Smječkecy. Worklečanski gmejnski zwjazk CDU přeprošuje póndźelu, 4. měrca, we 18.30 hodź. do wjesneho kluba „Při winicy“ w Smječkecach. Tam chcedźa na swojej hłownej zhromadźiznje kandidatow za komunalne wólby 9. junija nastajić. Witani su tež zajimowani wobydlerjo gmejny. Na zarjadowanju maja so kandidaća předstajić a swoje pozicije za wólby wozjewić.

Hońtwjerjo so schadźuja

Chrósćicy. Na swoju hłownu zhromadźiznu přeprošuje Chróšćanske hońtwjerske drustwo štwórtk, 7. měrca, w 19 hodź. wšitkich čłonow do Młynkec hosćenca w Hórkach. Přizjewjenja přijimuje předsydstwo drustwa hač do póndźele, 4. měrca.

Na wóskowanje do muzeja

Budyšin. Kónc tydźenja přeprošuje Serbski muzej w Budyšinje na prěnje dźěłarnički debjenja jutrownych jejkow. Sobotu kaž tež njedźelu su zajimcy stajnje wot 15 do 17 hodź do rumnosćow muzeja na hrodźe přeprošeni. Někotre swobodne městna w kursach hišće ­maja. Zajimowani njech so telefonisce pod 03591 2708700 přizjewja. Přizjewjenja za dalše dźěłarnički sobotu a njedźelu, 9. a 10., a sobotu, 16. měrca, tohorunja pod mjenowanym čisłom přijimuja.

Hromadźa wotpadki

Pančicy-Kukow. Na lětušim druhim škotowym turněrje serbskich seniorow je so wutoru w Pančicach-Kukowje škotowarka a 29 škotowarjow wobdźěliło. Jako nowačka witachu Uwe Sieglera. Organizatorej Měrćinej Nowakej so za jeho skutkowanje z prezentom dźakowachu. Dobyćer dnja bě Hermann Woko z 3 087 dypkami. Druhe městno wudoby sej Wolfgang Kühn (2 637) a třeće nowačk Uwe Siegler (2 630). Cyłkownje nawjeduje Herbert Krječmar před Hermannom ­Wokom a Měrkom Šmitom. Přichodny turněr wotměje so 26. měrca w Radworskej „Meji“.

Chrósćicy. Rěčny centrum WITAJ a Kamjenska župa „Michał Hórnik“ přeprošujetej na schadźowanku swójbow njedźelu, 3. měrca, wot 15 hodź. do Chróšćanskeje „Jednoty“. Pisany program zahaja mali rejwarjo „Łužičanki“. Přizamknu so dźěłarnički a zaběry za najmłódšich, mjez druhim paslenje, dźěćacy sport a čitanski róžk, a za trochu staršich eksperimenty, kuzłanje, nowe medije a krosnowanje. Dale předstaja so Serbski muzej, Němsko-Serbske ludowe dźiwa­dło a Ludowe nakładnistwo Domowina z najnowšimi poskitkami za swójby a dźěći. Starši maja składnosć so z fachowcami wo rěčnych kursach a rěčnym kubłanju rozmołwjeć abo při kofeju a tykancu bjesadować.

Z měšćanostu so rozmołwjeć

Wojerecy. Město Wojerecy a tamniša měšćanska biblioteka Brigitty Reimann pokročujetej pjatk, 1. měrca, w 17 hodź. z dalšim zarjadowanjom w rjedźe „Prašej so wyšeho měšćanostu“. Tónraz póńdźe wo komunalnu politiku a wo prašenje, štó je za što zamołwity. Zajimcy změja składnosć swoje prašenja Torstenej Rubanej-Zehej (SPD) wotbyć a so z nim rozmołwjeć. Přizjewjenje trěbne njeje.

Zhromadnje pjelsćić

Budyšin. W srjedźišću přichodneho zarjadowanja w Budyskej Smolerjec kniharni štwórtk, 29. februara, w 19 hodź. steji Eberhard Dučman. Wón bě němsko-serbski twarski inženjer, kiž je ze swojej knihu „Lausitzer Holzbaukunst“ (1959) wuznamny přinošk k přeslědźenju kulturnych stawiznow němsko-serbskeje Łužicy předpołožił. Mjenje znate su jeho slědźenja wo industrijelnym twarjenju. Awtorka dr. dr. Betina Kaun je twarskemu inženjerej knihu wěnowała, kotruž w Smolerjec kniharni předstaji. Zajimcy su wutrobnje witani.