Wjace škody hač rubizny
Wojerecy. Tójšto škody načinili su njeznaći w času wot póndźele popołdnja do wutory dopołdnja we Wojerowskim zahrodkownišću na Brězowym puću. Tam zadobychu so do sydom twarjenjow. Pokradnyli su kable a pisany metal. Łamachu zamk duri, při tym nasta něhdźe 10 000 eurow wěcneje škody. Rubizna bě po informacijach policije 500 eurow hódna.
Njebjelčicy. Zo njebychu hromady chodojtypalenja lětsa přewulke byli, poskićuje Njebjelčanska gmejna zaso wosebity serwis. Wobydlerjo móža swoje wurězane hałzy z přeměrom hač do dźesać centimetrow sobotu, 9. apryla, wot 9 do 15 hodź. na dwór komunalneho twarskeho zawoda přiwjezć. Tam je roztřěskaja a za komunalne zaměry dale wužiwaja.
Poradźuje darmotnje
Budyšin. Prawiznik Hajko Kozel poskići póndźelu, 11. apryla, wot 15 do 16.30 hodź. dalši raz darmotne socialne poradźowanje. Tematiskej ćežišći budźetej aktualne dźěło- a socialnoprawniske wuskutki koronapandemije. Tola tež dalšim wobłukam chce so Kozel wěnować, maja-li zajimcy hinaše prašenja. Poradźowanje hodźi so tohorunja w ruskej a ukrainskej rěči přewjesć a wotměje so we wobydlerskim běrowje Lěwicy na Šulerskej w Budyšinje. Zajimcy njech přizjewja so pod telefonowym čisłom 035932/ 363727.
Wojerecy (KD/SN). Při nowej Wojerowskej wyšej šuli je mjeztym něšto dnjow ćežka technika zasadźena. Tam nastanje trojopólna sportowa hala, kotruž budu šulerjo za šulski sport runje tak wužiwać kaž sportowe towarstwa. Hala změje 300 přihladowarskich městnow a parkowanišćo, tak zo so wona tež za wjetše sportowe zarjadowanja hodźi, rozłoži wyši měšćanosta Torsten Ruban-Zeh (SPD) předwčerawšim při symboliskim prěnim zarywje. Tajku wulku halu z přihladowarskimi městnami město dotal nima. Arena VBH nima žanu tribunu a hala powołanskeho šulskeho centruma „Konrad Zuse“ słuša Budyskemu wokrjesej. „Za Wojerecy budźe to zawěsće zajimawe městno“, rjekny Ruban-Zeh. Wojerecy inwestuja do twara wosom milionow eurow. Z toho financuja 5,4 miliony eurow ze spěchowanskimi srědkami Zwjazka a Swobodneho stata Sakskeje.
Budyšin (CS/SN). Hač do 8. meje wotměja so w Budyšinje, Kamjencu a Wojerecach žónske akciske tydźenje. Wone maja mnohotnosć žiwjenja a angažement žonow w regionje wotbłyšćować. W srjedźišću njedawneho wuchodźowanja po Budyšinje steješe skutkowanje žonow w zašłosći sprjewineho města. Pod hesłom „Rěče hódne“ předstaji wodźerka po měsće Anja Weise 15 wobdźělnikam někotre wuznamne wosobiny města, mjez druhim Marju Grólmusec.
Wodźerka wobžarowaše, zo su w Budyšinje dróhi a naměsta jenož mało žonam wěnowane. Pola Marje Grólmusec tomu na zbožo tak je. Hnydom na róžku Grólmusowa/Hornčerska je tež wopomnjenska tafla za serbsku prócowarku připrawjena. Z njeje wučitaš, zo je Marja Grólmusec za SPD tajnje dźěłała a zo je 1944 w koncentraciskim lěhwje Ravensbrück zemrěła. Přidatnje k 1950 přičinjenej tafli při nadróžnym mjenje je krajna žónska rada 2021 při dźěłarniskim domje dalšu wopomnjensku taflu we wobłuku projekta „Žónske městna Sakskeje“ připrawiła.
Smječkecy (SN/MWj). Runjewon strach wo žiwjenje zawinuja tuchwilu slědy wjesnych stawiznow w Smječkecach. A to nic w formje stareje municije abo hinašeje hrózbneje namakanki, štož by snano na Druhu swětowu wójnu pokazało. Stawizny najnowšich slědow sahaja wo wjele dale wróćo.
Na dźeń wotewrjenych duri
Budyšin. Koronapandemije dla přetorhnjenu tradiciju dnja wotewrjenych duri w domje Měrćina Nowaka Njechorńskeho Domowinska župa „Jan Arnošt Smoler“ Budyšin lětsa 9. julija dale wjedźe. Župne předsydstwo je na wčerawšim wuradźowanju termin wobkrućiło a wšitke župy a towarstwa na wopyt do Njechornja přeprosyło.
Niwow lědma změnjeny
Budyšin. Roberta Kochowy institut (RKI) je za Budyski wokrjes dźensa incidencu 925,1, 856 natyknjenjow z koronawirusom a dwaj smjertnej padaj wozjewił. Aktualna incidenca we wokrjesu Zhorjelc je po RKI 802,2. Wokrjes bě wčera wo 457 infekcijach, mjez nimi je 73 dźěći, a wo třoch w zwisku z koronu zemrětych pacientach z doby 24. a 25. měrca rozprawjał. Budyski strowotniski zarjad je zastał, kontakty pozitiwnje testowanych telefonisce slědować.
Čěske pancery za Ukrainu
Wot lěta 1994 je Norbert Wolf wjesnjanosta w Bukecach. K lětušim wólbam pak po swědomitym přemyslowanju a po wobšěrnych rozmołwach ze swójbu, z přećelemi a wobchodnikami wjace njenastupi.
Přičiny za tutón puć, za kotryž je so jenož z ćežkej wutrobu rozsudźić móhł, su so w zašłymaj lětomaj wukristalizowali. Wuwiće někotrych ludźi w dźěłowej wokolinje wjesnjanosty je jeho jara zadźiwało. Tute wuwiće drje zdźěla z wukazanymi naprawami korony dla zwisuje, tak Norbert Wolf tuka. Tohodla su so wobstejnosće wuwili, kiž dalše wuwiće gmejny haća a kotrež wón jako wjesnjanosta z čistym swědomjom zastupować njemóže.
Płoniny za twarjenje zarjadowali
Altenhain. Serbska ludowa wuměłča Sigrun Nazdalina z Wojerec je njedawno wo serbskich jutrownych nałožkach w Altenhainje pola Grimma na přeprošenje tamnišeje wosady porěčała. W domizniskim domje rozłoži wona 30 zajimcam serbsku rěč a drastu wšelakich regionow kaž tež chodźenje po jutrownu wodu, jutrowne spěwanje a debjenje jejkow. W debjenju móžachu so wobdźělnicy dojutrowneho popołdnja tohorunja sami pospytać. Wjacori wopytowarjo zwuraznichu přeće, tajke popołdnjo klětu wospjetować.
Porěči wo přełožowanju
Budyšin. Wšelake móžnosće přełožowanja ze serbšćiny a do njeje z pomocu digitalnych srědkow a pomocnikow steja w srjedźišću interaktiwneho zarjadowanja z Julianom Nyču jutře, štwórtk, wot 19 hodź. na internetnym portalu . Přednošowar mjez druhim rozkładźe, kak móža zajimcy program „Sotra“ a dalše programy w Microsoft za swoje přełožki wužiwać. Nimo toho poskići Julian Nyča dohlad do technologije awtomatiskeho přełožowanja a na čim so aktualnje dźěła. Wón tež wě, kak je scyła k tomu dóšło, zo móže Microsoft nětko tež serbsce.
Rozestajenje na puću
Budyšin. Při Cyhelskim nasypje w Budyšinje je minjenu sobotu k rozestajenju mjez mužomaj dóšło. Wobaj dyrbještaj z awtom při ampli čakać. Šofer Hyundaja wulěze a so ze šrubowym klučom w ruce do 46lětneho ukrainskeho wodźerja VWja, kiž za nim steješe, da. Štyrjo swědkojo, kotřiž běchu scenu wobkedźbowali, njemdreju mužow dźělachu. Kaž policija rozprawja, jedna so při podhladnym wo 69lětneho ruskeho staćana. Čehodla bě so wón do tamneho dał a so z nim rozestajał, policija nětko přepytuje. Na zbožo njeje so nichtó z wobdźělenych wosobow zranił.