Policija (27.07.15)

póndźela, 27. julija 2015 spisane wot:

Pančicy-Kukow. W Pančicach-Kukowje je so dźensa dopołdnja na kromje wsy do směra na Budyšin nakładne awto powróćiło. 40 tonow ćežki truck wosta na kolesowanskej šćežce ležo. Dokelž bě z njeho diesel wuběžał, dyrbjachu Pančičanscy wohnjowi wobornicy dróhu rjedźić.

Biskopicy. W Biskopicach je so wčera připołdnju mjez awtowymaj domomaj Pischke­ a Hantusch kontejner palił. Wohnjowi wobornicy z města a Šumborna (Schönbrunn) woheń zhašachu. Policija pad nětko přepytuje.

Zhorjelc. Po pokiwje wobydlerja z Wostrowca je pólska kriminalna policija ze zhromadnej slědźenskej skupinu Nysa dźensa dopołdnja skład potajerjow (Hehlerlager) w Bogatyni wuzběhnyła. Při tym nadeńdźe kradnjene wěcy z njeskutkow we Wostrowcu, Zhorjelcu a Žitawje w hódnoće 4 500 eurow. Zastojnicy njeskutka podhladneju Polakow w starobje 29 a 37 lět nachwilnje zajachu.

Policija (24.07.15)

pjatk, 24. julija 2015 spisane wot:

Wóslink. W Pisanym Dole (Scheckthal) pola Wóslinka je srjedu popołdnju 17lětny mopedist njezbožo zawinił. Mło­dost­ny, kiž bě ze swojim S 50 po puću, zrazy w křiwicy dolěwa do napřećo přijěduceho Audija. Wón padny a so zrani. Wěcna škoda wučinja­ něhdźe 3 200 eurow.

Rakecy. W nocy na srjedu su so njeznaći w Rakecach přez wočinjene wokno do sportoweho domu zadobyli. Z kasety pokradnychu znajmjeńša tysac eurow.

Policija (23.07.15)

štwórtk, 23. julija 2015 spisane wot:

Budyšin. Wutoru popołdnju su wuchodźowarjo w Budyšinje njedaloko skały při Nadźanečanskej dróze mortweho muža namakali. Jedna so wo 57lětneho Budyšana, kotrehož bě policija wot za­šłeho tydźenja pytała.

Budyšin. Zastojnicy Zhorjelskeje policajskeje direkcije su zawčerawšim mjez Mužakowom­ a Žitawu šěsć paduchow lepili­ a jich nachwilnje zajeli. We Woje­recach a Bretnigu-Hauswaldźe běchu to skućićeljo, kotrychž hižo z wukazom zajeća­ pytaja. Woni běchu w Biele­feldźe a druhdźe awta kradnyli.

Policija (22.07.15)

srjeda, 22. julija 2015 spisane wot:

Porchow. Znowa su so njeznaći wčera wječor na dojězdźowanskim parkowanišću pola Porchowa do tam wotstajeneho awta zadobyli. Po tym zo běchu zadnje wokno VWja rozbili, mějachu přistup ke kófrowemu­ rumej. Z njeho pokradnychu wjacore twarske graty w hódnoće ně­hdźe 1 500 eurow.

Kinspork. K ćežkemu njezbožu dóšło je dźensa w nocy na B 98 we Hłušnicy (Glauschnitz) pola Kinsporka. Wosrjedź wsy stej awće frontalnje do so zrazyłoj. Tacho wobdźěleneho Fiata wosta pola 150 km/h stejo, Volvo nańdźechu poli­cisća při sćežoru. Jednoho ze šoferow dyrbjachu ćežko zranjeneho do chorownje dowjezć. Jasne dotal scyła njeje, kak bě k ćežkej zražce dóńć móhło.

Policija (21.07.15)

wutora, 21. julija 2015 spisane wot:

Słona Boršć. W Słonej Boršći je wčera popołdnju 72lětna wodźerka Opela z Wjesneje na Handrija Zejlerjowu zajěła, zo by křižowanišćo přeprěčiła. Při tym zrazy do VWja, kotryž měješe předjězbu. Wotmacha zražki dla so Opel přećisny. 72lětna a sobujěduca so při njezbožu ćežko zraništej, 34lětna šoferka Golfa poćerpje lochke zranjenja.

Budyšin. Policija pyta paduchow, kotřiž su ludźom w Budyšinje ec-kartki z móšnjow kradnyli a z nimi při awtomatach dohromady 3 800 eurow wot­zběhnyli, a to wot decembra 2014 hač do lětušeho měrca. Njeskutki stachu so předewšěm w kupnicach a na parkowanišćach.

Policija (20.07.15)

póndźela, 20. julija 2015 spisane wot:

Tři awta do so zrazyli

Zejicy. W Pančicach-Kukowje wuješe dźensa rano wokoło šesćich sirena, dokelž běchu w Zejicach tři awta do so zrazyli. Pančičanska wohnjowa wobora bě hnydom na městnje, rjadowaše wobchad a staraše so wo wuběžace ćěriwo. Dokelž njebě z Chrósćic jěducy wodźer Opela na křižowanišću­ předjězbu z Pančic-Kukowa přijěduceho VWja wobkedźbował, awće do so a do dalšeho jězdźidła, Renaulta, zrazyštej. Při tym so jedna wo­soba ćežko zrani. Ju dyrbjachu do chorownje dowjezć.

Biskopicy. Na statnej dróze S 111 mjez Biskopicami a Budyšinom je wčera dopołdnja wodźer Renaulta z dotal njeznateje přičiny w Čerwjenych Noslicach kontrolu­ nad swojim jězdźidłom zhubił, zjědźe nalěwo z dróhi, po tym do kerkow a so přećisny. Wón a sobujěducy so při njezbožu zraništaj a wobeju dowjezechu do chorownje. Wohnjowe wobory z Čerwjenych Noslic, Zemic-Tumic a Mje­dźojca (Medewitz) městnosć njezboža wurjedźichu. Policija nětko za tym slědźi, čehodla je starši muž při ampli do wopačneho směra jěł. Za čas rumowanja wosta dróha dospołnje­ zawrjena.

Policija (17.07.15)

pjatk, 17. julija 2015 spisane wot:

Połčnica. Někotružkuli kurioznu situa­ciju žno policisća dožiwjeja. Zo pak nakładne awto na prawym boku awtodróhi parkuje, zo by šofer swoje předpisane přestawki dodźeržał, to bě raz něšto nowe. Dožiwili su to zawčerawšim na A 4 pola Połčnicy. 36lětnemu šoferej kazachu na přichodne parkowanišćo jěć. Nimo toho ma wón 70 eurow pokuty płaćić a dóstanje dypk w Flensburgu.

Kubšicy. Njeměrnu nóc mějachu wčera wobydlerjo Sewjerneho puća w Kubšicach. Blisko bydlenskeho domu bě so z dotal njeznateje přičiny hromada składowaneho drjewa zapaliła. Zasadźene wohnjowe wobory z Bukec, Pomorc, Błócan, Wujezda (Breitendorf) a Mješic z dohromady 41 kameradami płomjenja na zbožo spěšnje zhašachu, tak zo njemó­žeše so woheń na susodne twarjenja wu­přestrěć. Policija nětko přepytuje, hač bě drjewo snano něchtó zapalił.

Policija (16.07.15)

štwórtk, 16. julija 2015 spisane wot:

Halštrow. Ćežke wobchadne njezbožo stało je so dźensa rano na wokrjesnej dróze K 9239 mjez Halštrowom a Rušicu. Z dotal njeznateje přičiny zajědźe wodźer wosoboweho awta typa BMW něhdźe w 7.15 hodź. na prawy bok jězdnje a zrazy frontalnje do štoma. Njezbožo sta so z tajkim wotmachom, zo so dźěl skory štoma wotběli. Po wuprajenju swědka jědźeše BMW cyle wobstajnje přeco bóle naprawo, doniž do štoma njeprasny. Za čas njezboža njebě na wonym městnje žanych wobchadnych poćeženjow abo napřećiwneho wobchada. Ćežko zranjeneho šofera dowjezechu do chorownje.

Policija (15.07.15)

srjeda, 15. julija 2015 spisane wot:

Mužakow. Z njewšědnym padom kón­cowanja wěcow zaběra so policija w Mužakowje. W tamnišim Parku wjercha ­Pücklera su njeznaći žadny štom skóncowali. Jedna so wo něhdźe 20 lět staru ­bahnowu cypresu, kotrejž su wandalojo wulki dźěl skory wottorhali a na městnje ležo wostajili. Tež zdónk poćerpje při tym škody, kotrež so snano hižo wot­stronić njehodźa. Kriminalna policija pad nětko wobdźěłuje. Nastatu škodu trochuje zarjadnistwo parka na něhdźe 15 000 eurow­.

Běła Woda. Hnydom z dweju firmow na Lutherowej­ a na Brězowskej běchu njeznaći w Běłej Wodźe minjene dny trezor­ pokradnyli. W nimaj běchu pjenjezy, dobropisy, wšelake awtowe kluče a listowe znamki. Z hrubej namocu skući­ćeljo trezoraj ze zemje wutorhnychu a sobu wzachu. Jeničce hódnotu rubizny trochuje policija na dohromady wjace hač 20 000 eurow. Zawčerawšim popoł­dnju hajnik policiji zdźěli, zo je w lěsu njedaloko Slepoho wočinjeny prózdny trezor namakał. Tón pochadźa ze zadobywanja do firmy na Lutherowej. Policija namakane slědy wuhó­dnoća a pyta za swědkami.

Policija (14.07.15)

wutora, 14. julija 2015 spisane wot:

Wulki Wjelkow. Kiosk prazwěrjenca we Wulkim Wjelkowje bě minjeny kónc tydźenja cil paduchow. W twarjenju woni wšitke rumnosće přepytachu a pokradnychu třicyfrowu sumu pjenjez. Nimo toho chcychu so do dalšeje hěty zadobyć, štož pak so njeporadźi. Wěcna škoda wučinja dohromady 600 eurow.

nawěšk

  • Sernjany su swoju róčnicu prěnjeho naspomnjenja wsy před 600 lětami z wosebitym wjesnym swjedźenjom wuspěšnje woswjećili. Tule nańdźeće někotre fotowe impresije wo tym:
Zerna feierte unlängst die Ersterwähnung des Ortes vor 600 Jahren mit einem beson

nowostki LND