Z busom do Krupki

póndźela, 24. julija 2017 spisane wot:
Radwor (SN). Na putnisku Božu mšu srjedu, 26. julija, w 10 hodź. w Krupce po­da so tež zaso bus. Štóž chce sobu jěć, njech so hač do jutřišeho připołdnja w Šmitec wozydłownistwje w Radworju přizjewi. Telefonowe čisło je 035935/28 60.

Galerija zawrjena

štwórtk, 20. julija 2017 spisane wot:

Biskopicy. Biskopičanska galerija Carla Lohsy na Drježdźanskej dróze 1 wostanje jutře, 21. julija, zawrjena. Kaž z běrowa wyšeho měšćanosty rěka, je to techniskich přičin dla. Hewak je dom, w kotrymž móža sej zajimcy hač do 13. awgusta wustajeńcu Joachima Bethmanna „Auf der Suche“ wobhladać, we wote­wrjenskich časach radnicy přistupny.

Móst dale połojčnje zaraćeny

Budyšin. Budyski Móst měra wostanje do směra na město dale zaraćeny. Dokelž njemóžeše firma dźěła zakónčić, je wona město prosyła, nadawk hač do 28. julija podlěšić. Přičina dlijenja je, zo njebě wotwidźeć, zo nańdu wjele wjace zerzawych dźělow. Nimo toho dyrbjachu dźěła wjedra dla přetorhnyć.

Mały Wjelkow (CS/SN). Kulturny organizator Mike Salomon bě tež lětsa zaso za kulturne lěćo w Małowjelkowskej sotrowni wobšěrny a wotměnjawy program zestajał. Minjenu sobotu je w přepjelnjenym twarjenju před wjace hač 100 přihladowarjemi jazzowa legenda Pascal von Wroblewsky swój program předstajiła. W dwuhodźinskim koncerće hódnoćeše wona ze swojimi improwizacijemi wosebje Johanna Sebastiana Bacha. Publikum bě wulce zahorjeny a wužada sej tež wot hudźbnikow Michija Winklera a Reimera Hentschki přidawk.

Nowa mjećawa po puću

Budyšin (SN). Někotre dny mjeztym wukonja mała nowa mjećawa CityCat 2020 XL w Budyšinje swoju słužbu. Nastroj njeje jenož optisce něšto za wóčko, mašina je tež enormne dźěłowe wolóženje. Wšako rjedźa z modernej mašinu měšćanske chódniki a kolesowarske šćežki kaž tež zjawne městnosće. Wuhotowana je CityCat z wjacorymi chošćemi a 300literskim tankom wody.

Budyšin (SN/mwe). Idealnej přewodźerjej za šulerjow a wučomnikow, kotřiž žanu měsačnu kartu za bus a ćah nimaja, stej za wuchodnu Saksku superlětni prózdninski tiket kaž tež prózdninski tiket­. Z tajkim lisćikom su młodostni pod 21 lětami hač do 6. awgusta lukratiwnje po puću. To rěka za jeno 64 centow wob dźeń móža woni po cyłej Sakskej a w Srjedźoněmskim wobchadnym zwjazku wšitke ćahi, nadróžne, busy a přewozy runje tak kaž jězby z Mužakowskej lěsnej železnicu knihować. Za wobaj lisćikaj pak trjebaja wužiwarjo kartu kupcow abo šulerski wupokaz, kotrejž njesmětej so dale dać.

Wjace kedźbnosće demency

Wotstronja škody wody dla

póndźela, 17. julija 2017 spisane wot:
Kamjenc. Při zakładnej šuli „Sophie Scholl“ w Kamjenskim měšćanskim dźělu Brěznja chcedźa hač do kónca lětnich prózdnin škody na rěčnym brjohu Čorneho Halštrowa wotstronić, kotrež su powodźenja zašłych lět zawostajili. Kóšty něhdźe 85 000 eurow zarunatej Zwjazk a Swobodny stat Sakska. W přichodnymaj lětomaj chcedźa w Brězni wšitke škody podłu Čorneho Halštrowa wotstronić. Dźěła při sportnišću su při tym najprjedy raz najwažniše. Potom móže město Kamjenc sportnišćo, kotrež hač bjezpo­srědnje k rěce saha, kaž přizwolene saněrować.

Pytaja pomocnikow

pjatk, 14. julija 2017 spisane wot:

Róžant. Za Gig-festiwal wot 21. do 23. julija w Róžeńće pytaja młodostnych, kotřiž bychu při přihotach na dźěłarnički pomhać a mjez druhim ławki nastajeć móhli, a to 22. julija wot 10 hodź. Štóž ma lóšt a chwile, njech so hač do jutřišeje soboty pola fararja Gabriša Nawki w Kulowje abo we Worklečanskim Don Boskowym domje přizjewi.

Madźarski orchester hudźi

Radwor. Młodźinski dujerski orchester z juhomadźarskeho Bonyháda chce wopytowarjow přichodnu póndźelu, 17. julija, w 19 hodź. na Radworskim sportnišću z koncertom zawjeselić. Młodźi hudźbnicy běchu minjene dny na mjezynarodnym dujerskim festiwalu w Hamburgu a pokazaja na dompuću tež w Radworju, što zamóža. Zastup je darmotny. Za wudawki orchestra zběraja pjenježny dar.

Při jězoru hejsuja

Zawru tunl

srjeda, 12. julija 2017 spisane wot:

Budyšin. Tunl Budyskeje zapadneje tangenty budźe wot pjatka, 14. julija, wot 18 hodź. hač do póndźele, 17. julija, rano w pjećich dospołnje zawrjeny. W tym času tam jězdnju ponowja. Wokołopuć budźe wupisany.

Radźićeljo so zetkaja

Róžant. Twarske nadawki za energetiske saněrowanje Róžeńčanskeho gmejnskeho domu budu jedna tema přichodneho posedźenja gmejnskeje rady Ralbicy-Róžant, kotrež wotměje so jutře, štwórtk, we 18.30 hodź. w Róžeńće. Dale přepo­dadźa nadawk za wutwar třećeho a štwórteho twarskeho wotrězka Łazkowskeje dróhi Při Klóšterskej wodźe. Nimo­ toho wobzamknu płaćiznu, za kotruž chce gmejna nowe twarske ležownosće w Sernjanach předać.

Hat chcedźa porjeńšić

Kulow. Zo by Kulowski měšćanski hat dale atraktiwny był, chce měšćanske zarjadnistwo teren wokoło njeho porjeńšić. Tak chcedźa pućiki wokoło hata ponowić, nowe móžnosće k posydnjenju nastajić a plateau saněrować. Přichodnu zymu chcedźa wodu wotpušćić, zo móhli brjóh hata skrućić. W běhu lěta wotměwaja so wokoło hata wjacore młodźinske a dalše zarjadowanja.

Konjace zapřahi po puću byli

wutora, 11. julija 2017 spisane wot:

Plusnikecy. Runja zašłym lětam su so zawčerawšim na lětušej kołojězbje konjacych zapřahow po Sprjewinej łučinje znowa serbscy pohončojo wobdźělili. Tak bě Krystof Šołta z Jaseńcy pódla, na kotrehož wozu sedźachu tež muzikanća. Woni tohorunja serbske štučki zahudźichu. Dohromady wobdźěli so 16 zapřahow, kotrež mějachu 34 kilometrow dołhu čaru zmištrować.

W muzeju kompjuter hrać

Wojerecy. Wjacore prózdninske zaběry skići nowy Wojerowski kompjuterowy muzej ZCOM. Jedna z nich steji pod hesłom „Dyrdomdej kompjuterowa hra“, kotraž wabi zajutřišim, štwórtk, a hišće raz 27. julija stajnje wot 13 hodź. Tam wobdźělnicy mjez druhim zhonja, wot kotreho časa scyła kompjuterowe hry eksistuja a kak su wone něhdy wupadali. Wězo móža woni tež na ličakach hrać. Wobdźělenje płaći pjeć eurow plus normalny zastup.

W lěsu kedźbować

pjatk, 07. julija 2017 spisane wot:

Budyšin. Po sylnym njewjedrje 22. junija tež mnozy priwatni wobsedźerjo lěsow na swojich ležownosćach škody zwěsćeja resp. spytaja je wotstronić. Tole pak móh­ło strašne być a žada sej wosebite wukubłanje. W zašłosći je při tajkich dźěłach časćišo k njezbožam dóšło, kotrež mějachu zdźěla tragiski wukónc. Zwjetša je jeno z ćežkej techniku móžno škody wotstronić. Tohodla delni lěsniski zarjad Budyskeho krajnoradneho zarjada wšitkim wobsedźerjam lěsa poruča so w lěsniskich rewěrach abo na krajnoradnym zarjedźe wobhonić, kak móža škody w lěsu bjez stracha wotstronić. Najlěpje je, hdyž tajke dźěła fachowym firmam přewostajimy.­ Wone nimaja jenož wu­kubłanych sobudźěłaćerjow, ale tež wotpowědnu specielnu techniku.

Planuje putnisku jězbu

Smjerdźaca. Přichodnu putnisku jězbu z busom do Medźugorja w Bosniskej-Hercegowinje planuje Smjerdźečan Gerat Róbl wot 30. septembra do 7. oktobra 2017. We wobłuku jězby je tohorunja dnjowy wulět do Dubrovnika předwidźany. Přizjewjenja, kotrež přijimuje Gerat Róbl pod telefonowym čisłom 035796/ 96 540, su hišće móžne.

Hudźa na torhošću

W prózdninach do muzeja

štwórtk, 22. junija 2017 spisane wot:

Budyšin. Za lětuše lětnje prózdniny ma Budyski Serbski muzej štyri programy w poskitku. Dźěći móža so na dyrdomdejskim wodźenju po měsće wobdźělić abo na kreatiwnej dźěłarničce prózdninske dopomnjenki zhotowić. Dale poskića kostimowu bajkowu hodźinku a program k wustajeńcy „Zbóžny, štóž wěri“. Zajimcy njech přizjewja so pod telefonowym čisłom 03591/270 87 00 abo e-mailnje pod . Poskitki su tež internetnje pod www. sorbisches-museum.de přistupne.

Šulerjo na wuprawje byli

Kulow (AN/SN). 26 šulerjow Kulowskeje wyšeje šule „Korla Awgust Kocor“ je so spočatk tydźenja na wuprawu do čěskeho Libereca podało. Bě to wuznamjenjenje najlěpšich 5. do 9. lětnika. W Liberecu wopytachu woni iQlandia, moderne twarjenje, w kotrymž zeznajomichu so z najwšelakorišimi wobłukami techniki a wědomosće. Tak zaběrachu so z wodu, słónčnej energiju, z lětadłami a robote­rami. Po cyłym domje móžachu šulerjo swoje znajomosće w přirodowědnych předmjetach pohłubšić.

nawěšk

  • 21. jolka-swjedźeń w Nuknicy je nimo. Štož zwostanje su dopomnjenki na rjany žortny a zabawny wječor w Nukničanskej Brězanec bróžni. Někotre impresije serbskeho wječora w Nuknicy, kotrež je naša fotografowka-wolontarka Hanka Šěnec zhotowiła, wam tule
  • Serbske Nowiny-LND-Tuchmacherstr. 27 02625 Bautzen: Jolka 12.01.2019
  • Serbske Nowiny-LND-Tuchmacherstr. 27 02625 Bautzen: Jolka 12.01.2019

nowostki LND