Worklecy. Wobstarać a natwarić wobchad změrowacu připrawu budźe jedna z temow přichodneho posedźenja Worklečanskeje gmejnskeje rady. Jeje čłonojo zetkaja so zajutřišim, štwórtk, w 19 hodź. w jědźerni Worklečanskeje wyšeje šule. Dale zaběraja so radźićeljo z wotnajenskim zrěčenjom za kupowy hat kaž tež z prašenjom, hač měł wjesnjanosta přichodnje dale čestnohamtsce abo snano hłownohamtsce skutkować. Zajimcy su wutrobnje přeprošeni.
Poskićuja lisćiki
Chrósćicy. „Trjebaja małe gmejny w Sakskej hłownohamtskeho wjesnjanostu?“, rěka hesło informaciskeho zarjadowanja, kotrež je jutře, wutoru, w 19 hodź. w Chróšćanskej wjacezaměrowej hali „Jednota“. Na nje přeproša zarjadniski zwjazk Při Klóšterskej wodźe radźićelow wšěch pjeć přisłušacych gmejnow kaž tež zajimowanych wobydlerjow. Přednošować budu wjacori referenća.
Za wiki so přizjewić
Slepo. Wulke rjemjeslniske a burske wiki budu jedna z atrakcijow we wobłuku swjedźenskeho kónc tydźenja wot 17. do 19. junija k 750. róčnicy wobstaća Slepoho. Za nje móža so rjemjeslniske zawody, wikowarjo a towarstwa hišće přizjewić. Doba přizjewjenja je hač do 10. februara podlěšena. Formular nadeńdu zajimcy pod .
Wojerecy. Sadowcy prawje wurězować, to móža zajimcy 19. februara wot 9 do 12 hodź. na Wojerowskej dźěćacej a młodźinskej farmje nawuknyć. Pod fachowym nawodom nazhoniteje zahrodnicy Janiny Gräulich wobdźělnicy na městnje někotre sadowcy wurězaja. Za to měli sej woni porjadne zahrodniske nožicy a snano tež mału piłu sobu přinjesć. Wobdźělenje płaći na wosobu dwanaće eurow. Na kóždy pad je přizjewjenje pod trěbne.
Zastupne lisćiki dobyć
Budyšin. Wobdźělenska a wobhospodarjenska towaršnosć Budyšin (BBB) swjeći lětsa 30. róčnicu wobstaća. Při tej składnosći wulosuja kóždy měsac 30 atraktiwnych mytow. W februaru móža zajimcy 30 swójbnych zastupnych lisćikow (stajnje za dweju dorosćeneju a dwě dźěsći) za błudźišćo při Małowjelkowskim prazwěrjencu dobyć. Wobdźělić móža so zajimcy hač do 28. februara na internetnej stronje . Hač do srjedź přichodneho měsaca dobyćerjow wulosuja a jich pisomnje informuja.
Durje wirtuelnje wotewrjene
Smjerdźaca. Za dźěći w starobje sydom do dźesać lět poskići Serbske šulske towarstwo prózdninske dny wot 14. do 17. februara w kubłanskim srjedźišću LIPA w Smjerdźacej a to wšědnje wot 9 do 15 hodź. Na šulerjow čakaja zabawa w sněze, wopyt w muzeju, rejwanje, zaběra ze skludnym psom, wotputanje z jogu, wuspytanje dźěła jako pjekar, hudźenje a paslenje. A wězo chcedźa zhromadnje hry hrać a wjesołe a zajimawe prózdninske dny dožiwić. Tež swójske ideje su prašane a witane. Přizjewjenja přijimuja hač do 9. februara pod pro abo pod telefonowym čisłom 0 35 91 / 55 02 07. Poskitk płaći na šulerja 40 eurow inkl. zastaranje.
Za projekt so přizjewić
Chrósćicy. Za nowu serbsku spěwohru „Z TOBU – Bohu swjećene lěto“ su dźěći do wulkeho chóra prošene. Spěwohra nawjazuje na CD, kotruž běše Towarstwo Cyrila a Metoda z.t. zhromadnje ze Załožbu za serbski lud w lěće 2000 wudało. Předstajić chcedźa ju w oktobru w Chróšćanskej „Jednoće“. Nadrobnje wopisany je projekt w Katolskim Posole.
Budyšin. Štóž ma zajim na rěčnym kursu čěšćiny wot 22. julija do 19. awgusta w Praze abo wot 14. awgusta do 5. septembra w Českich Budějovicach, njech w Rěčnym centrumje WITAJ hač do 15. měrca swoje přizjewjenske podłožki woteda. (Póstowe naměsto 2, 02625 Budyšin, e-mail: wina.de). Wotpowědny formular a dalše informacije su na internetnej stronje pod „Nowosće“ přistupne.
Jězbne plany znowa změnili
Budyšin. Znowa su jězbne plany w Budyskim wokrjesu změnjene a přiměrjene. Zamołwići reagowachu tak na skóržby a pokazki sobujěducych. Wot nětko płaćiwych změnow profituja předewšěm šulerjo. Potrjecheni móža so na internetnej stronje wobchadneju zaměroweju zwjazkow ZVON abo VVO kaž tež w aktualnych powěsćach wokrjesa wobhonić. Mjez druhim změnili su čaru 790 Kamjenc–Chrósćicy–Ralbicy. Ale tež liniji 503 Budyšin–Wulka Dubrawa a 780 Wojerecy–Kulow–Rakecy stej potrjechenej. Tuchwilu zamołwići hišće dalše pokazki z wobchadnymi předewzaćemi přepruwuja a wothłosuja.
Chrósćicy. Serbski filmowy wječor wo dóńće Jurja Rjenča za čas stalinizma dožiwja zajimcy jutře, sobotu, w 19.45 hodź. w Chróšćanskej putniskej hospodźe. Filmowy pask „Stalin, Tito a mój nan“ spyta wujasnić, čehodla bu serbski prawiznik Jurij Rjenč 1950 wot němskeje kriminalneje policije zajaty a za čo bu wot sowjetskeho wójnskeho tribunala w Drježdźanach k 25 lětam jastwa zasudźeny. Cyły čas swojeho zajeća a po tym je spytał wotmołwu na prašenje namakać: „Štó je mje přeradźił a za čo sym dyrbjał do jastwa?“ Hakle po politiskim přewróće w NDR dósta wón wotmołwu, po tym zo bě Benedikt Cyž w Moskowskim archiwje tajneje ruskeje słužby „Ljubljance“ slědźił. Benedikt Cyž přinjese film sobu a rady tež wo pozadkach diskutuje. Wšitcy su wutrobnje witani. Prawidła 2G a zapisanja kontaktnych datow dla njech trochu prjedy přińdu.
Rejwanje za dźěći
Njebjelčicy. Předstajenje koncepta kolesowanskeje šćežki podłu statneje dróhi S 100 wot Miłoćic do Kamjenca budźe jedna z temow zhromadźizny Njebjelčanskeje gmejnskeje rady jutře, štwórtk, w 19.30 hodź. w posedźenskej rumnosći Njebjelčanskeje gmejny. Dale zaběraja so z twarskim planom přemysłownišća Při Krabatowym kamjenju a z wobstaranjom drasty za młodźinsku wohnjowu woboru.
Chrósćicy. Tež radźićeljo gmejny Chrósćicy jutře wuradźuja, a to wot 19 hodź. w kulturnym a gmejnskim centrumje. Woni maja so rozestajeć z čestno- abo hłownohamtskej dźěławosću wjesnjanosty. Dalši dypk na jich dnjowym porjedźe budźe, rozjimać wustawki wosebiteho wužiwanja w Chróšćanskej gmejnje. Wobě posedźeni radźićelow stej zjawnej. Zajimcy su witani.
Kamjenc. Wot lěta 1996 je 27. januar oficialny wopomnjenski dźeń za wopory nacionalsocializma. Tež w Kamjenskim wopomnišću Knježi doł je kóžde lěto wopomnjenska swjatočnosć. W zašłymaj lětomaj wšak dyrbješe wona korony dla wupadnyć. Zajutřišim, štwórtk, pak so tajke wopomnjenje zaso wotměje. Započatk budźe w 13.30 hodź.
Za swjedźeń so přizjewić
Pančicy-Kukow. Lětuši klóšterski a swójbny swjedźeń Budyskeho wokrjesa wotměje so 19. junija w klóštrje Marijinej hwězdźe w Pančicach-Kukowje. Za njón móža so towarstwa za kulturny program kaž tež wikowarjo za regionalne a přirodowe wiki přizjewić. Trěbne podłožki nadeńdu zajimcy na internetnych stronach klóštra (), wokrjesa (), gmejny Pančicy-Kukow (), Křesćansko-socialneho kubłanskeho skutka () a Sakskeho krajneho kuratorija za wjesny rum (). Najpozdźišo hač do 28. februara ma požadanje wotedate być. Na nadrobne prašenja wotmołwja mjez druhim sobudźěłaćerka kuratorija Sonja Hejdušcyna pod telefonowym čisłom 035796/ 971 30, e-mail .
Spěšnosć za wšěch wobmjezuja
Wojerecy. Składnostnje wopominanskeho dnja za wopory nacionalsocializma namołwjeja město Wojerecy, měšćanski zwjazk antifašistow kaž tež regionalny běrow za demokratiju k wobdźělenju na swjatočnosći 27. januara w 13 hodź. při Wojerowskim wopomnišću.
Jutře na škot
Lejno. Přichodny škotowy turněr serbskich seniorow je jutře, wutoru, w 14 hodź. w Lejnjanskim hosćencu. Nowačcy su tam rady witani. Na spočatku kartyplacanja mytuja dobyćerjow škotoweje sezony 2020/2021.
Pytaja dobrowólnych za census
Budyšin. Za lětuši census (ludličenje) pyta město Budyšin něhdźe 100 dobrowólnych interviewowarjow. Woni maja wot 15. meje w měsće kaž tež we wokolnych gmejnach wubrane swójby wopytać a z nimi krótke rozmołwy wo domjacnosći, wo mjenje a swójbnym stawje wjesć. Zajimcy njech přizjewja so pod telefonowym čisłom 0 35 91 / 27 06 50.