Ludowy dom chcedźa 2028 zaso wočinić
Běła Woda (AK/SN). Před lětom při wulkim wohenju mócnje wobškodźeny Běłowodźanski Ludowy dom chcedźa 2028 za kulturne žiwjenje města zaso wočinić. „Tole je naš zaměr k 100. róčnicy domu“, rjekny předwčerawšim wyši měšćanosta Torsten Pötzsch (Klartext). Hromadźe z wobydlerjemi wotkry wón informacisku taflu, kotraž dopomina němsce, pólsce a čěsce na architekta twarjenja Emila Langu (1884– 1968). Z tym rozšěrja město swoju škleńčersku šćežku, z kotrejž hódnoća historiske městna kaž bywše škleńčernje abo prěni lodowy stadion. Tafla při Ludowym domje je mjeztym dźesata tajkeho razu w Běłej Wodźe.
Tež lěto po wohenju, kotryž je dźěl twarjenja ze swjedźenskej žurlu dospołnje zničił, prócuje so město juristisce wo zarunanje škody přez zawěsćernju. Runočasnje zestajeja wužiwanski koncept, zo móhli snano w septembru próstwu wo spěchowanske srědki za nowonatwar Ludoweho domu zapodać, informowaše twarska nawodnica města Dorit Baumeister.
Radźićeljo wuradźuja
Róžant. Přichodne posedźenje gmejnskeje rady Ralbicy-Róžant wotměje so jutře, štwórtk, we 18.30 hodź. w Róžeńčanskim gmejnskim zarjadnistwje. Mjez druhim zaběraja so radźićeljo z hospodarskim planom za lěto 2022. Nimo toho steja dodatne wustawki „Konjecy – zapadny dźěl“ na dnjowym porjedźe posedźenja.
Njebjelčicy. Tohorunja jutře, ale hakle w 19.30 hodź. zetkaja so čłonojo Njebjelčanskeje gmejnskeje rady k swojemu wuradźowanju w gmejnskim zarjadnistwje. Woni rozjimaja mjez druhim Leaderowu wuwićowu strategiju za dobu wot 2023 do 2027 a wotzamknu wotnajenske zrěčenje za solarnu připrawu. Nimo toho wobjednaja Njebjelčanscy radźićeljo tež swój hospodarski plan za 2022. Na wobě posedźeni su zajimcy witani.
Fit w starobje
Policija (27.04.22)
Mało rubizny, wjele škody
Wojerecy. Domčki w zahrodkownišćach su stajnje zaso woblubowane cile paduchow. Zwjetša pak namakaja tam mało, štož móža pokradnyć. Ćim wjetša je wěcna škoda, kaž najnowši pad z Wojerec pokaza. Tam běchu so njeznaći w nocy na póndźelu hnydom do 14 domčkow w zahrodkownišću na Hasy Liselotty Herrmann zadobyli. Pokradnyli su kabl, truhanski nóž, špihel, točensku mašinu a cigarety w cyłkownej hódnoće 350 eurow. Wěcnu škodu pak trochuje policija na něhdźe 3 900 eurow. Policija pad dale přepytuje.
Změny we wołtarnišću
Architekt koncept nutřkowneho wobnowjenja cyrkwje předstajił
Chrósćicy (SN/MWj). Hač do kermuše 2023 ma Chróšćanska cyrkej nutřkownje wobnowjena być. Tole zdźěli architekt Marko Dźisławk minjenu njedźelu na hudźbnym nyšporu, jako wón koncept ponowjenja tójšto zajimowanym připosłucharjam předstaji. Twarske dźěła chcedźa lětsa w awgusće zahajić.
Najwjetše změny připowědźi wón we wołtarnišću. Te chcedźa dospołnje wo jedyn schodźenk znižić, zo by wone tež ludźom z handicapom přistupne było. Tuchwilne wołtarne blido ma so na swoje historiske městno před wysokim wołtarjom wróćić. Tuž budźe trěbne nowe wołtarne blido, kotrež ma bliže ke kemšerjam stać, takrjec jako wuraz zbliženja cyrkwje a wosady, kaž architekt rozłoži. Runočasnje maja nowe městna za měšnika, za ministrantow a za ambo nastać.
Zwěsćeja hnězdźace ptački
Njeswačidło (SN/MWj). Štwórte kartěrowanje hnězdźacych ptačkow po wšej Sakskej su w minjenych dnjach zahajili. Je to zhromadny projekt ornitologiskich fachowych zwjazkow swobodneho stata. Akcija traje hač do lěta 2024. Za to su Saksku na płoniny we wulkosći 32 kwadratnych kilometrow rozdźělili. Na nich registruja wšitke družiny hnězdźacych ptačkow a tohorunja zwěsća, kak často so jednotliwe družiny jewja. Tele dźěło na polach, łukach, při wodźiznach kaž tež w sydlišćach wobstaraja čestnohamtscy ornitologojo. Nazběrane daty přirunuja z wuslědkami zašłych třoch kartěrowanjow hnězdźacych ptačkow. Na te wašnje zwěsća wuwića a trendy wobstatka a zapřijeja je do přichodnych planowanjow a projektow we wobłuku mnohotnosće družin a škita ptačkow.
Jedne z kapłanskich bydlenjow na Chróšćanskej farje tuchwilu tak ...
Štyrjo kandidaća so požadaja
Zhorjelc (AK/SN). W Zhorjelskim wokrjesu je štyrjoch kandidatow, kotřiž so 12. junija na wólbach noweho krajneho rady wo zastojnstwo požadaja. Wo tym tež Serbske Nowiny informowachu. „Ličimy z wjace hač 200 000 wólbokmanymi“, zdźěli nowinska rěčnica wokrjesa Julia Bjar.
Za FDP nastupi Kristin Schütz ze Zhorjelca. Wona je so w lěće 1975 narodźiła a wukonja powołanje diplomoweje zarjadniskeje hospodarki. Wot lěta 2012 je wona w prawniskim wobłuku Zhorjelskeho joboweho centruma zasadźena.
Dr. Stephan Meyer z Oderwitza je kandidat CDU. Wot lěta 2009 je 40lětny diplomowy inženjer za hospodarstwo zapósłanc Sakskeho krajneho sejma. Za stronu AfD kandiduje Sebastian Wippel ze Zhorjelca. Wyši komisar policije je wot lěta 2014 zapósłanc Sakskeho krajneho sejma a mjeztym hižo tři lěta Zhorjelski měšćanski radźićel. K wólbam wyšeho měšćanosty w lěće 2019 je w prěnim wólbnym kole dobył, podleža pak we wušich wólbach přećiwo kandidatej CDU Octavianej Ursu.
Towaršnosć za město wažna
Podobnje kaž w druhich městach su tež we Wojerecach wažne zarjadnišća pod jednej třěchu zjednoćene.
Wojerecy (AK/SN). Měšćanska zwěrjencowa, kulturna a kubłanska towaršnosć Wojerecy je njeparujomna za identitu města. Wot časa załoženja je so wona kruće etablěrowała a solidnje hospodariła. Tole rjekny jednaćel Arthur Kusber na wčerawšim posedźenju Wojerowskeje měšćanskeje rady. „W lěće 2020 mějachmy wjace hač milion eurow wobrota. Bilancna suma rozrosće w času wot 2011 do 2020 wo 45 procentow. Tuchwilu mamy 81 přistajenych“, wón zdźěli.
Krótkopowěsće (27.04.22)
Podwojene přiražki předwidźane
Berlin. W dotal předležacym naćisku zwjazkoweho etata 2022 je skónčnje zwyšenje přiražkow za Berlinski mjeńšinowy sekretariat štyrjoch awtochtonych narodnych mjeńšin w Němskej wo 98 000 eurow předwidźane. To je nimale podwojenje dotalnych srědkow, kaž rozprawješe póndźelu Stefan Seidler, zapósłanc Južnoschleswigskeho wolerskeho zwjazka w zwjazkowym sejmje.
Incidenca tróšku niša hač wčera
Budyšin. Pandemija přetrata njeje. Incidenca po Roberta Kochowym instituće je dźensa w Budyskim wokrjesu z 538,6 a w Zhorjelskim ze 419,1 tróšku niša hač wčera. RKI je za wokrjes Budyšin dale 405 natyknjenjow z koronawirusom a smjertny pad podał. Wo 296 dalšich zwěsćenych infekcijach, mjez nimi je 23 dźěći, a štyrjoch zemrětych z doby 1. do 13. apryla je wokrjes Zhorjelc wčera rozprawjał.
Nalětnje schadźowanje OLGW
