Policija (04.01.21)
Motorske pokradnyć chcył
Zdźěr. Dokelž słyšachu w nocy na njedźelu při swojich chěžnych durjach haru, wołachu wobydlerjo w Zdźěri we Wulkodubrawskej gmejnje policiju. Zastojnicy lepichu tam 44lětneho muža, kiž po puću motorske ćišćeše. Jězdźidło bě wón do toho z kólnje pokradnył. Na samsnej ležownosći bě so wón do toho do garaže zadobył a w njej wokno wosoboweho awta typa Mitsubishi rozbił. Zo móhł z awtom wotjěć, chcyše sej z bydlenskeho domu klučik wobstarać, zwrěšći pak na chěžnych durjach. Spokojić dyrbješe so z motorskim typa KTM w hódnoće 8 700 eurow. Policisća muža nachwilnje zajachu. Nuzowy lěkar zapokaza jeho pozdźišo do chorownje.
Policija (30.12.20)
Chłódźak zhubiła
Běła Woda. Z chłódźakom na puću dyrbješe so předwčerawšim policija w Běłej Wodźe zaběrać. 58lětna wodźerka wosoboweho awta typa Dacia bě techniski nastroj na awtowym připowěšaku transportowała. Po wšěm zdaću pak njebě jón na nim prawje přiwjazała, přetož na Srjedźnym puću wona chłódźak zhubi. Spočatnje pak to žona ani pytnyła njeje. Hakle kedźbliwej swědce wón wosrjedź dróhi napadny a wona policiju zazwoni. 58lětna dyrbi nětko z pokutu ličić, dokelž njebě chłódźak na připowěšaku prawje zawěsćiła. Hač móže wona nětko swoje silwesterske napoje přiwšěm chłódźić, bohužel znate njeje.
Policija (29.12.20)
Alarm w žonopowej fabrice
Mały Wjelkow. K wulkozasadźenju wohnjoweje wobory je dźensa rano w Małym Wjelkowje dóšło. Krótko po 6 hodź. přizjewi w tamnišej žonopowej fabrice awtomatiska připrawa alarm. Přičinu namakachu wohnjowi wobornicy před zawodom w kontejneru, z kotrehož smjerdźeše a para wustupowaše. Dokelž w bliskosći tež strašne maćizny składuja, přiwołachu přidatnych kameradow. Dohromady bě 60 wobornikow zasadźenych. Na městnje natwarichu dekontaminěrowanske městno. Ze škitnej drastu podaštaj so wobornikaj do kontejnera. Wonaj móžeštaj změrować, zo jednaše so jeničce wo skóncowanu wopłóčkowu rołu a zo žadyn strach njewobsteješe.
Policija (28.12.20)
Dar wuspytać chcył
Kamjenc. K hodam darjeny e-scooter chcyše prěni dźeń hód 14lětny w Kamjencu wuspytać. Na Bambruchskej dróze pak jědźeše wón z nim wobsadce policajskeho awta runjewon do rukow. Zastojnicy porokowachu, zo njebě dwukolesaty nastroj zawěsćeny a pósłachu hólca domoj, wězo nóžkujo.
Mopedaj fuk
Wojerecy. Paduši, kotřiž su hodowne dny mopedaj typa Simson S 50 we Wojerecach a Niskej pokradnyli, su potrjechenym hodowne dny chětro skepsali. W času wot póndźele hač do soboty zadobychu so cuzy do garaže we Wojerecach a spakosćichu z njeje módry moped. Wón drje njebě přizjewjeny a njeměješe tuž tež žanu zawěsćensku značku. Přiwšěm trochuje jeho wobsedźer hódnotu jězdźidła na 2 500 eurow. Na Simson S 51 N měrjachu so paduši prěni dźeń hód w Niskej a pokradnychu bruny moped w popołdnišich hodźinach z dwora statoka. Na jězdźidle přičinjena zawěsćenska značka: 719 UXT. Po informacijach policije trochuje wobsedźer hódnotu mopeda na něhdźe 1 000 eurow. Za woběmaj jězdźidłomaj policija nětko slědźi.
Policija (23.12.20)
Paduši hnydom dwójce we wsy
Nadźanecy. W běhu něšto dnjow su paduši hnydom dwójce Nadźanecy (Nadelwitz) pola Budyšina „wopytali“. Kaž policija rozprawja, so woni hižo minjeny kónc tydźenja do składa awtowych wobručow zadobychu a dotal njeznatu ličbu kompletnych wobručow rozdźělnych fabrikatow pokradnychu. Kotry wobjim rubizna ma a kelko wěcneje škody je při padustwje nastało, dotal znate njeje. Wčera wječor pobychu cuzy znowa w Nadźanecach a spytachu so tam do kontejnera firmy zadobyć. Při namócnym zachadźenju načinichu skućićeljo něhdźe 2 000 eurow wěcneje škody. Do kontejnera zadobyć pak so jim přiwšěm njeporadźi. Přisłušna kriminalna słužba wobaj padaj přepytuje – mjez druhim tež, hač jedna so wo samsnych kriminelnych ludźi.
Policija (22.12.20)
Wuchowanske awto znjezbožiło
Rakecy. Wobchadne njezbožo, na kotrymž bě wuchowanske awto wobdźělene, je so wčera popołdnju w Rakecach stało. Jězdźidło bě tam z Wojerec do směra na Budyšin po puću, jako na amplowym křižowanišću wotprawa VW na hłownu dróhu wujědźe. Wobaj šoferaj njemóžeštaj zražce hižo zadźěwać. Přiwołani dalši wuchowarjo, policisća a wobornicy zastarachu sobujěducu we wosobowym awće a dowjezechu ju do chorownje. Tuchwilu njeje jasne, hač je VW snano při čerwjenej ampli křižowanišćo přeprěčić chcył. Wuchowanske awto njebě w zasadźenju a tež žanoho pacienta njeměješe. Wone pak bu chětro wobškodźene a njeje najprjedy raz zasadźomne.
Policija (21.12.20)
Tójšto škody nastało
Budyšin. 12 000 eurow škody je wuslědk wobchadneho njezboža, kotrež je so předwčerawšim připołdnju w Budyšinje stało. Passat jědźeše po Paulijowej hasy ze směra Jägeroweje do směra na Jordanowu. Najskerje dokelž je słónco hłuboko stało a 31lětneho wodźerja awta slepiło, zhubi tón kontrolu nad swojim jězdźidłom a prasny na kromje dróhi do připowěšaka wosoboweho awta. Zranił so na zbožo nichtó njeje.
Na awtodróze parkował a spał
Połčnica. Awtodróhu A 4 je w nocy na sobotu wodźer wosoboweho awta typa Škoda najskerje z parkowanišćom zaměnił. Jeho jězdźidło napadny policiji na nabóčnym pasmje mjez wotbóčkomaj Połčnica a Ohorn. Jako zastojnicy awto kontrolowachu, wuhladachu w nim 26lětneho słowakskeho šofera, kiž tam spaše. Wubudźiwši jeho jemu rozłožichu, zo sej za wotpočink runje najkmańše městno wupytał njeje. Za to ma młody muž nětko z pokutu ličić.
Policija (18.12.20)
Znowa w cyrkwi kradnyli
Pančicy-Kukow. Z třomi mužemi, kotřiž běchu wutoru w Róžeńčanskej cyrkwi křiž, klinkački a škličku pokradnyli, dyrbješe so policija předwčerawšim znowa zaběrać. Po tym zo běchu zastojnicy sakralne wěcy wutoru do Róžanta wróćili, je skućićeljo na samsnym městnje nazajtra znowa spakosćichu. Policija lepi jich z rubiznu w klóštrje Marijinej hwězdźe w Pančicach-Kukowje. Paduchow dowjezechu na Kamjenski policajski rewěr, dweju z nich po lěkarskim přepytowanju do chorownje.
W Róžeńčanskej cyrkwi sakralne wěcy kradnyli
Rakecy/Róžant (SN/MWj). Chrobły taksijowy šofer je předwčerawšim štyrjoch podhladnych paduchow na Budyski policajski rewěr dowjezł, dokelž nochcychu woni zličbowanku za taksijowu jězbu zapłaćić. Nimo toho běchu do toho wjacore delikty skućili, z kotrymiž so nětko zastojnicy zaběraja.
Štyrjo mužojo w starobje 25 do 45 lět dachu so najprjedy z taksijom k Rakečanskemu gmejnskemu zarjadnistwu šoferować. Po informacijach policije dźěše 39lětny do twarjenja, hdźež je jednomu ze sobudźěłaćerjow z wulkim klučom hrozył. Gmejnski přistajeny cuzemu kazaše dom wopušćić, štož pak bě jemu smorže. Hakle jako běchu přiwołani zastojnicy z Wojerowskeho policajskeho rewěra na městnje, wón zarjadnistwo wopušći. W tym padźe přepytuja nětko mylenja domjaceho měra dla.
Policija (16.12.20)
Z trašawku hrozył
Łaz. Na zjawnym puću we Łazu je so předwčerawšim popołdnju 68lětny muž z trašawku na kolesowarja měrił. 38lětny bě do toho rentnarja přesćahnył, na čož tón jemu wupřestrěty srjedźny porst pokaza. Kolesowar na to zasta, zo móhł z mužom rěčeć. Tón pak jemu wudma nadawaše a skónčnje swoju trašawku na njeho měrješe. Policija pozdźišo podhladneho wuslědźi a při nim nabitu bróń. Za nju drje měješe rentnar dowolnosć, přiwšěm njesmě ju w zjawnosći při sebi měć. Policisća pistolu, municiju a dowolnosć sćazachu. Za 68lětneho změje to juristiske konsekwency.
