Hdyž při wuchodźowanju druhdy přez Swinjarnju přińdu a nimo bywšeje starownje du, so prašam, hač hodźi so historiske domske woprawdźe tak přetwarić, zo móžeš so w nim wo zbrašenych starać. Přejara mi z lijawy rosćace štomiki, skóncowane wokna a mnohe dalše njedostatki do wočow bija. Ale ja njejsym twarski fachowc. Ćim wjetši respekt mam před zamołwitymi klóštra Marijineje hwězdy, zo so na tajki projekt zwaža. Ze swojimi wobmyslenjemi wo twarskich móžnosćach sym před něšto lětami hižo raz wopak ležał, a to tohorunja w Swinjarni. Tam je so swójba zwažiła, historiski młyn wobšěrnje ponowić a na swójske bydlenje přetwarić. Tehdy bych so nimale sadźił, zo to twarsce scyła móžno njeje. Na zbožo dyrbjach so lěpšeho powučić dać. Dźensa je młyn hotowa parlička a jako starožitnosć zachowany. Jeli so to na podobne wašnje tež z bywšej starownju tak stanje, by Swinjarnja wo dalšu zajimawostku ­bohatša była. Marian Wjeńka

Budyšin (SN/at). Klětu 12. junija budźe w Budyskim wokrjesu nowy krajny rada woleny. Termin je wokrjesny sejmik na swojim póndźelnym posedźenju schwalił. Budu-li rozsudne wólby trěbne, přewjedu je potom 3. julija. Wobaj wólbnej dnjej postajichu wokrjesni radźićeljo po poručenju statneho ministerstwa nutřkowneho po wothłosowanju z Forumom sakskich wokrjesow kaž tež z Forumom sakskich městow a gmejnjow za klětuše wólby krajnych radow, měšćanostow a wjesnjanostow w Sakskej.

Za předsydku wokrjesneho wólbneho wuběrka wuzwolichu póndźelu Andreju Peter, za jeje zastupjerku Anju Hornig. Nimo toho wobkrućichu tam čłonki a čło­now wokrjesneho wólbneho wuběrka a jich zastupjerki a zastupjerjow.

Michael Harig (CDU) je wot lěta 2001 krajny rada wokrjesa Budyšin. Jeho hamtska doba skónči so 31. julija 2022, a wón k wólbam znowa njenastupi. Dotal staj dwaj kandidataj, kotrajž chcyłoj jeho naslědować. Jedyn je tuchwilny zastu­powacy krajny rada Udo Wićaz jako namjet CDU, tamny njestronski Kamjenski předewzaćel Tobias Jantsch.

Ličba natyknjenych woteběrała

Budyšin. W Budyskim wokrjesu informowachu wčera wo 369 natyknjenjach z koronawirusom. W zwisku z pandemiju je tu dalšich pjeć wosobow zemrěło. Indicenca po Roberta Kochowym instituće wučinja dźensa 1 126,8, we wokrjesu Zhorjelc 771,9. Mjez Běłej Wodu a Žitawu rozprawjachu wčera wo 439 infekcijach a třoch smjertnych padach z časa wot 22. do 26. nowembra.

Chcedźa bóle sobu skutkować

Choćebuz. Braniborska chce na strukturnym wuwiću we łužiskim brunicowym rewěrje bóle sobu skutkować a stanje so z wjetšinowym towaršnikom Łu­žiskeho hospodarskeho regiona (WRL). Po informacijach braniborskeje statneje kenclije je kabinet wčera wo tym rozsudźił. WRL koordinuje a přewodźa změnu strukturow, při čimž ideje komunow dale wuwiwa, tak zo su spěchowanjakmane.

Herbst jednaćel frakcije FDP

Worklecy. Rozprawa Lubijskeho statneho pruwowanskeho zarjada wo pruwowanju Worklečanskeje gmejny za lěta 2008 do 2019 budźe jedna z temow posedźenja Worklečanskeje gmejnskeje rady zajutřišim, štwórtk, w 19 hodź. w jědźerni tamnišeje wyšeje šule. Nimo toho postaja radźi­ćeljo termin wólbow wjesnjanosty, móžny druhi termin a wola tohorunja gmejnski wólbny wuběrk. Po sydom lětach so wólbna doba wjesnjanosty Franca Bruska (CDU) w lěću 2022 skónči.

Wusyłaja kemše z klóštra

Pančicy-Kukow. Radijowy sćelak Deutsch­landfunk wusyła třeću adwentnu njedźelu Božu mšu z klóštra Marijineje hwězdy w Pančicach-Kukowje. Za to so zwučeny slěd njedźelnych kemšow změni. Rańša serbska Boža mša w 7.30 hodź. wostanje kaž kóždu njedźelu. Konwentne a němske kemše w 9 hodź. a w 10.30 hodź. njebudu. Za to budźe w 10 hodź. Boža mša rozhłosa. Nimo toho wotměje so sobotu, 11. decembra, w 19 hodź. probowy přeběh, kotryž płaći jako přednjedźelne kemše. Na wobě Božej mši su wěriwi wutrobnje přeprošeni.