Krótkopowěsće (21.01.22)
Tiede z hosćom Steinmeiera
Berlin/Budyšin. Farar Christian Tiede z iniciatiwy „Budyšin zhromadnje“ wobdźěli so přichodnu póndźelu na podijowej rozmołwje „Hida a namóc w časach pandemije – nazhonjenja a reakcije“ na Berlinskim hrodźe Bellevue. Na tele rozmołwne koło zwjazkowy prezident Frank-Walter Steinmeier prawidłownje hosći z towaršnostneho žiwjenja přeproša. Nimo toho planuje iniciatiwa 28. januara ćichi rjećaz swěcow po Budyšinje.
Dźeń Saksow wotprajeny
Drježdźany/Frankenberg/Sa. Najwjetši sakski swjedźeń towarstwow tež lětsa njebudźe. To su měšćanscy radźićeljo Frankenberga na swojim wčerawšim posedźenju wobzamknyli. Předewšěm boja so tam raznje wyšich kóštow hač planowane, kaž Frankenbergski měšćanosta Thomas Firmenich předsydźe kuratorija „Dźeń Saksow“ dr. Matthiasej Rößlerej zdźěli.
Incidenca dale snadnje stupa
Policija (20.01.22)
Kružny wobchad přewidźał
Słona Boršć. Hižo zaso bě nowy kružny wobchad pola Słoneje Boršće městno wobchadneho njezboža. Stało je so wone předwčerawšim krótko do 23 hodź. 39lětny wodźer Mercedesa bě po statnej dróze S 106 ze směra awtodróhi z něhdźe 100 km/h přismalił. Pola Słoneje Boršće wón kružny wobchad po wšěm zdaću přewidźa a z wotmachom přez njón zajědźe. Awto něhdźe 20 metrow přez powětr lećeše a hakle při wobhrodźenju ležownosće stejo wosta. Po informacijach policije nasta na Mercedesu něhdźe 30 000 eurow škody. Wuchowanske mocy dowjezechu šofera do chorownje. Tam při kontroli zwěsćichu, zo bě wón tójšto alkohola pił. Pólski wodźer awta měješe 2,2 promilej w kreji. Jězbnu dowolnosć wón tohorunja žanu njeměješe.
Trójce ptači kwas w „Jednoće“
Chrósćicy. Po kóncu kulturneho lockdowna smě tež Serbski ludowy ansambl zaso swoje programy předstajeć. Hakle w decembrje je SLA wšitke ptačokwasne předstajenja wotprajił. Čim bóle so jeho wuměłcy wjesela, zo dóstanu tola hišće móžnosć woblubowany program lětsa pokazać směć. „Njewěstu njewjestu“ z pjera Tomaša Cyža, kiž je tohorunja režiju wjedł, hraja z baletom, chórom a orchestrom ansambla trójce w Chróšćanskej wjacezaměrowej hali „Jednota“. Předstajenja su w serbskej rěči, simultany přełožk budźe zaručeny. Terminy su jutře, pjatk, w 19.30 hodź., sobotu, 22. januara, w 16 hodź. a njedźelu, 23. januara, w 16 hodź. w Chróšćanskej „Jednoće“.
Přistup do hale je jeničce pod prawidłom 2Gplus móžny. To rěka jenož wotchorjeni abo dospołnje šćěpjeni z přidatnym aktualnym testom maja přistup. Štóž ma boosterowe šćěpjenje, abo je před maksimalnje třomi měsacami wotchorił, ale tež dźěći a młodostni pod 18 lětami žadyn aktualny test njetrjebaja.
Ferialny rěčny kurs za dźěći
Budyšin. W jutrownych prózdninach 2022 přewjedźe Rěčny centrum WITAJ za šulerjow 2. do 5. lětnika, kotrež zwonka Łužicy wotrostuja, kurs serbšćiny w Budyšinje. Won traje wot 19. do 22. apryla 2022 wšědnje wot 9 do 15 hodź. Přizjewjenja su móžne hač do 28. februara, ličba městnow je wobmjezowana. Přizjewjenja přijimuje Michaela Hrjehorjowa pod telefonowym čisłom 03591/550 414 abo e-mailnje pod .
Darowanje wuspěšne było
Wobydlerstwo nimale stabilne
W Rakečanskej gmejnje wjace wobydlerjow zemrěło, hač so narodźiło
Rakecy (JK/SN). Wuslědki wólbow nawody a naměstnika nawody wjesneje wohnjoweje wobory Stróža/Komorow mějachu čłonojo Rakečanskeje gmejnskeje rady na swojim wčerawšim prěnim lětušim posedźenju wobkrućić. Wobornicy běchu spočatk januara Jensa Kunaschka za nawodu a Armina Waltera za jeho naměstnika wuzwolili. Wobeju tamniši wjesnjanosta Swen Nowotny (CDU) wčera po wotpowědnym wobzamknjenju do jeju zastojnstwa powoła a jimaj čestne wopismo a jehličku gmejny Rakecy přepoda.
Wola noweho wjesnjanostu
Hamor (CK/SN). Kaž w mnohich druhich gmejnach Zhorjelskeho a Budyskeho wokrjesa dóstanu wólbokmani tež we 18 wjesnych dźělach Hamorskeje gmejny 12. junija k wólbam dwaj hłosowanskej lisćikaj. Woni rozsudźa wo nowym krajnym radźe Zhorjelskeho wokrjesa a runočasnje wo nowym wjesnjanosće Hamora. Móžny druhi wólbny přechod planuja za 3. julij. To su čłonojo Hamorskeje gmejnskeje rady na swojim zašłym posedźenju jednohłósnje wobzamknyli. Po wuprajenju nawody hłowneho zarjada Ariana Leffsa jedna so wo regularne wólby. Kaž hižo při zašłych wólbach wjesnjanosty před sydom lětami zwjazaja je tež tónraz z wólbami krajneho rady.
Wjesnjanosta Achim Junker (CDU) bě so w juniju 2015 w druhim wólbnym přechodźe ze 46,4 procentami přećiwo Marijej Weierej z Wochoz a Frankej Knoblochej z Delnjeho Wujězda přesadźił. Komunalne dźěło tehdy 55lětnemu cuze njebě. Wuwučeny instalater bě wot lěta 1990 čłon gmejnskeje rady. Hač do 2015 je wón nimo toho sydom lět swojeho předchadnika Rolanda Trunscha zastupował.
Po tym zo su na Worklečanskej kupje wjacore wjetše chore a wot ...
Krótkopowěsće (20.01.22)
SLA přeproša na wubědźowanje
Budyšin. Na 12. wubědźowanje młodych talentow „Młoda serbska hudźba“ přeproša Serbski ludowy ansambl dźěći a młodostnych w starobje šěsć do 23 lět. Zajimcy njech so hač do 31. měrca požadaja. Přizjewjenja su móžne w kategorijach spěw (solo, skupina, chór), instrument (solo, skupina, orchester) a cyle nowe w kategorijomaj band a reja (solo, skupinu).
Incidenca pomału stupa
Budyšin. Budyski strowotniski zarjad je wčera 184 dalšich natyknjenjow z koronawirusom zwěsćił. Dźewjeć ludźi je tu w běhu 24 hodźin w zwisku z wirusom zemrěło. RKI podawa dźensa za Budyski wokrjes incidencnu hódnotu 224,5 a za Zhorjelski 249,4. Tam je so wčera 199 ludźi z wirusom natyknyło. Tři wosoby su w zwisku z infekciju zemrěli.
Budyšan nadběha dla zasudźeny
Nasyp z cyle nowym napohladom
Planowanje nabywa kontury
Njeswačanska gmejnska rada posedźenski rjad noweho lěta zahajiła
Njeswačidło (JK/SN). Ze zazběhom lětušich posedźenjow Njeswačanskich gmejnskich radźićelow spokojom bě wčera wječor tamniši wjesnjanosta Gerd Schuster (CDU). Na dnjowym porjedźe stejace temy su woni spěšnje a ze zwučenej dokładnosću wobjednali. Wulke wolóženje radźićelam kaž tež za zarjad scyła bě, zo móžachu skónčnje zakónčić bilancu gmejny k 31. decembrej 2013. Ale mjeztym hižo bilancy dalšich lět na blidźe leža. Te pak chcedźa po słowach wjesnjanosty spěšnišo wobdźěłać, dokelž maja hižo trěbny trening a nazhonjenja z dołho trajaceho wotličenja lěta 2013.
