Wuběrna stawizniska hodźina

štwórtk, 07. meje 2015 spisane wot:

Po lońšim prěnim dźělu čakachu čłonojo Domowinskeje skupiny Pančicy-Kukow njesćerpnje na druhi dźěl přednoška Alfonsa­ Kuringa wo stawiznach swojeje wsy. Wčera dožiwi wjace hač 30 ludźi hodźinski­ film, wopřijacy dobu z časa wozytwarca Mikławša Truca hač k wu­zwolenju Stanisława Tilicha za sakskeho ministerskeho prezidenta w lěće 2008. Bě to wuběrna stawizniska lekcija, kotraž přihladowarjam wuwědomi, kak bohate Pančicy-Kukow na zajimawe wosobiny a wosebite podawki poprawom su. Při zestajenju paska je Alfons Kuring tež ma­terial­ Jana Krawže, Marija Ošiki kaž tež Serbskeho kulturneho archiwa a swójskeho archiwa wužiwał. Při třihanju bě jemu poboku Thomas Kleinstück z Kamjenskeho medijoweho centruma.

Ličba serbskich potomnikow přiběra

wutora, 05. meje 2015 spisane wot:

Serbske pomniki hraja wažnu rólu při skrućenju narodneho wě­dom­ja. Předsydka pomnikoweho wuběrka Maćicy Serbskeje Trudla Malin­kowa wuzběhny tole minjeny štwórtk na přednošku Budyskim Domowinjanam. Wona zastopnjuje naše pomniki do pjeć kategorijow. Do prěnjeje liča tajke, kotrež skedźbnjeja w němskej abo łaćonskej rěči­ na naš lud a zwjetša hižo njeeksi­stuja, kaž napis wo Serbach­ na zwonje Bu­dyskeje Michałskeje cyrkwje. Tež napis „Templum sorabicum“ za 1781 poswje­ćenu Mužakowsku serbsku Handrijowu cyrkej k tomu słuša. Tónle Boži dom bu 1945 zničeny.

Wo Mongolskej přednošowała

pjatk, 24. apryla 2015 spisane wot:

Wo swojich dožiwjenjach w Mongolskej we wobłuku projekta „Zubni lěkarjo bjez hranicow“ je zawčerawšim zubna lěkarka Leńka Andersowa w Nowej Wjesce přednošowała. Zhonichmy wjele zajimaweho wo kraju, wo zwěrjatach a wězo wo wšědnym dnju wobydlerjow. W Mongolskej, kotraž je pjeć króć tak wulka kaž Němska, bydli něhdźe 2,6 milionow ludźi, połojca z nich w stolicy Ulan Batoru. Tamna połojca wobydlerjow su zwjetša nomadojo. Woni pućuja po kraju ze stadłami koni, kotrychž maja tam něhdźe 46 milionow. Wot septembra do junija leži sněh, tak zo nimale ničo njerosće.

Porno Němskej maja w Mongolskej jeno­ sydom procentow telko žnjow. Najwjetši­ problem za wjesnych ludźi je, zo wobsteji tam lědma infrastruktura. Štó z nas móže sej předstajić, zo na přikład žaneje póšty njeje – žaneje nowiny, žanoho lista. K lěkarjej abo do cho­rownje, jeli scyła jednu maja, najwjace wobydlerjow dalokosće dla w ži­wjenju ženje njepřińdźe. Najwažnišej za nich stej tuž mjezsobna pomoc a hospo­dliwosć.

Jenož něšto dnjow do premjery swojeje knihi „Franz im Glück“ poby Franc Čornak z Chrósćic w internaće Budyskeho Serbskeho gymnazija. Jara zajimowany sćěhowaše młody publikum jeho wuwjedźenja wo třilětnym pućowanju jako wandrowski po štyrnaće krajach.

2007 bě Franc Čornak powołanje zamkarja nawuknył a pruwowanje złožił. Dźensa 29lětny sej po tym předewza, maćern­eje suknje so wzdać a sam žiwjenje do ruki wzać. Wandrowski być bě dawno jeho són a kriterije za to wón wšitke spjelnješe, na přikład, zo je powołanje nawuknył, nima žonu a dźěći a je strowy. W starobje 24 lět wón swoje dyrdomdejske pućowanje w Erfurće zahaji. Najwažniše wěcy, kotrež smědźeše sobu wzać, wón šulerjam pokaza. Woni so jara dźiwachu, zo ani mobilny telefon pódla njebě, za wjetšinu šulerjow njepředstajomne! Dale woni zhonichu, zo dyrbi wandrowski wob lěto wěsty čas dźěłać, štož jemu dźěłodawar wobkruća, tak zo je tež zawěsćeny.

Wjesnjanosta skupinarjow wopytał

wutora, 21. apryla 2015 spisane wot:

K zajimawemu stawizniskemu wječorej zetkachu so minjeny pjatk čłonoje Domowinskeje skupiny Komorow/Trupin/Rakecy a dalši zajimcy w Komorowskim młodźinskim klubje. Předsydka Borbora Felberowa powita wosebje Swena Nowotneho, noweho Rakečanskeho wjesnja­nostu, kiž bu hakle tydźenja wuzwoleny. Jako witanski dar přepoda jemu dźěłowy plan skupiny. Swen Nowotny wupraji so za­ to, zo měli so kultura a nałožki na wsach­ gmejny zachować, a podšmórny wuznam towarstwow. Nadźijomnje gmejna a wjesnjanosta wobydlerjow w prócowanju wo aktiwne skupinske dźěło tež přichodnje podpěrujetaj.

„Wikowanske dróhi mjez Kamjencom a Budyšinom“ rěkaše na to přednošk Trudle Kuringoweje. Něhdyša wučerka a županka zaběra so hižo wjele lět ze stawiznami a kulturu swojeje dwurěčneje domizny wokoło Kamjenca. Jara zajimawy film wo wikowanskich pućach w srjedźowĕku a wuznam za žiwjenje našich prjedownikow, wuwiće rjemjesła a industrije – wšo to zbudźi wulki zajim mjez připo­słucharjemi.

W Cymplu-Turjom přednošowała

srjeda, 08. apryla 2015 spisane wot:
Njedawno přednošowaše Trudla Malinkowa w połnje wobsadźenej Mjedakec korčmje-pensiji w Cymplu-Turjom – ródnej wsy Mateja Urbana, přełožowarja Iljady a Odyseje – wo serbskich wupućowarjach do zamórskich krajow, wo socialnych a nabožnych přičinach a kak so jim po puću a na městnje zeńdźe. Rysujo serbski rěčny rum před 150 lětami wěnowaše so wona wosebje dóńtej 600 wupućowarjow pod nawodom Jana Kiliana, fararja­ starolutherskeje wosady we Wukrančicach a Klětnom, do Texasa. Přitomny běše tež prjedawši starolutherski farar z Klětnoho. Malinkowa čitaše z listow wupućow­arjow, kotrež žony kaž muži jenak hnujachu. Wšitcy sej prajachu, kelko tola wobsedźimy, hdyž sej swoje doma wobchowamy. Byrnjež přednošk něm­skorěčny był, spjelnichu sej někotři připosłucharjo přeće a z Trudlu Malinkowej serbsce pobjesadowachu.
Kř. Krawc

Tež serbscy hudźbnicy sobu hraja

štwórtk, 02. apryla 2015 spisane wot:

Składnostnje swojeho 50lětneho wobstaća je Młodźinski dujerski orchester Budyšin njedawno w tudyšim dźiwadle jubilejny koncert wuhotował. Orchester załožili běchu 1. apryla 1965. Tehdyšu hłownu iniciatorku Ursulu Kitzig na koncerće wutrobnje witachu. Mjez dźensnišimi čłonami orchestra su tež wjacori serbscy młodźi hudźbnicy.

Dirigent Matthias Hauschild orchester hižo 25 lět nawjeduje. Do toho činješe to Werner Frenzel z Lejna (Lehn) runje tak dołho. Frenzel bě njeličomne štučki skomponował a aranžował. Wosebje jemu, kiž wot 1991 w městačku Laatzen pola Hannovera bydli a je kónc februara 90. narodniny swjećił, bě koncert počesćenje za jeho dźěło. Wjacore title za­njese zhromadnje z orchestrom muski chór z Hornjeje Hórki, dirigowany wot Mariki Matthes-Hartmann.

Přihoty na jutrowničku

srjeda, 01. apryla 2015 spisane wot:

Runja zašłym lětam zetkachu so minjenu sobotu čłonojo Němčanskeje wo­hnjoweje wobory, wjesneho kluba kaž tež dalši wobydlerjo Němcow k wulkemu rjedźenju wjesneho srjedźišća. Tu zetkaja so křižerjo njedźelu rano, prjedy hač do Kulowa wotjěchaja. Dale wurjedźichu sobotu hłownu dróhu. Tak změja hosćo kaž wobydlerjo jutrownu njedźelu čistu wjes, zo bychu křižerjow witali.

Na naměsće před wjesnej kapałku běchu pomocnicy tohorunja aktiwni a wurjedźichu kwětkowe rabaty a pućiki. Zdobom organizowachu techniku, zo bychu někotre hałzy wulkeho štoma při kapałce wotrězali. Wone běchu suche a hrožachu na třěchu kapałki padnyć.

Wšitkim, kotřiž su pomhali napohlad wsy porjeńšić, słuša dźak. Njezrozumliwe pak je, zo město Wojerecy ničo nječini, zo by znajmjeńša z techniku kromy dróhi­ rjedźić dało.
A. Nowak

nawěšk

  • Spěchowanski kruh za serbsku ludowu kulturu je 16. a 17. měrca mjeztym 28. serbske jutrowne wiki w Budyskim Serbskim domje wuhotował. Wiki běchu jara wuspěšne, tež nastupajo ličbu wopytowarstwa. Tule smy wam někotre fotowe impresije z wikow zestajeli

nowostki LND