Jeli dyrbja so wobydlerjo Slepoho a wokolnych wsow někajkeje přičiny dla testować dać, njetrjebaja hižo ekstra do Mužakowa abo Běłeje Wody. To je wulka lěpšina, wšitcy potrjecheni měnja.
Slepo (CK/SN). Darmotny spěšnotest na koronawirus móžeš nětko tež w Slepom přewjesć dać. Wjesnjanosta Jörg Funda (CDU) so nad tym wjeseli. Dotal je tajki poskitk we wsy pobrachował. Wobydlerjo Slepjanskeho regiona dyrbjachu ekstra do Mužakowa abo Běłeje Wody na testowanje jěć. Nimo toho Funda wita, zo je testowanski centrum tež njedźelu wočinjeny. Kónc tydźenja so testować dać je na přikład trjeba, hdyž chcedźa někoho w starowni wopytać abo hdyž so na nowy dźěłowy tydźeń přihotuješ.
Hospodarski plan města Budyšina zdźěłać je lěto wob lěto ćeše. Tajki plan za lětsa nastajić je wosebite wužadanje, kaž bě wčera na posedźenju tudyšeje měšćanskeje rady słyšeć.
Budyšin (SN/MWj). Financny měšćanosta Budyšina dr. Robert Böhmer měješe na wčerawšim posedźenju měšćanskeje rady nadawk, hrubje rozłožić tuchwilne połoženje města a kak chce wone spagat mjez pobrachowacymi pjenjezami a swójskimi přećemi zmištrować. Radźićeljo rozjimachu w prěnim wuradźowanju hospodarski plan 2022. Tón drje budźe jutře tema na njezjawnym posedźenju radźićelow, někotre ličby pak je dr. Böhmer hižo wčera mjenował.
Kat Austen předstaji album
Berlin. Wuslědki swojeho łužiskeho projekta předstaji zwukowa wuměłča Kat Austen dźensa w 20 hodź w Berlinje, ale tež online. Pod titulom „This Land is Not Mine“ wozjewi wona sydom spěwow na protestny album, kotrež wopřijimaja wubrane zwuki z regiona a powědaja wo zhubjenych wjeskach, wo mystiskich rěkach a wo měnjacej so kulturnej identiće.
Dźeń a wjace infekcijow
Budyšin. Budyski wokrjes je wčera 440 nowoinfekcijow z koronawirusom zwěsćił. Dwě dalšej wosobje stej zemrěłoj. Roberta Kochowy institut podawa tu dźensa incidencnu hódnotu 387,9. W Zhorjelskim wokrjesu je so wčera 435 wosobow natyknyło. Incidenca tam wučinja 445,8 po dźensnišej informaciji RKI. Štyrjo schorjeni su zemrěli.
Iniciatiwa přeproša
Njebjelčicy. Předstajenje koncepta kolesowanskeje šćežki podłu statneje dróhi S 100 wot Miłoćic do Kamjenca budźe jedna z temow zhromadźizny Njebjelčanskeje gmejnskeje rady jutře, štwórtk, w 19.30 hodź. w posedźenskej rumnosći Njebjelčanskeje gmejny. Dale zaběraja so z twarskim planom přemysłownišća Při Krabatowym kamjenju a z wobstaranjom drasty za młodźinsku wohnjowu woboru.
Chrósćicy. Tež radźićeljo gmejny Chrósćicy jutře wuradźuja, a to wot 19 hodź. w kulturnym a gmejnskim centrumje. Woni maja so rozestajeć z čestno- abo hłownohamtskej dźěławosću wjesnjanosty. Dalši dypk na jich dnjowym porjedźe budźe, rozjimać wustawki wosebiteho wužiwanja w Chróšćanskej gmejnje. Wobě posedźeni radźićelow stej zjawnej. Zajimcy su witani.
Do hale so zadobyli
Nowa Łuka. Minjeny kónc tydźenja běchu so njeznaći do hale firmy w Nowej Łuce w gmejnje Halštrowska Hola zadobyli. Tam pokradnychu mjez druhim chłódźenskej agregataj w cyłkownej hódnoće něhdźe 1 300 eurow. Nimo toho načinichu 300 eurow wěcneje škody.
Rakecy (JK/SN). Wjacore lěta je gmejna Rakecy wulki projekt, wobnowjenje Jitkowskeje dróhi, planowała a přihotowała. Loni móžachu dróhu po nimale jednym lěće twarjenja a wužadanjow za komunu a přemysłownikow podłu puća zaso swojemu zaměrej přepodać.
Na minjenym posedźenju gmejnskeje rady informowaše wjesnjanosta Swen Nowotny (CDU) radźićelow a přitomnych wo kóštach nastupajo wobnowjenje dróhi. Planowała bě gmejna z wudawkami 1,2 milionow eurow, kotrež buchu z 85 procentami spěchowali. Objektiwnych přičin dla je za čas wobnowjenja tójšto přidatnych wudawkow k tomu přišło. Na kóncu bě to 1,9 milionow eurow. Wulka bě nadźija, zo budu tež přidatne wudawki kaž kompleksne wotwodźowanje dešćikoweje wody abo kroma dróhi w połnym wobjimje spěchowane.
Radwor (chz/SN). Hižo loni kónc lěta załožichu w Radworju hromadźe z Chelnjanskej wotnožku nowy dźěćacy a młodźinski wotrjad tamnišeje wohnjoweje wobory. Wulki zajim dźěći a naprašowanja staršich běchu rozsud za to pohonjeli. Tak wudatej so hnydom dwě lěpšinje. Dźěći a młodostni maja zmysłapołnu zaběru we wólnym času, a aktiwny wotrjad wobory zaruči sej dorost do přichoda.
Zo pak móhli z wukubłanjom započeć, dyrbjachu tójšto spřihotować. Třo kameradojo dyrbjachu so na wohnjowobornej šuli w Narću wukmanić a sej trěbnu dowolnosć za dźěło z dźěćimi zdobyć. Dale zarjadowachu w Radworskej gratowni wosebitu rumnosć a wobstarachu wotpowědnu škitnu drastu kaž tež nastroje za zwučowanje w „dźěćacej wulkosći“.
Planowane je, zo dźěći a młodostni dwójce wob měsac zwučuja. Wukubłanje wopřijima teoretiske jednotki, ale tež praktiske zwučowanja, kaž kładźenje hadźicow za hašenje z wodu, wuchowanje pacientow a zašlahanje puća. K tomu přińdu wubědźowanja, při kotrychž móža so z druhimi woborami měrić. Tež zhromadne wulěty su předwidźane.
Budyšin (SN/MWj). Při naležnosćach kołowokoło jězbneje dowolnosće dochadźa w Budyskim krajnoradnym zarjedźe tuchwilu k dlěšim čakanskim časam. Kaž z nowinskeje zdźělenki wottam wuchadźa, wudźěleja nětko nowe terminy hakle za kónc meje. Wina na tym jenož njeje, zo su sobudźěłaćerjo na koronu schorjeli. Předewšěm je winowatosć k změnje starych jězbnych dowolnosćow k hotowemu nawalej na wotpowědny wotrjad krajnoradneho zarjada wjedła.
Za změnu stareje papjerjaneje jězbneje dowolnosće na nowu Europskeje unije w formje šekoweje karty płaćeše dotal 19. januar 2022 jako posledni termin za lětniki 1953 do 1958. Tónle termin su nětko na 19. julij 2022 přestorčili. Přiwšěm maja sobudźěłaćerjo wokrjesa wjele dźěła. Wot aktualnje 30 000 jězbnych dowolnosćow dyrbja hišće 10 000 wobdźěłać. Hižo nětko je wotwidźeć, zo dyrbi zarjad dwójce telko padow wob lěto wobdźěłać kaž hewak. Kaž w zdźělence dale rěka, drje to hišće hač do lěća traje. Tele połoženje wuskutkuje so tež na wšitke dalše naležnosće w zwisku z jězbnej dowolnosću. Tak traje wupisanje dowolnosće za započatkarjow wo tójšto dlěje hač zwučene.