Lětuši jubilej chcedźa wulce swjećić
Kolesa a druhe wěcy namakali
Wojerecy. Na wšěch šěsć kolesow su w decembru na teritoriju města Wojerec namakali w namakanskim běrowje měšćanskeho zarjadnistwa wotedali. Kaž z nowinskeje zdźělenki města wuchadźa, jedna so wo štyri žonjace kolesa, jedyn mountainbike a jedne mužace koleso. Nimo toho nańdźechu wobydlerjo ćmowy nachribjetnik z črijemi, wšelake kluče, mjez druhim awtowe, słónčne nawoči a rukajcy. Po poł lěće móža namakane wěcy přesadźować, hač na kluče.
Wopak parkowali
Wojerecy. Něhdźe 2 000 ludźi je we Wojerecach loni wopak parkowało. To je městu něhdźe 31 000 eurow dochodow wobradźiło. W lěće do toho bě to něhdźe 2 000 eurow mjenje.
Dyrbja puće zjawne być?
Přesydlenje Zahorja gmejnsku radu přeco hišće zaběra
Trjebin (CK/SN). Syć dróhow w Trjebinskej gmejnje so powjetši, znajmjeńša formelnje. Přetož dróhi a puće na přesydlenskim městnje Za goru (Hinterberg) hižo maja, wone pak njejsu dotal jako wjesne puće zjawnje wěnowane – wuměnjenje to, zo móže je kóždy wobydler wužiwać. Hižo wot lěta 2020 tele jednanje traje, a poprawom měješe wone z wobzamknjenjom gmejnskeje rady w decembru 2021 zakónčene być. Na namjet wjesnjanosty Waldemara Locki (CDU) pak so techniski wuběrk gmejny w januaru wospjet z naležnosću zaběra.
Nuznik njewšědneho razu
Minakałski barokny hród je jeho wobsedźer w lětdźesatkach po politiskim přewróće wobšěrnje saněrował. W bywšim konjencu bě sej wón wosebitosć wumyslił.
Minakał (UM/SN). Na nuznik hić tam, hdźež su so tež hižo konje wuznamnych wosobinow wolóželi, móžeš nětko při Minakałskim hrodźe. W přitwarje sewjerneho kawalěrskeho domu je wobsedźer hrodu Hermann Fuchs w minjenych měsacach zawěrno njewšědny pjaty róžk wutworił: nuznik w kawalěrskim konjencu.
„Hdźež bě w lěće 1833 hižo kóń Carla Gustava Carusa zaměstnjeny, skićimy nětko tule komfortabelny a bjezzadźěwkowy zjawny nuznik“, Hermann Fuchs přeprošuje. Hižo stawiznisce inspirěrowane wobswětlenje a kopija wuznamneje rysowanki „Minakałski hród w swětle měsačka“ mjenowaneho wuměłca a lěkarja posrědkujetej mały zaćišć wo času, hdyž bě Carusowy štyrinohaty přewodźer na tymle městnje swój wows žrał. Carl Gustav Carus (1789–1869), přećel hrabinskeje swójby von Einsiedel, bě wjacore razy z jeje hosćom na Minakałskim baroknym hrodźe.
Mjenje wěrowanjow a pokutow
Budyšin (SN/MWj). Na proze do noweho lěta hladaja na mnohich městnach na předchadźace dwanaće měsacow, zo móhli je bilancować. To činja tež w Budyskim měšćanskim zarjadnistwje. Kaž z nowinskeje zdźělenki wuchadźa, su na stawnistwje respektiwnje we wobydlerskej přizjewjerni hač do kónca nowembra 2021 dohromady 314 porodow zličili. Najwoblubowaniše holče mjeno bě Charlotte a bu wosom króć spožčene. Dalše woblubowane mjena běchu Frieda, Leni a Mia (po sydom razach), a Emma (šěsć króć). Pola hólcow rozsudźichu so starši za Liama a Oskara (po wosom razach). Druhe městno wobsadźichu Emil, Leon, Theo a Tim (po sydom razach). Třeće městno dźěla sej Alexander, Erwin, Felix a Finn (po šěsć razach). Najdlěše mjeno wobsteješe z pjeć předmjenow, kotrež běchu holčce dali. Kaž w nowinskej informaciji dale rěka, móžachu sobudźěłaćerki a sobudźěłaćerjo wšitkim přećam za předmjenom jednotliwych dźěći wotpowědować a njetrjebachu žane wotpokazać.
W Budyskej sukelnicy kaž tež we Weigangec wili su loni dohromady 157 młodych porow zwěrowali. Lěto do toho bě jich 176.
Z dźensnišim swjedźenjom Třoch Kralow wudospołnjeja w swójbach a ...
Tiger w zwěrjencu zahinył
Wobaraja so kritice – Chwala wothłós
Wobydlerska iniciatiwa Wopomnjenska straža Budyšin, kotraž naprawy pře koronu kritizuje a póndźelniše protestne zarjadowanja na Budyskich Žitnych wikach organizuje, je ze zjawnym listom na wumjetowanja Budyskeho wyšeho měšćanosty Alexandera Ahrensa reagowała – Peticiju „Budyska manifestacija“ iniciatiwy Budyšin w zhromadnosći, spjećowaceje so prěwcam pandemije, je dotal 45 000 ludźi podpisało.
Krótkopowěsće (06.01.22)
Wjace smjertnych padow
Budyšin. Ličba w zwisku z koronu zemrětych pacientow znowa přiběra. Budyski wokrjes informowaše wčera wo 17 padach, Zhorjelski wo 14 z časa wot 9. do 28. decembra. Zdobom mjenowachu 312 resp. 221 natyknjenjow z koronawirusom. Incidenca po Roberta Kochowym instituće je dźensa w Budyskim wokrjesu 310,7 a w Zhorjelskim 247,0.
Nowy serbski film
Choćebuz. Roman Pernak je nowy film z delnjoserbskim wobsahom předpołožił. Berlinjan předstaja w połhodźinskim pasku wuwiće towarstwa „Serbske koparje“, kaž předsyda towarstwa Horst Adam informuje. Filmowc tematizuje hłownje prócu wo zhromadnu serbsku koparsku wubranku a prócu, nałožować delnjoserbšćinu. Hdy a na kotre wašnje film předstaja, kotryž je Załožba za serbski lud spěchowała, dotal jasne njeje.
Nadźijeja so wotewrjenja
Policija (05.01.22)
Tři delikty naraz
Budyšin. Dobry čuch mějachu policisća předwčerawšim popołdnju, jako na Budyskej Curiejowej wosobowe awto typa Škoda zadźeržachu. Při kontroli 26lětneho šofera so wukopa, zo wón scyła žanu jězbnu dowolnosć njewobsedźi. Dale reagowaše přewjedźeny drogowy test pozitiwnje na amfetaminy. A nimo toho měješe młody muž snadne mnóstwo crystala při sebi. Na to zastojnicy přikazachu, zo ma wón krej wotedać, su awtowy klučik kaž tež drogi sćazali a wupisachu wjacore přizjewjenja.
Dźiwje swinjo do awta policije dyriło
Sprjewiny Doł. We wčerawšich rańšich hodźinach je dźiwje swinjo wobsadku policajskeho awta překwapiło. Zastojnicy běchu hižo rano zahe w Sprjewinym Dole po puću, jako ranca nadobo přez puć běžeše a do duri wodźerja jězdźidła dyri. Na zbožo nasta jenož něhdźe 300 eurow wěcneje škody, policisća w awće so njezranichu.
