Wojerowska zakładna šula „Handrij Zejler“ změje wot šulskeho lěta 2022/2023 nowe stejnišćo. Trěbny přećah je rada města nad Čornym Halštrowom wčera wobzamknyła.
Wojerecy (AK/SN). Zakładna šula „Handrij Zejler“ Při Worjole we Wojerecach zaćehnje spočatk šulskeho lěta 2022/2023 do twarjenja dotalneje wyšeje šule na kromje města. To su Wojerowscy měšćanscy radźićeljo wčera, na swojim poslednim lětušim posedźenju, jednohłósnje wobzamknyli.
Prjedawše wyšošulske twarjenje započachu lětsa w februarje přetwarjeć. Hač do klětušeho julija chcedźa naprawu dokónčić. „Hrubotwarske dźěła su dospołnje hotowe, saněrowanje fasady po 60 procentach. Škit před słóncom je připrawjeny. Tež wokna a durje su zatwarjene“, rozjasni radźićelam wčera Dietmar Wolf, nawoda wěcneho wobłuka twarstwo měšćanskeho zarjadnistwa.
Dale mjenje infekcijow zwěsćili
Budyšin. To zdawa so měr do přichodneje žołmy być. Incidenca po Roberta Kochowym instituće je w Budyskim wokrjesu na 510,7 a w Zhorjelskim na 460,2 woteběrała. Wokrjes Budyšin rozprawješe wčera wo 236 natyknjenych z koronawirusom a pjeć zemrětych pacientach. Wokrjes Zhorjelc informowaše wo 308 infekcijach a dwěmaj smjertnymaj padomaj.
Lessingowe myto přepodate
Drježdźany. Poprawom za 26. nowember planowane přepodaće Lessingoweho myta je so korony dla digitalnje wotměło. Tak spožči wčera sakska kulturna ministerka Barbara Klepsch (CDU) intendantej Düsseldorfskeho dźiwadła Wilfriedej Schulzej hłowne a publicistce Jackie Thomae, spěwarce Annje Mariji Vogt kaž tež žurnalistce Jasnje Zajček spěchowanske myto. Film je pod adresu přistupny.
Hundert nowa społnomócnjena
Kinspork (SN/MiR). W času kćějacych kamelijow ma Kinspork wosebitej pósłanči. 15lětna Lilly a 13lětna Johanna buštej za kamelijowej damje za lěto 2022 wuzwolenej. Tradicija, zo šulerki tamnišeje wyšeje šule tele zastojnstwo wukonjeja, wobsteji mjeztym 17 lět. Damje přewodźatej dobu kćějacych kamelijow a staratej so wo wopytowarjow. Kinsporske domizniske towarstwo hižo wjacore lěta z městnymi šulemi a dźěćacymi dnjowymi přebywanišćemi hromadźe dźěła. „Wšako so dźěći a młodostni za nadobne kamelije, kotrež maja w měsće wulku tradiciju, horja. Zdobom zběraja nazhonjenja při zetkanjach ze slepymi ludźimi w domje kamelijow, při wosebitej prezentaciji hrodu po šćežce bajkow, při hladanju kamelijow a při tym, zeznać wosebity parfim, kreěrowany z našich kamelijow“, rjekny załožer a předsyda towarstwa Peter Sonntag. Wosebje hordźi su čłonojo towarstwa na to, zo sej ludźo jich angažement waža. W oktobru su za swój projekt, wuwić a poskićić kamelijowy parfim, přijeli Sakske wobydlerske myto, kotrež je najwyše wuznamjenjenje za čestnohamtske skutkowanje po cyłym swobodnym staće.
Wospjet po měsće pochodowali
Budyšin. Něhdźe połsta ludźi bě so wčera wokoło 18 hodź. na Žitnych wikach zhromadźiło. Policisća njezamóchu pochodowacych do toho zadźeržeć, dokelž běchu jich wobešli. Zastojnicy, kotřiž ćah na wjacorych městnach zadźeržachu, přez wótřerěčaki wozjewjachu, zo njejstej pochod a zhromadźowanje dowolenej. Blokada wjedźeše k tomu, zo dyrbjachu wobdźělnicy směr ćaha wjackróć změnić. Na Hłownym torhošću so ćah skónčnje rozpušći. Nimo awtokorsa, kiž bě wokoło 17.30 hodź. na Třělnišću startował a so poł hodźiny pozdźišo na Tzschirnerowej skónčił, zwěsćichu zastojnicy šěsć dalšich zhromadźiznow w měsće. Při tym njejsu pak překročenu maksimalnje dowolenu ličbu wobdźělnikow dźesać ludźi registrowali.
Njebjelčicy/Drježdźany (SN/MiR). 256 přinoškow bě do sakskeho ministerstwa za energiju, škit klimy, wobswět a ratarstwo dóšło. Tam su mjeztym 186 dobyćerjow požadanych mytow we wobłuku „eku – myto přichoda 2021“ wuzwolili. Mjez dobyćerjemi su Njebjelčicy. „Smy jara zbožowni, zo smy za projekt wo naslědnym hospodarjenju z energiju w gmejnje 10 000 eurow dóstali. Je to dobry start za ideju, kotruž chcemy w přichodnym času zwoprawdźić“, rjekny Njebjelčanski wjesnjanosta Tomaš Čornak (CDU) na naprašowanje. Ideja z Njebjelčic chce předewšěm wjesne žiwjenje do runowahi z wobswětom přinjesć.
Hakle něšto dnjow pokazujetej atraktiwnje wuhotowanej tafli na serbski drastowy fundus w Nowej Jaseńcy. Milenka Rječcyna je so z mějićelku fundusa Moniku Cyžowej rozmołwjała.
Z kotreje přičiny sće taflu při šćežce na Wašu ležownosć při hłownej dróze w Nowej Jaseńcy připrawiła?
M. Cyžowa: To je cyle jednorje. Ma to być pomoc tym, kiž fundus pytaja. Mějach hižo ludźi, kotřiž su wjackróć nimo ležownosće jěli a so hakle po wospjetnej informaciji ke mni do fundusa namakali.
Hdźe sće sej taflu zhotowić dała?
M. Cyžowa: Zdokonjamoj tójšto samaj. Tak je mi mój mandźelski zhotowił tafli z drjewa a ja sym sej pismiki a lipowe łopješko w serbskich barbach wućišćała. Smój tafli wobarbiłoj, wšitko nalěpiłoj a připrawiłoj.
Nadźijeće so tuž tež nowych zajimcow?
M. Cyžowa: Sym jara zbožowna, zo přichadźeja do fundusa lubi znaći. Nowe mjezwoča pak runje tak rady widźu. Nadźijam so, zo tež přichodnje mjezsobny poměr k nam dobry wostanje. Trochu wšak so změny boju, hdyž słyšu wospjet wo wohroženej dobrej zhromadnosći mjez Serbami a Němcami.
Što sej ludźo wosebje rady wupožčeja?