Dyrbja so napinać
Němska wubranka so na Jendźelčanow wjeseli
London (kh/SN). Skupinska faza europskich mišterstwow w kopańcy je po cyłkownje štyrnaće hrajnych dnjach zakónčena. Jutře nětko du mišterstwa do horceje fazy, w kotrejž njesmědźa sej mustwa žadyn zmylk wjac dowolić, tež němske nic.
Po wulkim dyrkotanju přećiwo Madźarskej wjeseli so němska wubranka nětko na hrajersce sylnych Jendźelčanow we wosmifinalu. Zwjazkowy trenar Joachim Löw rjekny, zo budźe hra přećiwo Jendźelskej cyle hinaša. K zazběhej nastupichu Němcy najprjedy přećiwo hłuboko stejacym Francozam a naposledk zasakłym Madźaram – tak sylnu sej swoju skupinu poprawom předstajili njeběchu. Jeničce Španičenjo mějachu z přerěznje 68,7 procentami wjace hrajnych podźělow hač chowancy Joachima Löwa. Tak je tež kapitan Manuel Neuer optimistiski, zo budźe wosmifinalna partija we Wembleyju wo wjele wotewrjeniša. Hdyž Madźarojo hišće z dźesać hrajerjemi w šěsnatce stejachu a wšitko začinichu, budu Jendźelčenjo dyrbjeć doma doprědka hrać a bul běžeć dać, štož Němcam zawěsće do „kartow hraje“.
Sport (25.06.21)
Jěchanski a skakanski turněr
W Kulowje wuhotuje tamniše jěchanske skakanske towarstwo wot dźensnišeho do njedźele swój jubilejny 50. jěchanski a skakanski turněr. Dźensniši časowy plan bě hižo wčera w Serbskich Nowinach wozjewjeny, dźensa podawamy wam tej za jutře a njedźelu. Přihladowarjo su w Kulowje dowoleni.
sobotu, 26. junija
07:30 skakanje klasy E
09:00 skakanje klasy A*
11:30 wubědźowanje dorosta
12:15 dypkowe skakanje klasy A**
15:15 skakanje klasy L
17:00 skakanje klasy L
njedźelu, 27. junija
07:30 skakanje klasy A**
10:15 stilowe skakanje klasy A**
12:15 pruwowanje klasy A**
13:30 pruwowanje klasy L
14:45 dypkowe skakanje klasy L
16:15 skakanje klasy M*
Młodźina B w štwórćfinalu
Młodźina B Koparskeho towarstwa Budissy Budyšin hraje jutře w 10.30 hodź. doma w Budyšinje w štwórćfinalu wo krajny pokal přećiwo młodźinje B FC Hornjeje Łužicy Neugersdorf. Derby budźe na sportowym arealu Humboldtowy haj. Přihladowarjo su dowoleni.
Dalše partije:
26.06. 10.30 VfB Annaberg 09 –
Nowy jězorinowy kraj
27.06. 10:30 Fortuna Kamjenica –
1. FC Lokomotiwa Lipsk
30.06. 18:00 SC Borea Drježdźany –
VfL Pirna-Copitz
Jednaćelnja Liškow ma dowol
Němska wubranka po napjatej hrě we wosmifinalu
Mnichow (kh/SN). To bě seklowa čara ze zbožownym wukóncom. Němska narodna koparska wubranka steji we wosmifinalu europskich mišterstwow (EM). Při tym bě turněr za nju nimale ke kóncej. Wjedro wčera wječor w Mnichowje bě jara špatne, a hižo w 11. min. so jemu nalada šeftrenarja Joachima Löwa přiměri. Wina na tym běše madźarska kombinacija ze zwjazkoweje ligi. Po sylnej flance Rolanda Sallaija z Freiburga přesadźi so Ádám Szalai z Mainza mjez Matthiasom Ginterom a Matsom Hummelsom a zhłójčkowa bul do wrotow Manuela Neuera. Němcy drje hru na to dale dominowachu, trěbna inspiracija za přewinjenje madźarskeho škita kaž tež zbožo pak jim pobrachowaštej. Madźarojo sćahnychu so po 1:0 daloko wróćo a sadźachu na podobnu taktiku kaž přećiwo Francoskej. Ćim ćešo za Němcow bě, zadnje mustwo přećiwnika přewinyć.
Breitkreuz so nawróćił
Kapitan hrajneje doby 2019/2020 zaso w liščej lodohokejowej jamje
Wón je zaso wróćo w Běłej Wodźe – kapitan sezony 2019/2020 Clarke Breitkreuz. Po jara wuspěšnym lěće w Kasselu, hdźež by so jemu z Huskijemi nimale dobyće mišterstwa poradźiło a z nim postup do DEL, póńdźe wón nětko zaso w trikoće Łužiskich lodohokejowych liškow na sławnu hońtwu za pukom.
W kanadiskim Springsidźe rodźeny běše hižo wot lěta 2018 do 2020 za Łužiske lodohokejowe liški aktiwny a absolwowaše za nje dokładnje sto hrow. W tym času poradźi so jemu 37 wrotow a 47 přihrawkow, kotrež wjedźechu k wrotowym wuspěcham.
W swojej prěnjej sezonje w Běłej Wodźe docpě Breitkreuz z Liškami štwórćfinale. W slědowacym lěće nawjedowaše wón mustwo jako kapitan, wone pak playoff-hry snadnje misny. Kaž hižo w swojej poslednjej sezonje w Běłej Wodźe dyrbi 29lětny nadběhowar tež nětko zaso młodych hrajerjow ze swojimi nazhonjenjemi ze sydom lět w DEL 2 inspirować a so ze swojim robustnym hrajnym wašnjom wo wjace stracha před wrotami přećiwnika starać.
Přihladowarjo zaso dowoleni
Jubilejny 50. jěchanski a skakanski turněr w Kulowje wot jutřišeho do njedźele smědźa nětko z přihladowarjemi přewjesć. Na dresurowych a skakanskich wubědźowanjach pak maja wšitcy dnjowoaktualne škitne naprawy dodźeržeć.
Časowy plan za pjatk, 25. junija
9:00 pruwowanje jěchanskich koni
10:00 pruwowanje w dresurje klasy A
myto Kulowskeje firmy Widźeć a słyšeć Homola
11:45 pruwowanje w dresurje klasy E
myto firmy Schkade tzwr
13:30 wubědźowanje jěcharjow
myto firmy Pretty a Plamenco Björn Köpping
14:00 pruwowanje w dresurje klasy A*
myto firmy Hippgen tzwr
16:00 pruwowanje w dresurje klasy L*
myto firmy BMS Schlage z Wóslinka
Časowej planaj za sobotu a njedźelu wozjewimy w jutřišim wudaću Serbskich Nowin. Wobaj dnjej přewjedu potom skakanske wubědźowanja. Turněrowy nawoda je Milan Šefer, sudnicy budu Katrin Kuhn, Claus Förster, Ralf Breselow a Katharina Tögel. Jurij Bjeńš
„Lišku lěta“ wolili
Wuslědk wólby ,,liška lěta“ lodohokejoweje doby 2020/2021 je tajke něšto kaž mała překwapjenka. Na spočatku wothłosowanja pokazowaše wšitko na jasne dobyće Mac Carrutha, na kóncu pak přesadźi so youngster Bennet Roßmy. Tež hdyž naprašowanje tónraz pod hinašimi wuměnjenjemi wotběža, je wjele přiwisnikow za hrajerjow wothłosowało. Za to so towarstwo wšitkim dźakuje.
Koronapandemije dla njehodźeše so w minjenej sezonje „liška měsaca“ wolić a do kónčneho wothłosowanja zapodać. Tak namjetowachu zamołwići Łužiskich lodohokejowych liškow šesćoch, kotřiž běchu w minjenej sezonje na so skedźbnili. Wotedatych bu dohromady 5 491 hłosow. Po wuličenju přesadźi so 17lětny Bennet Roßmy z 2 152 hłosami před wrotarjom Mac Carruthom (1 725 hłosow) a kolegu-nadběhowarjom Stéphaneom Döringom (1 429 hłosow). Zbywace 185 hłosow dóstachu Thomas Reichel, Nick Ross a Rylan Schwartz.
Třištwórć hodźiny porjadna zabawa
London (kh/SN). Jendźelska koparska wubranka je poslednju hru skupinskeje fazy europskich mišterstwow (EM) po sylnym prěnim połčasu přećiwo čěskemu narodnemu mustwu zasłužbnje z 1:0 dobyła. Tak zaćahnu Three Lions jako prěnje w skupinje D do wosmifinala. Tam nastupja potom přećiwo druhemu ze skupiny F, w kotrejž tež Němcy hraja. Wobě mustwje, jendźelske a čěske, běštej hižo do wčerawšeho zakopa za koło poslednich šěsnaćoch kwalifikowanej. Dźěše jenož hišće wo prěnje městno w skupinje. Čěska trjebaše za to jeničce dypk, Jendźelska dyrbješe dobyć.
Danska po wrotowym festiwalu we wosmifinalu
Kopenhagen (kh/SN). Danska je so tola hišće za koło najlěpšich šěsnaćoch na europskich mišterstwach (EM) kwalifikowała, a to po dramje w prěnjej koparskej hrě wokoło Christiana Eriksena a po poražkomaj 0:1 přećiwo Finskej a 1:2 přećiwo Belgiskej. Přećiwo Ruskej su Danojo z njewšědnej energiju wčera wojowali a 4:1 dobyli. Rjekojo dnja běchu Kasper Damsgaard (38.), Yussuf Poulsen (59.), Andeas Christensen (80.) a Joakim Maehle (82.). Za Rusku móžeše jeničce Artjom Dźjuba (70.) z dwělomnym pokutnym kopom na 1:2 skrótšić.
W paralelnej hrě mjez Finskej a Belgiskej wupadaše dołho za tym, zo poradźi so Finskej snano hišće sensacija, tola krótko do kónčneje fazy hry trjechi dotal najlěpši Fin samowrota. Po róžku z lěweje strony zhłójčkowa Belgiski škitar Thomas Vermaelen bul na aluminij. Wottam skoči hrajny nastroj wrotarjej Lukášej Hrádeckemu njezbožownje na ruku a do wrotow (74.). Krótko po tym Romelu Lukaku na 2:0 (81.) zwyši, a hra bě rozsudźena.
Hrajne zjednoćenstwo Pančicy-Worklecy rozpušćene
Hrajne zjednoćenstwa nastawaja, hdyž jednotliwe mustwa dosć personala nimaja. Tež pola Pančičanskich a Worklečanskich wolejbulistkow to před třomi/štyrjomi lětami tak bě, a tak wustupowachu wone tři sezony jako hrajne zjednoćenstwo. Nětko pak je wone rozpušćene. Wo tym sportowa redakcija Serbskich Nowin hižo rozprawješe. Jurij Bjeńš je hišće někotre dalše informacije zezběrał.
Štož běchu 2018 załožili, so lětsa zaso skónči. Žónske wolejbulowe zjednoćenstwo ST Marijineje hwězdy a Viktorije Worklecy nastupi w nowej hrajnej dobje jenož hišće jako Viktoria Worklecy a Viktoria Worklecy II. Wobě mustwje budźetej w samsnej stafli hrać. Z kelko cyłkami budźe wona scyła nastajena, dotal hišće jasne njeje. Žro hrajerkow něhdyšeho hrajneho zjednoćenstwa pak wostanje, kaž nam Tereza Wićazowa přeradźi: „Nimale wšitke hrajerki su pola nas wostali a nimo toho přińdu hišće někotre wolejbulistki ze swójskeho dorosta. To změjemy rjanu měšeńcu.“
