Wojerecy (SiR/SN). Jara rozdźělnje dožiwichu wobydlerjo we Wojerecach přechod do noweho lěta. Mnozy wužiwachu popołdnju miłe wjedro a so mjez druhim při bliskim Šibojskim jězoru wuchodźowachu. W samsnym času zetka so horstka młodostnych na Łužiskim naměsće, hdźež krótko na to mjez wodomjetom a Łužiskej halu mócnje praskaše. „To klinči za pólskimi praskotakami“, měnješe jedna žona swojemu přewodźerjej. W starym měsće bě w tym času dosć měrne. Posledni wječor lěta rozžohnowaše so tam z njewšědnje čerwjenym njebjom.
Hač do 23 hodź. so měrne wotrězki z praskotanjom wotměnjachu. Po tym bě w starym runje tak kaž w nowym měsće dołhi čas ćicho na hasach a mjez domami. To so wo połnocy naraz změni. Štóž na přikład w kompleksu VI abo blisko Łužiskeho naměsta bydli, dožiwi pisany a eksploziwny wohnjostroj, kotryž je ze wšelakich měšćanskich dźělow k njebju stupał.
Budyšin (SN/JaW). Hornjołužičenjo su nowe lěto 2022 poměrnje měrliwje witali, kaž to policija w swojim zjimanju silwesterskeje nocy posudźuje. Přiwšěm su zastojnicy wjacore zasadźenja zmištrowali. „Dyrbjachmy 31 přizjewjenjow chłostanja wustajić, mjez druhim wosom zranjenja ćěła dla, sydom wobškodźenja wěcow dla, šěsć ranjenja zakonja wo rozbuchlinje a dalšej rozbuchnjenja dla. Dalše 45 zasadźenjow mějachmy nastupajo wotwobaranje strachow a njedowoleneje hary dla“, zdźěli Thomas Grohme ze Zhorjelskeje policajskeje direkcije.
Mjenje testow ličby wobwliwuje
Budyšin. Za Budyski wokrjes je Roberta Kochowy institut dźensa incidencu 351,3, dale 60 natyknjenjow z koronawirusom w běhu 24 hodźin a tři smjertne pady podał. Za wokrjes Zhorjelc mjenowaše incidencu 259,0 a dwanaće infekcijow wot wčerawšeho. RKI na to skedźbnja, zo bě w dnjach mjez hodami a Nowym lětom mjenje testow a přizjewjenych natyknjenjow. Tež w Hornjej Łužicy pak pady z wariantu omikron přiběraja.
Andreas Ošika jednaćel SŠT
Budyšin. Serbske šulske towarstwo z nowym jednaćelom do lěta 2022 startuje. Kaž předsydka SŠT Katharina Jurkowa zdźěli, Andreas Ošika wot dźensnišeje póndźele w zastojnstwje skutkuje. 43lětny Worklečan je studowany hospodar a socialny pedagoga. SŠT je jako kubłanske towarstwo nošer sydom serbskich a Witaj-pěstowarnjow.
Bijadło naslěduje pišćele
Radwor. Fachowcy a lajkojo su w minjenych lětach w Radworju a wokolinje časćišo lěsne wuchate sowy (Waldohreule) wuhladali. Tak je dr. Winfried Nachtigal ze spěchowanskeho towarstwa Njeswačanskeje ptačernje před lětami na brězy wuchodnje Chasowa tajkeho nahladneho ptaka wobkedźbował. 2019 je Jurij Měrćink w Bronju lěsnu wuchatu sowu na swojej ležownosći widźał. 2020 je porik rědkeho ptaka w šmrěku pola swójby Joachima Buša w Bronju hnězdźił a dwě młodźeći wotćahnył.
Drohu techniku pokradnyli
Wulke Ždźary. Na twarnišću we Wulkich Ždźarach dyrbjachu předwčerawšim dopołdnja zwěsćić, zo běchu tam w nocy do toho paduši pobyli. Woni běchu so do wjacorych twarskich kontejnerow zadobyli a 2 000 eurow wěcneje škody načinili. Pokradnyli su po informacijach Zhorjelskeje policajskeje direkcije měrjensku techniki w hódnoće 35 000 eurow.
Chrósćicy. W Domje swjateje Ludmile w Chrósćicach poskićuja dźěłowe městno při dohladowanju wobydlerjow, kotrež chcedźa wot 1. februara přichodneho lěta z 20 hodźinami wob tydźeń wobsadźić. Wosebite wukubłanje za to trěbne njeje. K nadawkam na tymle dźěłowym městnje mjez druhim słuša, z wobydlerjemi so zaběrać, z nimo so rozmołwjeć a so wuchodźować. Nadrobniše informacije poda wjednistwo domu pod telefonowym čisłom 035796/ 947 330.
Boža mša w rozhłosu
Smochćicy. Rozhłosowy sćelak MDR-Kultur wusyła njedźelu, 2. januara, Božu mšu originalnje z cyrkwje swjateho Bena w Smochćicach. Kemše započnu so w 10 hodź.
Maš-li we wsy ludźi, kotřiž so za druhich angažuja a jenož na sebje njemysla, hodźi so za zhromadnosć wjele docpěć. Najnowši tajki přikład je nětko w Lipinach wočiwidny.
Lipiny (AK/SN). Štyri motiwy su widźeć na nowej pyramidźe na kromje Lipin (Lippen) we Łazowskej gmejnje. Mjez druhim su hórnik ze swojim gratom, z brunicu nakładowana lora a bager napodobnjeni. W hornim dźělu je nimo němskeho wjesneho mjena tež serbske napisane. „Naša wjes je stajnje hižo z hórnistwom žiwa była, na to chcemy z pyramidu dopominać“, měni Martin Kubicki. Wón skutkuje wot lěta 2019 we wjesnej radźe Drěwcy-Lipiny. Hromadźe z dalšimi wobydlerjemi je wón spočatk decembra pyramidu natwarił.
Ideja nasta spočatk septembra na wobydlerskej zhromadźiznje. Ludźo přejachu sej swěčkaty wobłuk. Rita Trost namjetowaše porno tomu pyramidu. „Tu móžemy jutry runje tak wupyšić kaž k domchowance abo w adwenće“, Martin Kubicki rozłoži. Blachowe dźěle dachu pola energijoweho koncerna LEAG zhotowić. Rakečanski elektrozawod je wobswětlenje sponsorował.