We Wojerowskim Domje zetkawanja je mjez druhim zaměstnjena měšćanska tafla, kotraž potrěbnym pomha. Runje tam pak so nastajnosći njeznaći zadobywaja.
Wojerecy (SiR/SN). Kotre mysle maja ći, kotřiž so do pomocnych zarjadnišćow zadobywaja? Tole praša so Madlen Krenz, nawodnica Wojerowskeje tafle. Njesměrnje ju mjerza, zo so zas a zaso cuzy do jeje zarjadnišća zadobywaja. Najnowši tajki pad w Domje zetkanja sta so minjeny kónc tydźenja. Wuhladała je škodu sobotu sobudźěłaćerka domu Kerstin Bähr, jako so w bliskosći wuchodźowaše. Wona dyrbješe zwěsćić, zo běchu zachodne wrota kaž tež drastowej kontejneraj wočinjene. Drasta bě po zemi rozmjetana. Do dweju garažow běchu so njeznaći tohorunja zadobyli.
Domjace lěkarki a lěkarjo dale pře koronu šćěpja, předewšěm ludźi staršeje generacije.
Budyšin/Njeswačidło/Mały Wjelkow (SN/MiR). Kónc zašłeho lěta bě so na domjacych lěkarjow wulka ličba pacientow z próstwu wo šćěpjenje wobroćiła. Wšako knježeše po cyłej Němskej deltawarianta korony. Nimo toho skedźbnješe Roberta Kochowy institut dźeń a bóle na přiwalacu so žołmu natyknjenja z wariantu omikron. „Njemějachmy pak stajnje šćěpiwa dosć, tež hdyž běchu nam to přilubili“, wuswětla Budyska lěkarka za powšitkownu medicinu Sabina Miklec, „tak dyrbjachmy pacientam terminy wotprajić a je přestorčić.“ Runje tak bě to w praksomaj dr. Jany Markoweje w Njeswačidle a dr. Anny Reiche w Małym Wjelkowje.
Dr. Jana Markowa zwěsća, zo „jenož jednotliwcy přichadźeja, zo bychu so prěni króć šćěpić dali, dalši wospjet přińdu, wosebje wulka pak je ličba tych, kotřiž móžnosć boosterowanja wužiwaja.“ Dźěći pod dwanaće lětami wona nješćěpi. „To měli dźěćacy lěkarjo činić. Dźěći a młodostnych nad dwanaće lětami mamy tu jenož w małej ličbje, zo bychu so před koronu škitać dali.“
Něhdźe 200 nowych infekcijow
Budyšin/Zhorjelc. Hornjołužiskej wo-krjesaj wostanjetej mjez tuchwilu najmjenje wot pandemije potrjechenymi regionami Němskeje. Budyski wokrjes informuje wo 99 dalšich natyknjenych z koronu a wo wosom zemrětych. Incidenca po RKI je 184,1. W Zhorjelskim wokrjesu zličichu 107 nowoinfekcijow. Incidenca tam wučinja 191,6.
Mužakow z inspiraciju był
Ralsko. Jako přewodźerjow w kónčinje „Narodny geopark Ralsko“ w sewjernej Čěskej su 16 t. mj. „georangerow“ wukubłali. Tući chcedźa zajimcow na zanjesene a lědma znate městna přewodźeć a je tež wěcywustojnje předstajić. Z inspiraciju za tajke „geo-dyrdomdejstwa“ bě zhromadne dźěło z geoparkom Mužakowski zahork, hdźež hižo podobne wodźenja přewjeduja.
Znowa bjez wizuma
Prěnja gmejna Hornjeje Łužicy, w kotrejž lětsa wjesnjanostu wola, je Bóščanska. Hižo njedźelu, 16. januara, su tamniši wobydlerjo namołwjeni swój hłós wotedać. W minjenych sydom lětach je Stanij Ryćer (Bóščanske rjemjesło) komunu nawjedował. Wón sam so znowa za čestnohamtske zastojnstwo požada. Za to ma dobre přičiny, ale tež wulku dowěru ze stron wobydlerjow a předewzaćow, kotrež maja w gmejnje swoje sydło.
Hamtska doba Stanija Ryćerja je so 2015 zahajiła, jako měješe gmejna Bóšicy hišće mnohe problemy, kotrež dyrbjachu rozrisać. Stanij Ryćer je to widźał a jako wužadanje wobhladował. Jeho předewzaćelske nazhonjenja běchu dobry zakład, tež komunalne nadawki na dobro wobydlerjow rjadować.
Paduši w Serbskim domje byli
Budyšin. W nocy na wutoru su so njeznaći na Budyskim Póstowym naměsće do zarjadniskeho twarjenja zadobyli, zdźěli wčera Zhorjelska policajska direkcija. Z rozprawy njewuchadźa, zo jednaše so wo Serbski dom. To wobkrući zarjadnistwo Załožby za serbski lud. Z rumnosće domownikow pokradnychu skućićeljo dwucyfrowu sumu pjenjez a elektriski grat markow Makita a Bosch. Hódnota rubizny wučinja něhdźe 320 eurow. Nimo toho nasta při zadobywanju něhdźe 200 eurow wěcneje škody.
Dźěwin (AK/SN). Wjesny wobchod w Dźěwinje (Groß Düben) je loni kónc decembra po 23 lětach začinił a dźěłać přestał. Wo tym informowaše tamniši wjesnjanosta Helmut Krawc (SPD) na minjenym posedźenju gmejnskeje rady, hdźež je so wobsedźerce Doreen Thumann za wjelelětne dobre zhromadne dźěło dźakował. Wobchod dale wjesć njebě jej hižo móžno. „Wjesny wobchod měješe wulki nadawk, k tomu přinošować, zo móžachu wobydlerjo tajku zhromadnosć začuwać“, wjesnjanosta wuzběhny. „Často smy sej jako gmejna tam swoje prezenty skazali. Tež wjesnjenjo, towarstwa a firmy su to wužiwali.“
Wóspork (UM/SN). Móst nad Lubatu (Löbauer Wasser) k delnjemu młynej we Wósporku dyrbi zawrjeny wostać. Krótkodobna reparatura, kaž běchu so na spočatku zawrjenja w meji 2021 nadźijeli, njedosaha, zo bychu móst zaso wužiwać móhli. Kaž Wósporske měšćanske zarjadnistwo informuje, je so twarski staw mosta jako přehubjeny wopokazał. Tak drje budźe nětko nowotwar trěbny.
„Hižo w lěće 2015 bě wotwidźeć, zo móst wjace předołho njedźerži. Wšitke drjewjane dźěle běchu hižo tehdy wot plěsniwca skóncowane“, rěka w nowinskej zdźělence wotrjada za porjad a wěstotu Wósporskeho měšćanskeho zarjadnistwa. Jako dołhodobne rozrisanje je jeničce spěchowana naprawa móžna. Wšako trochuja cyłkowne kóšty za nowy móst na něhdźe 250 000 eurow. Tohodla chcedźa so nětko wo pjenjezy z fondsa strukturneje změny prócować, „tež hdyž su powěsće wo strukturnym spěchowanju minjeny čas wšo druhe hač pozitiwne“.
Zawrjeny móst nad Lubatu je wobstatk pućowanskich šćežkow kołowokoło Wósporka kaž tež k Hrodźišćanskej skale.
Gmejna Hamor bě so změnu strukturow nastupajo wo pjenjezy za personalne městno prócowała. Z wida Swobodneho stata Sakskeje pak tajke městno trěbne njeje, nětko wottam rěkaše.
Hamor (CK/SN). Wot Zwjazka spěchowane personalne městno za poradźowanje a próstwy strukturnu změnu nastupajo gmejna Hamor njedóstanje. Wo tym informowaše wjesnjanosta Achim Junker (CDU) gmejnskich radźićelow na minjenym posedźenju. W aprylu 2021 bě gmejna próstwu za tajke městno z 90procentowskim spěchowanjom na tři lěta přez zwjazkowy program „Stark“ zapodała. Srjedź decembra dóstachu wot zwjazkoweho zarjada za hospodarstwo a wuwoznu kontrolu (BAFA) wotprajenje. „Přećiwo tomu zapodamy znapřećiwjenje“, Hamorski wjesnjanosta připowědźi.
Pančicy-Kukow (SN/MWj). „Lěto 2021 bě kaž za wšitkich druhich tež za gmejnu Pančicy-Kukow wšo druhe hač jednore.“ Takle zjima wjesnjanosta Markus Kreuz (CDU) wuwiće swojeje komuny w minjenych dwanaće měsacach. Jako wosebite wužadanje mjenuje wón dalši twarski wotrězk ponowjenja Šule Ćišinskeho. Tón měješe po spočatnych planach hižo w decembru hotowy być. Wyšich twarskich kóštow a pobrachowaceho materiala dla pak so dźěła dlija.
„Jeli wšitko derje poběhnje, budźemy snano jutry tak daloko, zo změjemy wšitko dočinjene“, wjesnjanosta Kreuz připowědźa. Ale što rěka dočinjene? Přiběracych pjenježnych wudawkow dla dyrbjachu hižo to abo tamne šmórnyć. Tak njemóžachu pinčne murje wusušić, a nowe hłowne zachodne durje dyrbja runje tak čakać kaž zapadne schodźišćo. Dalše wulke projekty loni běchu dokónčenje syće pitneje wody w Swinjarni, Kanecach a Jaworje, wotkryće noweje bydlenskeje štwórće při Srjedźnym puću w Pančicach-Kukowje a twar hłowneho puća w Kanecach.
Incidenca na snadnym niwowje
Budyšin/Zhorjelc. Incidency we wokrjesomaj Budyšin a Zhorjelc stagněrujetej na snadnym niwowje w němskim přerězku. Po Roberta Kochowym instituće wučinjatej hódnoće tu 199,3 resp. 189,6. Budyski krajnoradny zarjad informuje wo 146 nowych natyknjenjach z koronawirusom, 14 schorjenych je zemrěło. W Zhorjelskim wokrjesu zličichu 130 dalšich infekcijow a šěsć smjertnych padow.
Pokazaja ptačokwasny program
Budyšin. Serbski ludowy ansambl pokaza po přiměrjenju strowotniskich předpisow nětko tola wječorny ptačokwasny program „Njewěsta njewjesta“. SLA planuje inscenaciju dohromady trójce předstajić, a to 21., 22. a 23. januara w Chróšćanskej wjacezaměrowej hali „Jednota“. Wo wuměnjenjach za wopyt kaž tež móžnosćach, zastupne lisćiki sej kupić, chce SLA krótkodobnje informować.
Wotměja wuměłsku wuměnu