Policija (07.02.19)
Křesło na awtodróze
Budyšin. Z njewšědnym zadźěwkom dyrbjachu so šoferojo zawčerawšim popołdnju na awtodróze A 4 mjez woběmaj Budyskimaj wotbóčkomaj bědźić. Do směra na Drježdźany ležeše mjenujcy křesło na lěwej jězdni. Wodźer Mercedesa bě je runje hakle kupił, ale na připowěšaku prawje njepřipasał, tak zo so wone dele suny. Dwě jězdźidle móžeštej jeno z nahłym spinanjom zadźěwać, zo do mebla njeprasnyštej. Kuražěrowani wodźerjo nakładnych awtow sćahnychu křesło na nakromne pasmo. 30lětny zawinowar podawka so k městnu wróći, swój zmylk mjeztym přichwatanej policiji přizna a křesło sobu wza. Kak wone potom wupadaše, bohužel znate njeje.
Policija (06.02.19)
Muža mortweho namakali
Běła Woda. 27lětny Běłowodźan je policiji wčera wječor zdźělił, zo w bydlenju na dróze Wam k zbožu mortwy muž leži. Policija tam 69lětneho namaka, pola kotrehož móžeše nuzowy lěkar jenož hišće smjerć zwěsćić. Hladajo na zranjenja njehodźi so namócny njeskutk wuzamknyć. Dokelž 27lětny rjekny, zo ma něšto z tym činić, jeho nachwilnje zajachu.
Policija (05.02.19)
Milinowy kašćik wuprózdnili
Lěska. Kable a relaisy we wulkim stilu wutwarili su njeznaći tele dny z milinoweho kašćika při železniskim přechodźe w Lěsce pola Wóslinka. Zmylka we wuhibkarni dla je sobudźěłaćerjam wobškodźenje w šaltowanskej připrawje napadnyło, čehoždla sej woni naležnosć bliže wobhladachu. Při tym zwěsćichu, zo běchu paduši dohromady 26 relaisow pokradnyli. Jich hódnotu trochuja na nimale 8 000 eurow.
Policija (04.02.19)
60 njezbožow sněha dla
Budyšin. Nic jeno sobudźěłaćerjo zymskeje słužby a mějićeljo ležownosćow mějachu wčera ze sněhom ruce połne dźěła. W Budyskim a Zhorjelskim wokrjesu dyrbješe so policija wo tójšto wobchadnych njezbožow starać. Hač do wčerawšeho pózdnjeho popołdnja přizjewichu Zhorjelskej policajskej direkciji 60 zražkow zymskich poměrow na pućach dla. Zwjetša wosta při blachowej škodźe. W někotrych padach pak so wodźerjo abo sobujěducy snadnje zranichu. Wot wobchadnych njezbožow potrjechene jězdźidła sunychu so do přirowow, wobhrodźenjow, wobchadnych znamjenjow, sćežorow a amplow, ale tež do tamnych wozydłow.
Policija (01.02.19)
Serwis smjerć drohi był
Ottendorf-Okrilla. Mnozy drje su hižo situaciju dožiwili, zo stejachu před swojimi chěžnymi durjemi, ale njemějachu kluč při sebi. Tele małe njezbožo bě za žonu w Ottendorfje-Okrilli nětko chětro drohe. Přez hotline zazwoni wona klučowy serwis, kiž jej wězo hnydom pomocliweho sobudźěłaćerja pósła. Po zdokonjanym dźěle pak wupisa wón zličbowanku we wysokosći 919,15 eurow. Žona čuješe so w tym wokomiku najprjedy raz winowata, zličbowanku na městnje zapłaćić. Pozdźišo so wona tola hišće z tutej naležnosću na policiju wobroći. Kriminalisća přepytuja tónle pad nětko lichowarstwa (Wucher) dla.
Policija (31.01.19)
Dowolnosć a konop sćazali
Rakecy. Z njepowučomnym wobydlerjom dyrbjachu so policisća zawčerawšim w Rakecach zaběrać. Po přikazu sudnistwa měješe wón jězbnu dowolnosć wotedać, štož pak dotal činił njebě. Jako zastojnicy do jeho bydlenja zastupichu, wuhladachu tam konopjowe rostliny a marihuana. Tuž njesćazachu jeno jězbnu dowolnosć, ale tež njejapku namakanku. To pak 33lětneho scyła njemyleše, přetož bórze na to wón zaso za wodźidłom swojeho awta sedźeše. Policisća wšak jeho při tym lepichu.
Policija (30.01.19)
Spěšnosć měrili
Njebjelčicy. Na statnej dróze S 94 je policija póndźelu při wotbóčce do Njebjelčic spěšnosć měriła. W běhu třoch hodźin kontrolowachu 1 730 wozydłow. W 51 padach wosta při warnowanju. Wosom šoferow změje pokutu płaćić. Rekord docpě awto z Budyskim čisłom, kotrež při dowolenych 70 km/h ze 118 km/h nimo smaleše. Šofer změje nětko 160 eurow pokuty płaćić, dóstanje dypkaj w Flensburgu a dyrbi měsac nóžkować.
Policija (29.01.19)
Kwětki kradnył
Kulow. Štóž je minjenu sobotu w Kulowje abo wokolinje kwětki darjene dóstał, by so radšo prašeć měł, zwotkel wone su. Dopołdnja mjenujcy měješe kwětkowy wobchod na Kulowskim Kolpingowym naměsće njeprošeny wopyt. Tam je njeznaty kwěćel w hódnoće 13 eurow pokradnył. Předawarka runje žonu poradźowaše, jako muž do wobchoda zastupi, so skrótka rozhladowaše a so wotsali. Hakle na to zwěsćichu, zo kwěćel pobrachuje. Po wuprajenju předawarki bě muž něhdźe 180 centimetrow wulki, sylneje postawy a měješe blond, trochu kudźerjate włosy. Woblečeny bě žołto-zeleny kabat. Podobne wopisanje zdźělichu policiji z dalšeju kwětkoweju wobchodow na torhošću. Tam pak so mužej přiležnosć k padustwu skićiła njebě.
Policija (28.01.19)
Jandźel pěston kedźbował
Ćisow. Z dotal njeznateje přičiny je zawčerawšim popołdnju 43lětna wodźerka wosoboweho awta na zwjazkowej dróze B 97 mjez Wojerecami a Njedźichowom při wotbóčce do Ćisowa na lěwy bok puća zajěła. Tam zrazy do dweju štomow, při čimž so ćežko zrani. 21 měsacow stare dźěćo měješe porno tomu kedźbliweho jandźela pěstona a wosta njezranjene. Wosobowe awto pak bě dospołnje skóncowane.
Policija (25.01.19)
Paduši w meblowym wobchodźe
Rakecy. Jako sobudźěłaćerka Rakečanskeho mebloweho wobchoda zawčerawšim rano na dźěło přińdźe, dyrbješe zwěsćić, zo su tam paduši pobyli. Kaž policija zdźěli, běchu so njeznaći z woknom do twarjenja na Jitkowskim puću zadobyli. Přepytachu tam wšitke rumnosće, su namócnje kasu wočinili a z njeje pjenjezy wzali. Cyłkownu škodu trochuja na něhdźe 500 eurow.
