Budyšin. Statistika turistow za město Budyšin pokazuje, zo su w oktobrje plus jědnaće procentow při skazanju přenocowanjow zwěsćili. Lěta do toho njebě tón měsac wosebje atraktiwny był. Lětsa je sej dohromady 8 072 turistow a turistkow do sprjewineho města dojěło, mjez kotrymž běchu mnozy, kotřiž wužiwachu tež móžnosće campinga. W cyłku bu 20 486 přenocowanjow zličene. Přerěznje přebywachu ludźo dwaj a poł dnja w Budyšinje. Loni bě tu 6 381 turistow přerěznje 2,6 dnjow přebywało, štož wučinješe 16 619 přenocowanjow.
Smě ludźi wěrować
Budyšin. Budyski wyši měšćanosta Alexander Ahrens (SPD) je so ze swojim znapřećiwjenjom přesadźił. Dohladowanski zarjad je tudyšej měšćanskej radźe wumjetował, zo bě přećiwo prawu postupowała. Radźićeljo běchu wotpokazali, zo smě Ahrens přichodnje pory stawnisce wěrować. Po rozsudźe zarjada, zo bě postupowanje rady njeprawy zasah do organizaciskeje suwerenity a swobody při wukonjenju powołanja, to měšćanosta Ahrens nětko smě. Kaž wón zdźěli, dźěše jemu jeničce wo móžnosć, hdys a hdys wěrowanja přewjesć a stawnistwo w jeho dźěle wolóžić.
Přepytuja zapalerstwa dla
Kamjenc. Wšo druhe hač měrny wukónc hodownych swjatych dnjow mějachu wohnjowi wobornicy předwčerawšim wječor w Kamjencu. Wobydler bě kameradow alarmował, dokelž so z pincy wjaceswójbneho domu na Schillerowej mócnje kurješe. Po tuchwilnych dopóznaćach bě něchtó spytał, styroporowu izolaciju w pincy bydlenskeho domu zapalić. Kur so po wšej pincy rozpřestrě, woheń pak so žadyn zapalił njeje, tak zo přichwatanych 30 wobornikow hadźicy zasadźić njetrjebaše. Woni jeničce pincu a prěni poschod twarjenja porjadnje přewětrichu. Wobydlerjo móžachu na to zaso do swojich bydlenjow. Byrnjež jenož něhdźe 50 eurow wěcneje škody nastało, kaž policija zdźěli, přepytuja tónle pad dla pospytneho ćežkeho zapalerstwa.
Hdźež ma w Rownom nowa pěstowarnja nastać, su nětko pódlanske twarjenja wottorhali. Róžkowy dom ma so předać, zo hodźał so separatnje wužiwać.
Rowno (CK/SN). Wosrjedź Rownoho su nětko městno za nowu pěstowarnju stworili. Krótko do hód 2020 bě Slepjanska gmejna spěchowanske srědki přizwolene dóstała. Wuměnjenje bě, zo ma nowa pěstowarnja kónc lěta 2022 hotowa być. W tym času pak hišće nichtó wočakował njebě, zo móhł projekt wjele hłowybolenja načinić. Centralny dypk dźěćaceho přebywanišća měješe poprawom čerwjeny klinkerowy twar na róžku Gródkowska dróha/Młynski puć być. Bywši hosćenc „K přijomnemu róžkej“ pak steji swojeje charakteristiskeje fasady dla pod škitom pomnikow. „Bě nimale njemóžne, wysoke pomnikoškitne naroki z wužadanjemi za dźěćace hladanje zwjazać“, wjesnjanosta Jörg Funda (CDU) dilema wopisuje.
Budyšin/Kamjenc (SN/at). Hodowny měr hinak wupada. Tež wčera je Zhorjelska policajska direkcija wo tym rozprawjała, zo je so w hornjołužiskimaj wokrjesomaj znowa wjace hač 4 400 wosobow na wjacorych přizjewjenych runje tak kaž na njepřizjewjenych zhromadźiznach pod hołym njebjom wobdźěliło. Po płaćiwym korona-postajenju za nuzowy pad smě so na do toho zwěsćenym městnje hač do dźesać ludźi nahromadźić.
Zastojnicy Zhorjelskeje policajskeje direkcije běchu hromadźe z mocami sakskeje hotowostneje policije a zwjazkoweje policije zasadźeni.
Prěni omikron-pad dopokazali
Budyšin. Wirusowu wariantu omikron su 23. decembra prěni raz we wokrjesu Zhorjelc dopokazali. Wot minjeneho štwórtka hač do wčerawšeho bě 273 natyknjenjow z koronawirusom, krajnoradny zarjad wčera zdźěli. Incidenca po RKI je tam dźensa 246,6 a w Budyskim wokrjesu 392,3. Wčerawša hódnota 127,5 bě problemow při sposrědkowanju dla přeniska. Přez hody zwěsćichu tu 115 infekcijow a sydom smjertnych padow.
Wjace chorypisanjow korony dla
Berlin. W Sakskej, Saksko-Anhaltskej a Durinskej bě wjace ludźi korony dla chorych pisanych hač w zwjazkowym přerězku. Wo tym informowaše wčera chorobna kasa Barmer. We 48. tydźenju (28.11.– 4.12.) bě jich w Sakskej z 185 po 10 000 zawěsćenych. Jako zwjazkowy přerězk je Barmer 51 podała. Swobodny stat Sakska bě dołhi čas negatiwny načolnik nastupajo infekcije.
Psy přećiwo covidej
Pančicy-Kukow (SN/MWj). Premjeru wosebiteho razu je patoržicu popołdnju wjele ludźi w Pančicach-Kukowje dožiwiło. Na městnje něhdyšeho a před lětomaj zwottorhaneho hosćenca je kružk młodych swójbow farskeje wikarije prěni raz hodownu hru předstajił a k tomu nowy a patoržicu tež dospołny boži narodk pokazał.
Do hosćenca so zadobyli
Budyšin. Ani na hodownych swjatych dnjach njemějachu policisća žanu přestawku, ale dyrbjachu so kaž hewak w běhu lěta ze zadobywanjemi zaběrać. Tak su so njeznaći w nocy na sobotu do hosćenca na Budyskim Schreberowym puću łamali. W lokalu wšitke rumnosće přepytachu. Nastata wěcna škoda wučinja něhdźe 1 500 eurow. Hač su zadobywarjo něšto pokradnyli, policija hišće přepytuje.
Awće do so prasnyłoj
Wochozy. Ćežke wobchadne njezbožo sta so patoržicu wječor na zwjazkowej dróze B 156 při wotbóčce do Wochoz. Krótko po 22 hodź. zrazyštej tam wosobowej awće nimale frontalnje do so. Wjacore wosoby so zranichu. Jich dowjezechu do wokolnych chorownjow.