěsće (26.08.16)
Kral Nižozemskeje přijědźe
Drježdźany. Nižozemski kral Willem-Alexander přijědźe spočatk lěta 2017 do wuchodneje Němskeje. Tole zdźěli prezident Zwjazkoweje rady, sakski premier Stanisław Tilich (CDU), dźensa po zetkanju z monarchom w Den Haagu. Po dotalnym planowanju wopyta Willem-Alexander w februaru Saksku, Saksko-Anhaltsku a Durinsku.
Strach lěsnych wohenjow
Pirna. Horcota a suchota tomu polěkujetej, zo je strach lěsnych wohenjow jara wulki. Na sewjeru Sakskeje a podłu pólskeje mjezy su dźensa najwyši warnowanski schodźenk wukazali, kaž statny lěsniski zawod zdźěla. Tež w Budyskej kónčinje hroža wohenje. Kurić w lěsach je zakazane. Ludźo njesměli awta na suchej trawje wotstajić.
Kolesowarjo a alkohol
Praha. Senat, hornja komora čěskeho parlamenta, je změnu zakonja wo nadróžnym wobchadźe schwaliła. Tak měło kolesowarjam na pućach nišich kategorijow hač do 0,8 promilow alkohola dowolene być. Za wšě tamne jězdźidła płaći dale „nulowa toleranca“. Změnu, za kotruž so tež winicarjo zasadźeja, dyrbi delnja komora hišće schwalić.
Krótkopowěsće (25.08.16)
Tysac swobodnych městnow
Drježdźany. W Sakskej je k zahajenju noweho wukubłanskeho lěta přeco hišće tysac wukubłanskich městnow njewobsadźenych. Najwjace swobodnych městnow maja we wobłukach elektrotechnika, sanitarne, tepjenje, klimowa technika a pola frizerow, rjemjeslniska komora zdźěla. Tež na mulerja, pjekarja, metalotwarca a třěchikryjerja móža so zajimcy hišće wukubłać dać.
Wutwarja wjesny puć
Chrósćicy. Dróhu Michała Hórnika w Chrósćicach chce Budyski wokrjes wot 5. septembra hač do kónca oktobra wutwarić. W tym času budźe wotrězk wot Pomnikoweho puća hač k wotbóčce do Stareje Cyhelnicy dospołnje zawrjeny. Tam wotwoža plesternaki a pokryja jězdnju z asfaltowej worštu. Nimo toho ma so dešćikowa woda porjadnje wotwodźeć.
Wosebity knižny dar
Krótkopowěsće (24.08.16)
Michałkowa hižo njekandiduje
Budyšin. Zapósłanča zwjazkoweho sejma Marja Michałkowa (CDU) njebudźe swójbnych přičin dla za klětuše wólby zwjazkoweho sejma hižo kandidować, kaž wčera zdźěli. Wot lěta 2002 wona za Budyski wólbny wokrjes w zwjazkowym sejmje skutkuje. Jako Serbowka so předewšěm za naležnosće narodnych mjeńšin zasadźa.
Krajiny Brankačkoweje wustajene
Drježdźany. Pod hesłom „pjećkróć KRAJINA“ su tuchwilu w Drježdźanskej galeriji „Himmel“ mólby pjeć wuměłcow widźeć. Nimo Iris Brankačkoweje, kotraž wustaja sydom twórbow, su to Ulrich Eisenfeld, Konrad Henker, Anne Kern a Uwe Peschel. Hač do 1. oktobra je přehladka přistupna.
Serbski podźěl na zapokazanju
Drježdźany. Na sobotnym zapokazanju noweho biskopa Drježdźansko-Mišnjanskeje diecezy Heinricha Timmereversa budźe tež serbski podźěl. Tak wobdźěla so družki na Božej mši, tež jedna próstwa budźe serbska. Chór 1. serbskeje kulturneje brigady swjatočnosć wobrubi. Dale wočakuja 32 biskopow z tu- a wukraja a tysacy wěriwych. Sćelak MDR zapokazanje live wusyła.
Olympisku chorhoj přijeli
Krótkopowěsće (23.08.16)
Tilich do Nižozemskeje
Drježdźany. Němsko-nižozemske temy a europska politika steja w srjedźišću jězby prezidenta Zwjazkoweje rady Stanisława Tilicha (CDU) do Nižozemskeje. Na wopyće zajutřišim a pjatk chce so sakski ministerski prezident z wodźacymi politikarjemi zetkać, wón dźensa w Drježdźanach připowědźi. Tež w europskim policajskim zarjedźe jeho wočakuja.
Praktikum wědomostnikam
Drježdźany. Z pilotowym projektom chcedźa wotnožki Fraunhoferskeho instituta w Sakskej z domizny ćeknjenym wědomostnikam šansu skićić. Program „Integracija“ wopřijima třiměsačny praktikum, wukubłanje abo časowje wobmjezowane přistajenje za připóznatych požadarjow azyla, dźensa zdźělichu. Dotal su 16 požadarjam azyla praktikum abo dźěło zmóžnili, zwjetša Syričanam.
Rybarjo wuradźuja
Krótkopowěsće (22.08.16)
Karin Bernd znowa wuzwolena
Wodowe Hendrichecy. Karin Bernd wostanje měšćanostka Wodowych Hendrichec. Při wčerawšich wólbach docpě kandidatka Njewotwisneje wobydlerskeje iniciatiwy hnydom w prěnim přeběhu 54 procentow hłosow. Žadyn z třoch tamnych kandidatow njedocpě wjace hač 20 procentow. K wólbam je 67 procentow wólbokmanych šło.
Tež twórby Nageloweje widźeć
Drježdźanach. Pod hesłom „Moderne časy“ wotewrěchu minjeny pjatk w Drježdźanskim „Wuměłstwowym rumje“ wustajeńcu, na kotrejž so tež Maja Nagelowa wobdźěla. Widźeć su mólby, rysowanki, grafiki, fotografije a plastiki 27 čłonow Noweho sakskeho wuměłstwoweho towarstwa. Hač do 15. oktobra je přehladka přistupna.
Dulig za spěšne rozrisanje
Drježdźany. Sakski hospodarski minister Martin Dulig (SPD) žada sej spěšne rozrisanje zwady mjez awtotwarcom VW a dodawanskimaj zawodomaj. W tym zwisku poskići wón dźensa swoju pomoc jako posrědkowar. Zwady dla su produkciju awtow w Zwickauwje hač do pjatka přetorhnyli. 6 000 sobudźěłaćerjow je potrjechenych. (Hlej tež 2. strona.)
Jednota koło dale
Krótkopowěsće (19.08.16)
Předewzaćeljo zjednoćeni
Drježdźany. Wuchodna Sakska ma wot najnowšeho dźěłowe zjednoćenstwo SPD za samostatnych předewzaćelow. Zwjazk su srjedu w Drježdźanach załožili, kaž zamołwići zdźěleja. Za předsydu wuzwolichu předewzaćela Rona Eckhardta z Bannewitza pola Drježdźan. Zwjazk ma so za mostytwarca mjez hospodarstwom a towaršnosću.
Za myto namjetowanaj
Budyšin. Mjez wosobami, kotrež su za Němske myto angažementa 2016 nominowane, staj tež Tim Döke z Budyšina a Wolfgang Goldstein ze Slepoho. Tole rozprawja rozhłosowy sćelak MDR. Döku běchu hižo loni za dźěło na dobro ćěkancow počesćili. A Goldstein je lawreat wobydlerskeho myta, dokelž so na šuli za demokratiju a tolerancu zasadźa.
Žadnej znamce do Čěskeje
Praha. Dwójku listowych znamkow „módru a čerwjenu mauritius“, najžadnišej a najdrohotnišej filatelistiskej drohoćince swěta, je anonymny čěski inwestor kupił. Płaćiznu za wobě znamce, wudatej lěta 1847 na kupje Mauritius, trochuja na štyri miliony eurow. Kupc chce je na swětowej filatelistiskej wustajeńcy 2018 w Praze zjawnosći spřistupnić.
Krótkopowěsće (18.08.16)
Dalši stawk pola Amazon
Lipsk. Přistajeni internetneho wikowarja Amazon w Lipsku su dźensa znowa warnowanski stawk přewjedli. Na akciji je so w běhu dnja hač do 450 sobudźěłaćerjow wobdźěliło, kaž dźěłarnistwo ver.di zdźěli. Lipšćanska wotnožka wobsteji mjeztym dźesać lět. Hač do dźensnišeho pak nimaja přistajeni tarifowe zrěčenje, dźěłarnistwo kritizuje.
Braniborska předposlednja
Podstupim. Kubłanski system Braniborskeje zaběra po wšej Němskej předposlednje městno, před Berlinom. To je wuslědk přepytowanja „Kubłanski monitor 2016“, kotryž je Kölnski Institut němskeho hospodarstwa přewjedł. Fachowcy mjez druhim šwikaja, zo so socialny pochad dźěći wosebje sylnje na jich šulske wukony wuskutkuje.
Prócuja so wo Dźeń Saksow
Krótkopowěsće (17.08.16)
Swjedźeń dlěši a dróši
Drježdźany. Centralny swjedźeń k Dnjej jednoty Němskeje w Drježdźanach budźe dróši, wšako dyrbja swjedźeń wo cyły dźeń podlěšić. Dokelž je 3. oktober lětsa póndźela, zahaja swjatočnosće hižo sobotu, 1. oktobra. Město 2,8 milionow zaplanuja za to nětko 4,3 miliony eurow, rěčnik knježerstwa zdźěli. Swjedźeń financuje Swobodny stat Sakska.
Wjerća film we Łužicy
Žitawa. Po tym zo je so Zhorjelc mjez filmowymi režiserami na požadane nahrawanske město wuwiło, ćehnje režiserow nětko tež do Žitawy. Kaž Babelsbergske filmowe studijo zdźěla, chce znaty Hollywoodski režiser Terrence Malick wjacore sceny produkcije „Radegund“ w Žitawje wjerćeć. Za to budu jutře dźěle Hłowneho torhošća a Janskeho naměsta zawrjene.
Wohnjostroje wobmjezować
