Na wopory spominać
Budyšin. Zjednoćenstwo za přesćěhanych nacistiskeho režima – Zwjazk antifašistow z. t. Budyšin je wobzamknyło, swoje tradicionelne wopomnjeće 8. meje lětsa korony dla wotprajić. Zdobom pak napomina ćiše na znatych městnosćach spominać. Tak sej přeje, zo byštaj stajnje jedyn abo dwaj tam wěnc połožiłoj abo wopomnišćo z nalikami pyšiłoj. Po móžnosći měli wokomik fotografować a wobraz z mjenom fotografa a z dowolnosću, jón wozjewić, posrědkować na mejlowu adresu . Tak ma nastać rjad fotografijow pod hesłom „8. meja w Hornjej Łužicy“.
Poskićeja šulerjam podcast
Worklecy. Wyša šula „Michał Hórnik“ Worklecy wusyła wot zašłeho pjatka nětko tydźensce swójski podcast. Wučerjo měrja so ze swojim poskitkom předewšěm na swojich šulerjow, ale tež na wšitkich, kotřiž so za njón zajimuja. Serbsce a němsce podawaja jim pokiwy za wuknjenje a sportowanje. Hdys a hdys chcedźa šulerjow tež z małej wosebitostku překwapić. Pod hodźi so podcast wotwołać.
Sadowcy sadźeli
Połčnica (SN). Na ležownosći centruma seniorow w Połčnicy su Łužiske kliniki 12 sadowcow sadźili. Cyle wědomje wuzwolene su družiny, kiž su we Łužicy hižo přez lěta zadomjene a kotrež su wuměnjenjam klimy přiměrjene. Sadowcy narunaja tam mjeztym chore abo stare štomy. Hižo w februaru běchu započeli pódu přihotować. „Naš zaměr je dalše štomy sadźeć, zo by nastał charakter sadowcoweje łuki“, rozjasni jednaćel zapadołužiskeje towaršnosće hladarnjow a krótkohladanja Reiner E. Rogowski. „Sadowcy tyja biodiwersifikaciji, domjacemu swětej ptačkow kaž tež škitej insektow.
Pućowanja wotprajene
Kurs zajimcam wuměłstwa
Budyšin (SN). W Budyskim Kamjentnym domje zahaja jutře, 4. meje, kurs na temu wuměłstwo medijow. Pod hesłom „Powědaj wo sebi z wobrazom a zwukom“ móža zajimcy wotpowědnu app animěrować a swójske powědančko ze šmóratkom abo tabletom na kreatiwne wašnje zwoprawdźić. Tak woni mjez druhim wuknu sej powědančko wumyslić a je z jednorymi srědkami w animaciskim filmje wuměłsce realizować. Dale móža fotografowanje a animaciju zwjazać a widejo z hudźbu a soundefektami kombinować. Předznajomosće za to trěbne njejsu. Online-konferenca je stajnje wutoru mjez 16 a 18.30 hodź. Dalše informacije a přizjewjenje pod
Wjes čistu dźeržeć
Wjacore dróhi zawrjene
Budyšin. Twarskich dźěłow dla su w Budyskim wokrjesu wjacore dróhi zaraćene. Tak je puć z Kulowa do Hózka a z Rachlowa do Hózka hač do 7. meje zawrjeny, kaž wokrjes informuje. Wot póndźele budźetej dróze mjez Smjerdźacej a Debricami kaž tež mjez Šunowom a Tradowom přepołoženja płunowoda dla zaraćenej.
NSLDź zahaji předpředań
Budyšin. Němsko-Serbske ludowe dźiwadło zahaji jutře, 1. meje, w 11 hodź. předpředań za lětuše lětnje dźiwadło „Sherlock Holmes – Paski Beatlesow“. Kartki pak móža sej zajimcy jenož telefonisce abo z mejlku skazać.
Žadanja za pomocnikow
Wobchod wotewrjeny
Pančicy-Kukow. Wobchod w klóštrje Marijna hwězda w Pančicach-Kukowje je najebać wobmjezowanja korony dla wotewrjeny. Přičina, zo smědźa kupcam swoje poskitki poručić, je, zo maja tam mjez druhim wulki wuběr knihow. Zajimcy móža sej kupić tež wudaća Ludoweho nakładnistwa Domowina. Časy wotewrjenja su po zwučenym wašnju wot póndźele do pjatka wot 10 do 16.30 a sobotu wot 12.30 do 16 hodź. Nakupować móža zajimcy tež po principje click & collect a skazane produkty sej w dorěčanym času we wobchodźe wotewzać.
Předewzaća online zeznać
Budyšin. Přewšo wuspěšny tydźeń wotewrjenych předewzaćow Sakskeje pod hesłom „SCHAU REIN!“, ma so lětsa digitalnje přewjesć. Tež w Budyskim wokrjesu so na to přihotuja. Zajimowani šulerjo móža so pod z kompetentnymi partnerami rozmołwjeć. W planowanym tydźenju zarjadowanjow wot 21. do 26. junija móža so młodostni z digitalnymi poskitkami wo powołanjach zaběrać a informacije wo móžnych powołanskich polach zběrać. W lěću maja so wotměć praktiki. Organizatorojo chcedźa zawody, kotrež tajke poskića, na platformje wozjewić.
Rostliny měnjeć
Přijimuja hałzy
Njebjelčicy. Dokelž so lětsa žane chodojtypalenje njewotměje, skići Njebjelčanska gmejna swojim wobydlerjam wosebity serwis. Zajimcy móža suche hałzy hač do přeměra dźesać centimetrow w Njebjelčanskim twarskim zawodźe wotbyć. Prěnja składnosć je jutře, sobotu, wot 8 do 15 hodź. Dalšu tajku předwidźa pjatk, 30. apryla, wot 12 do 18 hodź.
Ideje bórze zapodać
Kamjenc. Za hospodarskej lěće 2021 a 2022 přewostaji město Kamjenc stajnje po 9 000 eurach jako wobydlerski etat. Z nim spěchuja wobydlerski angažement a socialnu zhromadnosć w měsće samym a w jeho dźělach. Hišće hač do 30. apryla móža wobydlerjo, towarstwa a iniciatiwy swoje namjety a ideje zapodać, a to najlěpje z mejlku pod . Maksimalnje hodźi so 2 000 eurow spěchować.
Na serbsko-němsku namšu
Kórjeń. Přichodna serbsko-němska namša wotměje so njedźelu, 25. apryla, w 10 hodź. w Kórjenju (Kahren) pola Choćebuza. Liturgiski nawod změjetej wosadna fararka Reinhild Magirius a serbska dušepastyrka Katharina Huglarjowa. Po kemšach budźe mały zhromadny kofej pod hołym njebjom.
Poradźuje po telefonje
Wopominaja M. Rostoka
Huska. Hušćanska wosada wopomina jutře, srjedu, wučerja Michała Rostoka składnostnje jeho 200. narodnin. W 17 hodź. zahaji so nyšpor w cyrkwi. Přizamknje so postrowna hodźina z krótkimi přinoškami wo Rostoku. Swjatočnosć zakónči so na kěrchowje při wobnowjenym rowje Rostoka. Michał Rostok narodźi so w lěće 1821 w Bělšecach. Wot 1837 do 1841 wopyta Krajnostawski wučerski seminar w Budyšinje. Skutkowaše štyri lětdźesatki jako wučer w Drječinje. Wón wuwiwaše serbsku přirodowědomostnu terminologiju a běše insektowy slědźer europskeho wuznama. Rostok wumrě 1893 w Husce. 1997 postaji jemu Maćica Serbska nowy narowny pomnik na Hušćanskim kěrchowje.
Diskutuja online
Radźićeljo so schadźuja
Lejno. Přichodna zjawna zhromadźizna zarjadniskeho zwjazka Při Klóšterskej wodźe je jutře, 20. apryla, w 19 hodź. w Lejnjanskim hosćencu. Mjez druhim póńdźe tam wo lětuši hospodarski plan a wo analyzu trěbneje płoniny za twar bydlenskich domow.
Přeja sej kontejnery
Łaz (AK/SN). Wjace wotpadkowych kontejnerow za škleńcu a papjeru přeja sej wobydlerjo we Łazowskej gmejnje. Kaž na posedźenju gmejnskeje rady rěkaše, je so gmejna tohodla pola wokrjesa naprašowała, njeje pak dotal žanu wotmołwu dóstała.
Za test so přizjewić trjeba njeje
Budyšin. Hdźež w Budyskim wokrjesu mobilne teamy testowanje na koronu přewjedu, njeje hižo trjeba so do toho online přizjewić. Kaž wokrjes zdźěli, njeje so to w praksy jako kmane wopokazało. Test je nětko potajkim bjez přizjewjenja móžny.
