Jan Chlebníček njeboh
Budyšin. Wjelelětny dirigent a nawoda orchestra Serbskeho ludoweho ansambla Jan Chlebníček je předwčerawšim w starobje 86 lět w Budyšinje zemrěł. Wot lěta 1969 do 1981 kaž tež wot 1989 do 2006 bě wón za wuměłske wukony ćělesa zamołwity. Nimo toho skutkowaše jako komponist a jako slědźer na polu serbskeje ludoweje hudźby.
Pytaja elewki a elewow
Budyšin. Činohrajne studijo při NSLDź pyta elewki a elewow za nowu hrajnu dobu 2022/2023. Přeprošeni su młodźi ludźo w starobje wot 18 lět, kotřiž so za powołanje dźiwadźelnika abo dalše dźiwadłowe powołanje kaž na přikład režiser, dramaturg, dźiwadłowy pedagoga atd. zajimuja a kotřiž wobknježa hornjo- abo delnjoserbšćinu. Přizjewjeć móža so zajimcy hač do 25. junija.
Dalše smjertne pady korony dla
Budyšin. Za cyłu Němsku je Roberta Kochowy institut dźensa w zwisku z koronu 164 smjertnych padow mjenował. Jedyn z toho je z Budyskeho wokrjesa. Po 161 dalšich natyknjenjach z wirusom je tam aktualna incidenca po RKI 243,6. Wo 114 infekcijach a 6. meje zemrětej wosobje Zhorjelski wokrjes wčera informowaše. Tu je incidenca po RKI dźensa 157,2.
Po wohenju do chorownje
Brětnja. K hašenju wohenja w kuchni su předwčerawšim 26 wobornikow do Brětnje wołali. 83lětna žona bě butru zeškrěła a potom na hornc zabyła. Płomjenja rozpřestrěchu so hač pod třěchu, wobornicy pak je spěšnje zhašachu. Rentnarku a jeje 81lětneho mandźelskeho dowjezechu do chorownje.
Budyšin (SN/MWj). Wulke wjeselo knježeše tele dny w zarjedźe za hospodarstwo, kulturu, nowinarske a zjawnostne dźěło Budyskeho měšćanskeho zarjadnistwa, jako tam spěchowanska zdźělenka we wobjimje 400 000 eurow dóńdźe. Srědki pochadźeja z hornca za strukturnu změnu. Předwidźane su pjenjezy za cityjowy management, kiž je w minjenymaj lětomaj wotpočował. Próstwu su hižo loni přez zwjazkowy program STARK zapodali. Mjeztym bu wona za dobu wot 1. septembra 2022 hač do 31. awgusta 2026 z opciju na dalše štyri lěta přizwolena. K spěchowanju 400 000 eurow ma město Budyšin swójski podźěl dźesać procentow přidać. Wobjima spěchowanja dla tuchwilu cyłoeuropske wupisanje za naprawu přihotuja, rěka w nowinskim wozjewjenju města.
Přez cityjowy management ma so město Budyšin jako dźělny wyši centrum a wikowanske stejnišćo skrućić a wutwarić. Wosebje ma cityjowy management strategiske naprawy k dalewuwiću nutřkowneho města zwoprawdźić a w tutym wobłuku mjez druhim zjawnostne dźěło wukonjeć, zetkanja akterow organizować a wikowanje a turizm doprědka ćěrić.
Budyšin (CS/SN). We wobłuku oficialneho přepodaća knižneje telefonoweje budki při wysokodomje w Budyskej Allendowej štwórći su so tele dny hłownym iniciatoram a sponsoram dźakowali. Mjez druhim běchu to Kirsten Schönherr z Budyskeje wobdźělenskeje a wobhospodarjenskeje towaršnosće (BBB), Dietmar Stange z turistiskeho towarstwa, kandidatka za wólby wyšeje měšćanostki Andrea Kubank a dalši. Nimo toho móžachu sej zajimcy wobydlerske zetkanišćo na Allendowej 49 wobhladać. Wopytowarjo so wočiwidnje wjeselachu, „zo je w sydlišću skónčnje zaso raz žiwjenje“. Zaměr je, generacije zwjazać a ludźi pohnuwać, štyri sćěny swojeho bydlenja wopušćić a z druhimi ludźimi kontakty nawjazać.
Njeswačidło. Prěni lětuši koncert w Njeswačanskim hrodźe wotměje so njedźelu, 15. meje, w 15 hodź. Zaklinča filmowa hudźba a šansony 1920- do 1940tych lět. Kapała „Štyri capriole“ kaž tež Njeswačanske domizniske a kulturne towarstwo wjeselitej so na mnohich wopytowarjow. W Małej galeriji wustaja Budyšan Andreas Rochor swoje mólby.
Ludowe wuměłstwo widźeć
Dešno. K mjezynarodnemu muzejowemu dnjej njedźelu, 15. meje, wotewru w 16 hodź. w Dešnjanskim domizniskim muzeju nowu wosebitu wustajeńcu. Ekspozicija „Ludowe wuměłstwo w NDR“ prezentuje wysoku kwalitu wuměłskich dźěłow a mnohe fakty k stawiznam kaž tež wuwiću wuměłskeho ludoweho tworjenja z něhdyšeho wobwoda Choćebuz. Wo hudźbne wobrubjenje stara so skupina „Drjewjanki“.
Njeswačidło (JK/SN). Biosferowy rezerwat Hornjołužiska hola a haty ma so rozšěrić. Gmejnje Radwor a Njeswačidło matej z tym móžnosć, so zdźěla přidružić teritorijej připóznateje a wosebiteje škitaneje kónčiny Hornjeje Łužicy. To přinjese komunam tójšto lěpšinow, ale wužada sej wosebje wot ratarjow wjace zamołwitosće a wyše naroki. Runje te pak wjedu tučasnje k tomu, zo njeje jednotne postupowanje widźomne, štož by polěkowało wotpohladanemu přistupej k rezerwatej.
Grodk (JoS/SN). „Lokalna akciska skupina kraj Sprjewje a Nysy“ (LAG) je nadawkidawar wustajeńcy „Muzejowe wukładne wokno“, zhromadneje přehladki łužiskich domizniskich stwow a muzejow. Dotal bě wona w foyeru krajnoradneho zarjada w Baršću widźeć. Do njeho pak wopytowarjo wustajeńcy dla skerje njechodźa. Tohodla poda so wustajeńca nětko na pućowanje a so z tym woprawdźitej zjawnosći prezentuje.
Raduš (PBe/SN). Wona hodźi so jenož ćežko wopisować, dokelž wupada stajnje hinak – wotwisnje wot toho, z kotreho směra wětřik duje. Tuta wšelakorosć, tuta potajnosć wučinja bytosć postawy, kotruž bě Lipšćanska wuměłča Nadine Prange stworiła a kotraž hodźi so optisce idealnje do Błótow. Wona steji wot najnowšeho w Radušanskej cerje (Radduscher Kahnfahrt), we wodźiznje, kotraž zwjazuje Raduš ze syću groblow w Błótach. Sta dowolnikow móže ju nětko wobdźiwać. Postawa „Melusine“ saha wjace hač tři metry z wody. Wona nasta po srjedźowěkowskej powědce, po kotrejž wostanjetej žiwjenje a lubosć stajnje wulke njedowuslědźene potajnstwo.
Wojuja wo wjace mzdy
Wjazońca. Sobudźěłaćerjo předewzaća Capron we Wjazońcy wojuja wo moderne a načasne tarifowe zrěčenje. Mjeztym je zawodna tarifowa komisija swoje žadanja nawodnistwu zawoda přepodała. Přistajeni chcedźa na přikład tarifowe zrěčenje sakskeje metaloweje a elektroindustrije w stejnišću zwoprawdźić. Prěni jednanski termin budźe 24. meje.
Wo samopostajowanju Serbow
Mladá Boleslav. Wosebita pućowanska wustajeńca Serbskeho instituta (SI) „Swoboda kiwa“ je wotnětka w statnym wokrjesnym archiwje čěskeho města Mladá Boleslav přistupna. We wobłuku wčerawšeje wernisaže je stawiznarka SI dr. Jana Piňosová hosći po přehladce wjedła. Centralna tema wustajeńcy je „narodne prócowanje wo samopostajowanje Serbow mjez swětowymaj wójnomaj“.
Dale lochce znižene hódnoty