Přichod za stary hosćenc
Něhdy woblubowany hosćenc na kromje Wulkeje Dubrawy budźe saněrowany. Tomu je tamniša gmejnska rada njedawno přihłosowała, byrnjež jedna naležnosć problematiska była.
Wulka Dubrawa (UM/SN). Hosćenc „Lěsny hrodźik“ na kromje Wulkeje Dubrawy budźe přichodny čas wobšěrnje saněrowany. Twarskej próstwje su čłonojo Wulkodubrawskeje gmejnskeje rady na swojim zašłym posedźenju přihłosowali. Wo doskónčnym přizwolenju wšak rozsudźi Budyski krajnoradny zarjad.
Kaž z předłohi wobzamknjenja wuchadźa, ma so „Lěsny hrodźik“ přichodnje zaso jako hosćenc a přenocowanska městnosć wužiwać. Wonkownje so na twarjenju wjele njezměni. Jeničce do sewjerneho směra je powjetšenje planowane. Dale předwidźane su wjacore nowe terasy kaž tež nowy zachod, kotryž budu tež ludźo z handicapom wužiwać móc. Na wuchodnym a zapadnym dźělu wokrjesneje dróhi do směra na Radwor, kotraž nimo twarjenja wjedźe, maja parkowanske městna nastać.
Wobšudnicy z nowym wašnjom
Budyšin (SN/MWj). W Budyskim a Zhorjelskim wokrjesu jewja so wot januara tohole lěta pady wobšudnistwa, za kotrež skućićeljo nowe wašnje nałožuja. Před tym policija wuraznje warnuje, a to nic jeno staršich ludźi. Nowe wašnje funguje tak, zo wobšudnicy kontakt k swojim woporam přez WhatsApp nawjazuja. Woni wudawaja so jako syn abo dźowka a rozprawjeja, zo su swoje šmóratko zhubili abo zo je wone skóncowane. Tohodla so z cuzym čisłom přizjewjeja. Na to proša wo to, zo bychu jim přiwuzni wěstu sumu pjenjez přepokazali, dokelž to sami bjez šmóratka činić njemóža. Wobšudnicy posrědkuja kontowe daty, kotrež pochadźeja stajnje z wukraja, a žadaja sej wjacore sta abo samo wjacore tysacy eurow.
Planuja ekologisku milinarnju
Gmejnscy radźićeljo chcedźa zwuraznjenje wotpohlada podpisać
Slepo (AK/SN). Ekologiska milinarnja ma na płoninach Rownjanskeho lěsniskeho zawoda w Slepjanskej gmejnje nastać. Wobstać ma wona z 30 milinowych wětrnikow, z drjewo-energijoweho zawoda a z twornje za składowaki ćopłoty. Tomu je so wjetšina Slepjanskeje gmejnskeje rady předwčerawšim wuznała a wobzamknyła, tak mjenowanu deklaraciju wotpohlada podpisać.
Dotalny wjesnjanosta znowa nastupi
Njeswačidło (JK/SN). Njeswačanska skupina CDU nominowaše wčera wječor w tamnišim Knježim hosćencu swojeho kandidata k wólbam wjesnjanosty 12. junija. Je to dotalny wjesnjanosta Gerd Schuster, kiž zastojnstwo hižo wot lěta 2001 wukonja. Tehdy bě nastupił jako kandidat-jednotliwc a je so do dźěła jako prěni muž gmejny derje zanurił. K naslědnym wólbam nastupi na to stajnje jako kandidat strony CDU. Nětko po třoch legislaturnych dobach ma přeco hišće lóšt a wolu, gmejnske zarjadnistwo dale nawjedować. Sam wón wo sebi a swojim dźěle praji: „Mam hišće něšto činić a dołhož mi to wjeselo wobradźa, chcu w gmejnje na dobro wobydlerjow skutkować, byrnjež dźeń a ćešo było.“ Tak skedźbnja na tuchwilnu napjatu situacijow mnohich komunow, stejacych před nadawkami, kotrež hodźa so jeno zdźěla abo z wjele dźěłom zwoprawdźić. Tu jemu wjesna skupina CDU rjap skruća, powołujo jeho tuž jako spušćomneho wojowarja znowa za kandidata.
Pakuja za ukrainskich přećelow
We wjacezaměrowej hali na Budyskim Třělnišću witachu wčera ...
Ma kampanju serbskeje rěčeza utopisku
Dźěłowy kruh za serbske naležnosće města Budyšina je so wčera schadźował. Mjez druhim su wo tym wuradźowali, kak předewzaćelow najlěpje animěruješ, zo napisy na swojich wobchodach dwurěčne wuhotuja.
Budyšin (SN/CoR). Jako noweho čłona dźěłoweho kruha witaše předsyda gremija Benjamin Wirth wčera Roberta Krawca jako naslědnika Jana Budarja, jako hosća nowu nawodnicu Budyskeho měšćanskeho zarjada za hospodarstwo a turizm Doreen-Charlottu Hantschke, zo bychu sej wo móžnym přichodnym zhromadnym dźěle nastupajo dwurěčnosć w hospodarstwje mysle wuměnjeli. Jeje zaćišć je, zo dwurěčnosć w měsće Budyšinje hišće tak prezentna njeje, kaž by wočakowała. „Praji so, zo je Budyšin stolica Serbow. Za to pak stej tu serbska rěč a kultura lědma widźomnej. Wosebje turistow bychmy na našu jónkrótnu wosebitosć bóle skedźbnjeć móhli“, rozłoži Doreen-Charlotte Hantschke.
Krótkopowěsće (10.03.22)
Zhromadźizna hač do junija
Budyšin. Hač do 7. junija dyrbi Domowina wurjadnu hłownu zhromadźiznu přewjesć. Na to je so prezidij třěšneho zwjazka wčera dojednał. Na „hłownej“ chcedźa loni w Slepom wobzamknjene změny wustawkow po pokiwach Drježdźanskeho hamtskeho sudnistwa přiměrić, a je znowa wobzamknyć. Sudnistwo njebě jednu změnu wustawkow připóznało. Dotal su sej šěsć župow a dalše towarstwa hłownu zhromadźiznu žadali.
Za hybridno-elektriske ćěrjenje
Choćebuz. Lětarstwo chce z widom na změnu klimy z wuwićom hybridno-elektriskich ćěrjenjow wustork parnišćowych płunow pomjeńšić. Za to je Němski centrum za lětarstwo a swětnišćowe lětarstwo dźensa na stejnišću w Choćebuzu nowy institut za elektrifikowane ćěrjenje lětarstwa wotewrěł. Dotal dźěła tam 23 ludźi, předwidźanych je raz 150.
Ličba natyknjenych dźěći přiběra
Ze wšěmi wjeskami komuny sprawnje wobchadźeć
Wo zdokonjanym a wo planowanych projektach w gmejnje Hodźij do wólbow wjesnjanosty w juniju
Wjesnjanosta Hodźija (Göda) Gerald Meyer (njestronjan) ma za swój najwažniši nadawk, zawěsćić měr a harmoniju mjez wšitkimi wobydlerjemi swojeje komuny. Nimo wužadanja, ze wšěmi wjeskami gmejny sprawnje wobchadźeć, je to zdobom próca wo to, zo njedochadźa mjez němskimi a serbskimi wobydlerjemi k žanymžkuli konfliktam. Wjesnjanosta měni, zo je so to jemu w minjenej wólbnej dobje prawdźepodobnje derje zešlachćiło, a so tuž nadźija, zo tomu tež dale tak wostanje. Wšako ma to za „A a O“ hladajo na dalše bujne wuwiće komuny.
Tež w Hodźijskej změja wobydlerki a wobydlerjo 12. junija noweho wjesnjanostu abo nowu wjesnjanostku wolić. Gerald Meyer je swoju kandidaturu hižo připowědźił. Dalši kandidaća za wólby wjesnjanosty w Hodźijskej gmejnje dotal znate njejsu.
Wohnjowa wobora wažna
Policija (09.03.22)
Štom na awto padnył
Smjerdźaca. Na transporter 61lětneho muža je předwčerawšim pola Smjerdźaceje štom padnył. Na zbožo so nichtó zranił njeje. Škoda na awće wučinja něhdźe 2 000 eurow.
