Modla so wo měr
Slepo. Před pozadkom dramatiskeho wuwića konflikta we wuchodnej Ukrainje přeproša Slepjanska ewangelska wosada za jutřiši štwórtk we 18 hodź. na měrowe modlenje do Slepjanskeje cyrkwje. Naležnosć nutrnosće je, zo měli brónje mjelčeć a zo měli so wo měrliwe rozrisanje konflikta dale prócować.
Seniorojo škotowali
Radwor. Škotowarka a 19 škotowarjow je so wčera na turněrje serbskich seniorow w Radworju wobdźěliło. Z Wernerom Richterom z Budyšina a Alfonsom Budarjom z Noweje Wjeski móžachu dweju nowačkow witać. Najwuspěšniši bě Herbert Krječmar z 2 904 dypkami před Manfredom Höraufom (2 486) a Wolfgangom Kühnom (2 480).
Wobydlerjow chcedźa zapřijeć
Njewotwisne zastaranje z energiju gmejnu wulce wužaduje
Njebjelčicy (JK/SN). Studija k móžnosćam njewotwisneho a naslědneho zastaranja z energiju ma być hač do kónca lěta zakónčena. Wona je zakład a zdobom směrnica k zwoprawdźenju energijoweho koncepta Njebjelčanskeje gmejny. Hižo dźesać lět zaběraja so w njej zhromadnje z fachowcami z temu njewotwisne zastaranje z energiju.
Wčera wječor witaše Njebjelčanski wjesnjanosta Tomaš Čornak (CDU) fachowcow z wobdźělenych institucijow a mnohich zajimcow na informaciske zarjadowanje k temje energija. Zarjadowanje wotmě so tež online, tak zo mějachu mnozy składnosć, so na přewšo zajimawym a informatiwnym wječoru wobdźělić. Čornak wuzběhny we witanskich słowach wažnosć studije před pozadkom wobstajnje stupacych płaćiznow za energiju a hladajo na změnu strukturow we Łužicy. Nětko je načasu zapřijeć tež wobydlerjow do prócowanjow. Wšako chcedźa jich njewotwisnje a po dobrych kondicijach z energiju zastarać.
Jutry móhli pišćele zaso klinčeć
Wojerecy (KD/SN). Sobudźěłaćerjo Drježdźanskeje pišćeletwarskeje firmy Jehmlich ponowjeja tuchwilu pneumatiske pišćele farskeje cyrkwje Wojerowskeje katolskeje wosady Swjateje swójby. Samsny zawod bě instrument 1953 zatwarił. Jeho ponowjenje za něhdźe 50 000 eurow je posledni dźěl nutřkowneho saněrowanja Božeho domu, z čimž běchu před lětomaj pod nawodom fararja Petera Paula Gregora započeli.
W Němcach su čłonojo dobrowólneje wohnjoweje wobory a ...
Pruwuja system płaćenja miliny
Ludźom strukturnu změnu zbližić
Změna strukturow w brunicowym rewěrje je jedna z tuchwilu hłownych temow Hornjeje Łužicy. Často pak ludźo wo tym přemało wědźa. We Wojerecach zahaja tohodla nowu komunikacisku strategiju.
Wojerecy (AK/SN). Z komunikaciskej strategiju „Wojerecy w změnje“ maja ludźo strukturnu změnu w měsće a wokolinje bliže nazhonić a zrozumić. To podšmórny wyši měšćanosta Torsten Ruban-Zeh (SPD) na wčerawšim posedźenju Wojerowskeje měšćanskeje rady. Tak planuja na swětłowym dworje stareje radnicy zetkawanski centrum. W nim chcedźa wustajeńcy a rozmołwne koła přewjesć. Předewšěm šulske rjadownje a swójby móhli tónle poskitk wužiwać. W Hórnikečanskej Energijowej fabrice a w jednotliwych šulach města wotměja nimo toho diskusijne forumy za něhdźe 30 do 40 wobdźělnikow. „Chcemy so z wobydlerjemi rozmołwjeć. Tema strukturneje změny měła stajnje prezentna być. Wona ma nas wšitkich přewodźeć a měli ju zhromadnje wobjednawać“, praji wyši měšćanosta na posedźenju radźićelow.
Krótkopowěsće (23.02.22)
Incidenca dale snadniša
Budyšin. Po Roberta Kochowym instituće koronaincidenca dźensa dale woteběra a je w Budyskim wokrjesu 1 129,5, w Zhorjelskim 927,1. Budyski wokrjes informowaše wčera wo 360 natyknjenjach z wirusom a wo dalšim smjertnym padźe. Wokrjes Zhorjelc zwěsći 573 dalšich infekcijow a třoch zemrětych pacientow. 137 ludźi lěkuja w zwisku z koronu w hornjołužiskich klinikach.
Předewzaća so starosća
Choćebuz. Hladajo na konflikt mjez Ruskej a Ukrainu su předewzaća w južnej Braniborskej znjeměrnjene wuskich hospodarskich splećenjow z woběmaj krajomaj dla. „Mnohe naše čłonske zawody ze starosću na politiske wuwiće zhladuja“, rjekny Wolfgang Krüger, hłowny jednaćel IHK Choćebuz. Wobjim wuwožowanjow z Braniborskeje do Ruskeje, Ukrainy a Běłoruskeje wučinješe po jeho słowach loni 307 milionow eurow.
Připóznaće krajneho rady
Mali wobornicy camprowali
Zhromadna akcija so wudaniła
Z dalšimi gmejnami nadawk za nowe hašenske jězdźidła wupisali
Rakecy (JK/SN). Zo gmejny w najwšelakorišich wobłukach hromadźe dźěłaja, je znate a so časćišo stawa. Wosebje derje so to wuskutkuje, hdyž dźe wo wjetše inwesticije, kotrež su při wotpowědnej hódnoće z wěstymi rabatami abo lěpšimi kondicijemi zwjazane. Hižo loni su gmejny Bukecy, Kubšicy, Malešecy a Rakecy zhromadnje wupisali po cyłej Europje nadawk za dodawanje pjeć hašenskich jězdźidłow typa TLF 3000. Po cyłej Europje dyrbjachu jón wupisać, dokelž měješe nadawk wobjim wjace hač dweju milionow eurow. Tak je to zarjadnisce předpisane. Je chwilu trało, prjedy hač gmejny poskitki dóstachu.
Přeprošeja seniorow
Wojerecy. Přichodne zetkanje seniorow na Wojerowskej dźěćacej a młodźinskej farmje wotměje so wutoru, 1. měrca, w 14 hodź. Je drje to runje póstniska wutora, wobsahowje pak póńdźe wo póstny čas, kiž so nazajtra započnje. Na temu „Posćić so – zmysł a njezmysł“ posrědkuje diakon Bernhard Matko impulsy, kotrež njezaběraja so jeno z ćělnym, ale předewšěm z dušinym derjeměćom. Přizjewjenja přijimuja e-mailnje pod abo pod telefonowym čisłom 03571/ 979 164.
Poskitk kniharnje w dźiwadle
