W prózdninach do muzeja
Budyšin. „Baje, baje, bachu ...“, rěka dalši prózdninski poskitk Budyskeho Serbskeho muzeja jutře, štwórtk, wot 10 hodź. Při tym steja sćinowe bajki w srjedźišću. Wobdźělić móža so zajimcy, kotřiž zamóža bajki bać a je tež pokazać. W Serbskim muzeju móža woni swójske sćinowe dźiwadło a figury paslić. Přizjewjenja přijimuja e-mailnje pod adresu ticket@sorbisches-museum.de abo pod telefonowym čisłom 03591/270 87 00.
Wotewru wustajeńcu
Budyšin. Rězbarstwo Alojsa Šołty ze Žuric steji w srjedźišću noweje wustajeńcy Budyskeje Serbskeje kulturneje informacije, kotruž tam pjatk, 29. oktobra, w 17.30 hodź. wotewru. Pod hesłom „Korjenje – swětło w rjadźe – swobodne kreacije z drjewa“ pokaza serbski wuměłc přehlad swojeho tworjenja a jednotliwe eksponaty a jich nastaće rozłoži. Wopytowarjo maja płaćiwe hygieniske postajenja wobkedźbować. Za zarjadowanje płaći prawidło 3G. Wšitcy zajimcy su na wotewrjenje zajimaweje přehladki wutrobnje přeprošeni
Čita z druheje knihi
Na knižnu premjeru
Budyšin. „Stop a stup“ rěka nowostka Měrany Cušcyneje, kotraž změje štwórtk, 28. oktobra, w 19 hodź. z hudźbu Jana Cyža w Budyskej Smolerjec kniharni premjeru. Awtorka wjedźe čitarja do Budyšina, powěda wo skurilnych podawkach, rozmysluje wo dźiwnosćach serbskeje rěče a česćuje basnikow a rjekow wšědneho dnja. Zajimcy njech přizjewja so pod telefonowym čisłom 0 35 91 / 57 72 88. Płaći prawidło 3G.
W prózdninach do muzeja
Budyšin. Paslenske popołdnjo přewjedu jutře, srjedu, wot 14 hodź. w Budyskim Serbskim muzeju. We wobłuku prózdninskeho poskitka móža wobdźělnicy swoje kreatiwne ideje zwoprawdźić. Zajimcy njech přizjewja so pod abo pod telefonowym čisłom 0 35 91 / 27 08 70 -0.
Hraja zaso škot
Radwor. Přichodny škotowy turněr serbskich seniorow wotměje so jutře, wutoru, w 14 hodź. w Radworskim „Słodeńku“, něhdyšej lutowarni napřećo cyrkwi. Nowačcy su kaž stajnje lubje witani. Dalši turněr budźe w nowembru w Budyšinje, kaž hłowny organizator Měrćin Nowak zdźěli.
Pjenjezy za pišćele přepodali
Wojerecy. Jězorinowa załožba Wojerowskeje chorownje je tele dny z nahladnej sumu pjenjez ponowjenje pišćelow Wojerowskeje katolskeje cyrkwje na Karla Liebknechtowej podpěrała. Čłonaj załožboweje rady Thomas Delling a Uwe Blazejczyk přepodaštaj zastupjerjam wosady symboliski šek w hódnoće 45 000 eurow. Sobudźěłaćerjo Drježdźanskeje pišćeletwarskeje firmy Jähmlich nětko pišćele wurjedźa, trěbne dźěle narunaja a instrument znowa hłosuja.
Wot dźensnišeho puć ponowjeja
Budyšin. Na Hasy Käthy Kollwitz w Budyšinje su dźensa mjez dróhomaj Při rězarni a Jordanowej asfalt ponowjeć započeli. Dźěła traja po wšěm zdaću tři tydźenje, a to w dwěmaj wotrězkomaj. Přijězd do centruma zarjadow pak wostawa dale móžny, informuje měšćanske zarjadnistwo.
Komorny koncert w cyrkwi
Budyšin. Ansambl FisFüz wuhotuje jutře, sobotu, w 19.30 hodź. Budyski komorny koncert w Marje-Marćinej cyrkwi na Bebelowym naměsće. Wopytowarjo dožiwja program „Lale – Colours of Eurasia“. Ansambl FisFüz je skupina hudźbnikow, kotřiž so na orientaliske melodije, wirtuozne improwizacije a zapadne harmonije koncentruja. Orientaliske jazzowe trijo aranžuje tohorunja tradicionelne aziske twórby a je hudźbnje znowa interpretuje. Lisćik při wječornej kasy płaći 18 eurow, potuńšene 15 eurow.
Štó je šmóratko zhubił?
Pančicy-Kukow. Na pólnym puću mjez Chrósćicami a Kozarcami bu srjedu, 13. oktobra, smartfon typa Oppo namakany. Štóž je jón zhubił, móže sej šmóratko w twarjenju zarjadniskeho zwjazka Při Klóšterskej wodźe w Pančicach-Kukowje wotewzać.
Na knižnu premjeru
Wotewrjene durje k jubilejej
Radźićeljo wuradźuja
Ralbicy. Wobzamknyć wužiwanje zbywacych srědkow z pawšale k skrućenju wjesneho ruma 2021, to budźe jedna z temow posedźenja gmejnskeje rady Ralbicy-Róžant jutře, štwórtk, we 18.30 hodź. w Róžeńčanskej gmejnskej sydarni. Dale póńdźe wo to, kak wužiwać přiražku za spěchowanje serbskeje rěče. Zajimcy su přeprošeni.
Hóstna hra w pólskej rěči
Dróha zawrjena
Brěžki. Wot wčerawšeje póndźele ponowjeja asfaltowu worštu statneje dróhi S 285 wot wotbóčki při zwjazkowej dróze B 96 pola Noweje Bukojny hač k wjesnej kromje Brěžkow. Twarske dźěła maja hač do 29. oktobra trać. W tym času je dróha po dołhosći 2,2 kilometrow dospołnje zawrjena. Wokołopuć wjedźe přez Mučow a Kulow.
Dźiwadło „wuchodneje identity“
Budyšin. Towarstwo Kamjentny dom přeproša na dźiwadłowy wječor pod hesłom „Kak zdokonjeć spomóžne wuměłstwo za wuchodnych Němcow?“, a to pjatk, 22. oktobra, w 19 hodź. Dźiwadłownik (Theatermacher) Noah Voelker z texaskeho Austina, hrajerka Rika Weniger z Neubrandenburga a choreograf Burkhard Körner z Mittweidy chcedźa ze swojim programom přepytować, hač tajke něšto kaž „wuchodoněmska identita“ eksistuje. Předstajenju přizamknje so zjawna rozmołwa. Zastup při wječornej kasy płaći dźesać resp. wosom eurow za wosoby z prawom na potuńšenje.
Předstaja knihu
„Fenki“ posledni raz
Budyšin. Němsko-Serbske ludowe dźiwadło pokaza jutře, sobotu, swoju kołwrótnu komediju „Dołhož fenki běža“ w 19.30 hodź. na hłownym jewišću Budyskeho NSLDź. Je to poslednje předstajenje a hrabnjenčko měsaca, kóždy lisćik płaći jenož wosom eurow. Dźiwadło poskića simultany přełožk do němčiny. W dźiwadle płaći incidency korony dla prawidło 3G. Testować dać móža so zajimcy do předstajenja w testowanskim centrumje na Burskej hasy. Wón je sobotu wot 17.30 hodź. wotewrjeny. Test płaći za wopytowarjow dźiwadła pjeć eurow. Termin móžeće hižo nětko přez internetnu stronu NSLDź skazać. Lubowarjo serbskeho dźiwadła njech lóštny kruch njeskomdźa.
Prózdniny z instrumentom
Koncertuja w cyrkwi
Budyšin. Ansambl The School of Night wuhotuje přichodny Budyski komorny koncert zajutřišim sobotu, w 19.30 hodź. w Marje-Marćinej cyrkwi na Bebelowym naměsće. Na wopytowarjow čakaja w atmosferje Božeho domu jendźelske spěwy, zanjesene na lutni (Laute). Cyłk The School of Night bu 2005 załoženy. Zastupne lisćiki poskićeja w Löbnerec hudźbnym domje na Kotołskej a w turistiskej informaciji na Hłownym torhošću. Skazać hodźi so lisćik tohorunja pod telefonowym čisłom 03591/ 534 412. Při wječornej kasy płaća kartki 18 eurow, potuńšene 15 eurow. Koronowe postajenja maja so wobkedźbować.
Wustajeńca přistupna
Kamjenc. Pućowanska wustajeńca wo česćowanju swjateho Bosćana w Chróšćanskej wosadźe je hišće hač do njedźele, 7. nowembra, w Kamjenskim sakralnym muzeju cyrkwje swjateje Hany přistupna. Boži dom je wot póndźele do pjatka stajnje wot 10 do 18 hodź. kaž tež sobotu a njedźelu wot 11 do 16 hodź. zajimcam přistupny.
Puć dale zawrjeny
Kulinariska jězba po swěće
Wojerecy. Na tak mjenowany street- food-festiwal přeprošeja wot pjatka hač do njedźele na swjedźenišćo při Wojerowskim gondlowym haće při Łužiskej kupjeli. Tam móžeš so na kulinarisku jězbu po mnohich krajach a kontinentach swěta podać a najwšelakoriše jědźe woptać. Mnohotnosć jědźow, kotrež na městnje čerstwe přihotuja, a jich kwalita stej jónkrótnej. Festiwal je přistupny pjatk wot 14 do 22 hodź., sobotu, wot 11 do 22 hodź. a njedźelu wot 11 do 20 hodź.
Doba zapodaća namjetow so kónči
Wojerecy. Župa „Handrij Zejler“ přijimuje hišće hač do pjatka, 15. oktobra, pod www.domowina.de namjety za wubědźowanje „Moja najlubša kamishibai-powědka“. Tematiski zakład přinoška měła serbska bajka abo baja być. Wurisanje je dźěl projekta „Žiwa kuzłarska křinja serbskich bajkow a bajow“. Kamishibai je forma dźiwadła z papjerjanymi figurami na „kašćikojtym jewišću“.
