Awtor dźensa
Toni Ryćer
W našim dźensnišim hektiskim žiwjenju wažu sebi měr a ćišinu w delanskej domiznje. Štó dźě dyrbjał so do Šunowa zabłudźić? Nimo derje hladanych statokow nimaš tu žadyn wobchod, ani šulu, pěstowarnju abo lěkarja. A internet dračuje so ze směšnymi 800 bitami. Jenički wšědny přemysłowy serwis poskića Langec frizerka. Powěda so, zo dóstanješ tam w čakarni tež šalku kofeja. Chceš-li pak k frizerej, trjebaš włosy za třihanje, a te ja nimam. Narunać pak njeda so měr w našej wsy, tež hdyž wobkedźbuju rosćacy wobchad wosebje kónc tydźenja na dróhach. Bohužel su to zwjetša awta hladanskich słužbow.
Koparske mišterstwa žonow
Jutře, sobotu, wot 9 do 14 hodź. wubědźuje so wosom holčich koparskich mustwow w Kamjenskej sportowni při lětanišću wo halowe wokrjesne mišterstwa. Hrać budu w modusu „Kóždy přećiwo kóždemu“, a to stajnje dźesać mjeńšin.
Jutře RB-cup w Kamjencu
Zapadołužiski koparski zwjazk zarjaduje jutře, 12. januara, w sportowni při Kamjenskim lětanišću halowy koparski turněr RB-cup. Tež Sokoł Ralbicy/Hórki je prěni raz mustwo muži za turněr přizjewił. Hrate budźe wot 15 hodź. w dwěmaj skupinomaj.
Testowe koparske hry
Po hodownej a nowolětnej přestawce su wyšoklasowe mustwa zaso trenować započeli a sej w přichodnych tydźenjach wjacore testowe hry dojednali. Tak změje FC Energija Choćebuz jutře w 14 hodź. z AC Spartu Praha najatraktiwnišeho přećiwnika w Stadionje přećelstwa. Dalše testowe partije:
19.01. 11:00 Dyn. Drježdźany U19 –
Budissa Budyšin
19.01. 11:00 Jednota Kamjenc –
Módro-běli Kulow
19.01. 14:00 FC Energija Choćebuz – 1. FC Magdeburg
Prěnje a druhe mustwo wonka
Wolejbulisća Viktorije Worklecy hraja jutře za tydźeń w halomaj přećiwnika, a to we Wojerecach a Niederoderwitzu.
Wuhotowar, zarjadowar a organizator šesteho haloweho koparskeho turněra Kulow-cup w zymje bě znowa mustwo Kulowminatijow. Wšako bě wone turněr loni dobyło. A zakitowar steješe tónraz zaso na prěnim městnje, po załoženju w lěće 2014 nětko hižo pjaty raz. Dokelž běchu Kulowminatije loni tež lěćnu ediciju dobyli, dyrbja woni lětsa a klětu spočatk lěta wobaj turněraj přewjesć.
W Kulowskej wjacezaměrowej hali hraješe 5. januara wosom cyłkow na 6. zymskim Kulow-cupje w dwěmaj skupinomaj w předkole. Prěnje połfinale mjez Zelenej gardu a WD-40 skónči so 1:2, druhe mjez Dołhej gardu a Kulowminatijemi 3:4.
W finalu běchu potom Kulowminatije přećiwo WD-40 z 5:0 wuspěšni.
Kónčny staw 6. Kulow-cupa w zymje:
1. Kulowminatije, 2. WD-40, 3. Dołha garda, 4. Zelena garda, 5. Gut Kickerz, 6. Söffnerojo, 7. Company of Kulow, 8. Wjesni hłupacy Werner Müller
Tabulka koparskeho dorosta
młodźina A, koparska wokrjesna liga
HZ Kubšicy/Bukecy 12 86 : 11 36
HZ Ottendorf-O./Hermsd. 13 74 : 22 30
HZ Radwor/Wulka Dubr. 13 39 : 17 29
HZ Horni kraj Sprjewja/Hnašecy-Dobruša
11 38 : 17 25
Póst Germania Budyšin 12 45 : 34 19
HZ Němske Pazlicy/Běła/Cunnersdorf
13 39 : 51 19
TSV Wachau 13 51 : 60 18
HZ Jednota Kamjenc/Kinspork/Łužnica
12 29 : 38 16
HZ Großnaund./Lomnitz 13 29 : 31 15
HZ Ramnow/Bretnig-Hausw./Porchow
13 32 : 44 15
HZ Ćisk/Hory/HZ Łaz/Běły Chołmc
13 31 : 39 11
HZ Rakecy/Njeswačidło 13 27 : 56 10
SJ Chrósćicy 11 21 : 30 8
HZ Bart/Budissa Budyšink/Malešecy
12 4 : 95 0
Měšćanosta Wojerec za socialne naležnosće Thomas Delling je tam prěnju njedźelu noweho lěta 40. nowolětny běh startował. 166 běharkow a běharjow, 47 wjac hač loni, poda so na wšelako dołhe čary. Mjez nimi bě 33 wólnočasnych atletow na čarje 2 km. 33 walkowarjow a 100 ludźi (33 žonow a 67 muži) wobdźěli so na pokalnym běhu 6 kilometrow. Najstarši starter bě na čarje 2 km 90lětny Karl-Heinz Noack z Wojerec. Wón je mjeztym hižo wjele lět pódla na sportowskim zazběhu noweho lěta. Najebać starobu pak je přeco hišće aktiwny. Zhromadnje na čaru poda so z Karlom-Heinzom Noackom najstarša žona, a to 73lětna Hella Helm z Jitka pola Rakec. Najmłódši wobdźělnik pokalneho běha bě wosomlětny Johann Drosa wot LARG Wojerecy a najstarši starter na hłownym běhu 6 km 79lětny Hans Zosel. Jako najstarša běharka na pokalnym běhu bě 66lětna Hannelore Nippel zapisana. Hižo bjezposrědnje po starće wubědźowanja so načolni atleća wotsadźichu.
Na sobu najstaršim silwesterskim běhu serbscy starterojo přikładnje wojowali
Na mjeztym hižo 52. Budyskim silwesterskim běhu, z kotrymž lubowarjo běhanja w Budyšinje wotpowědne lěto rady w kruhu sportowych přećelow zakónčeja, bě tónraz samo 397 atletow w starobje pjeć do 84 lět. To bě znowa rekordne wobdźělenje. Dotalna najwjetša ličba so wubědźowacych běharjow a běharkow je porno lětu 2016 wo 56 starterow rozrostła.
Aktiwni wubědźowachu so runje silwester, po wjedrje dosć přijomny to dźeń, po tradiciji na jednej z čarow 2,5 / 5,3 a 10,6 km, kotrež wjedu wot Młynkec łuki do rjaneho Humboldtoweho haja zaso wróćo do stadiona k cilej. Budyske lochkoatletiske zjednoćenstwo Čerwjeno-běli 90, naslědnistwo Motora Budyšin, je hłownje pod režiju swojeho předsydy Christopha Mehnerta a jeho mandźelskeje kaž tež swěrnych pomocnikow tónle kónclětny sportowy podawk, kiž njeje ekstremnych wjedrowych kapriolow dla ženje wupadnył, zaso přikładnje organizowało a přewjedło.
Tež spočatk lěta 2019 je Towarstwo Cyrila a Metoda tradicionalny halowy koparski turněr wuhotowało. Tak zetka so minjenu sobotu dźewjeć mustwow w Chróšćanskej „Jednoće“, zo bychu wo trofeju wojowali. Lětsa bě prěni króć tež cyłk z Čěskeje zastupjeny.
Dypkownje w 15.30 hodź. zahwizda nawoda turněra Guido Zahrodnik prěnju partiju. W relatiwnje małej sportowej hali hrajachu štyrjo přećiwo štyrjom, a to stajnje dźesać mjeńšin.
Po předkole přesadźichu so w stafli A mustwje Zornowc Hórki a Sunshine-elita. Tej nastupištej w połfinalu přećiwo cyłkomaj Klumpaki a Puklot Chrósćicy, kotrejž běštej staflu B na prědnimaj městnomaj zakónčiłoj.
Prěnje semifinale wopokaza so jako jara wurunane. W regularnym hrajnym času njemóžachu sej Hórčenjo kaž tež Klumpaki dobyće zawěsćić, tak zo dyrbjachu třělenje ze sydom metrow přewjesć. Tu mějachu Klumpaki, hrajerjo Chróšćanskeje SJ a Sokoła Ralbicy/Hórki trěbne zbožo a so snadnje přesadźichu.