Jónu wob lěto wopominaja na Budyskim židowskim pohrjebnišću zamordowanych tudyšeje židowskeje wosady. Přichodny raz wuhladaja tam wopytowarjo ponowjene wrota, kotrež maja zajimawe stawizny.
Budyšin (ES/SN). Hižo lětdźesatki je kowany železny portal Budyskeho židowskeho pohrjebnišća při Mužakowskej dróze w jara špatnym stawje. Wobě křidle matej wosebite stawizny, kotrychž dla stej wonej samostatny pomnik.
W nowembru 1942 běchu nacionalsocialisća wukazali na židowskich pohrjebnišćach z rowow zemrětych šrot a železo zezběrać. To samsne płaćeše za wobhrodźenja a płoty. Po přikazu měšćanskeho zarjadnistwa dyrbješe wikowar ze surowiznami Erich Steglich w Budyšinje nadawk přewzać. Mjez druhim měješe wón tež wobě křidle wrotow wutwarić a jako šrot wotedać. Z wunoška chcychu drjewjane wrota zhotowić a zatwarić. Postajeny doskónčny termin 20. decembra 1942 njemóžeše Steglich dodźeržeć, za čož sej z radnicy mócne swary dósta.
Budyšin (SN/at). Klětu 12. junija budźe w Budyskim wokrjesu nowy krajny rada woleny. Termin je wokrjesny sejmik na swojim póndźelnym posedźenju schwalił. Budu-li rozsudne wólby trěbne, přewjedu je potom 3. julija. Wobaj wólbnej dnjej postajichu wokrjesni radźićeljo po poručenju statneho ministerstwa nutřkowneho po wothłosowanju z Forumom sakskich wokrjesow kaž tež z Forumom sakskich městow a gmejnjow za klětuše wólby krajnych radow, měšćanostow a wjesnjanostow w Sakskej.
Za předsydku wokrjesneho wólbneho wuběrka wuzwolichu póndźelu Andreju Peter, za jeje zastupjerku Anju Hornig. Nimo toho wobkrućichu tam čłonki a čłonow wokrjesneho wólbneho wuběrka a jich zastupjerki a zastupjerjow.
Michael Harig (CDU) je wot lěta 2001 krajny rada wokrjesa Budyšin. Jeho hamtska doba skónči so 31. julija 2022, a wón k wólbam znowa njenastupi. Dotal staj dwaj kandidataj, kotrajž chcyłoj jeho naslědować. Jedyn je tuchwilny zastupowacy krajny rada Udo Wićaz jako namjet CDU, tamny njestronski Kamjenski předewzaćel Tobias Jantsch.
Ličba natyknjenych woteběrała
Budyšin. W Budyskim wokrjesu informowachu wčera wo 369 natyknjenjach z koronawirusom. W zwisku z pandemiju je tu dalšich pjeć wosobow zemrěło. Indicenca po Roberta Kochowym instituće wučinja dźensa 1 126,8, we wokrjesu Zhorjelc 771,9. Mjez Běłej Wodu a Žitawu rozprawjachu wčera wo 439 infekcijach a třoch smjertnych padach z časa wot 22. do 26. nowembra.
Chcedźa bóle sobu skutkować
Choćebuz. Braniborska chce na strukturnym wuwiću we łužiskim brunicowym rewěrje bóle sobu skutkować a stanje so z wjetšinowym towaršnikom Łužiskeho hospodarskeho regiona (WRL). Po informacijach braniborskeje statneje kenclije je kabinet wčera wo tym rozsudźił. WRL koordinuje a přewodźa změnu strukturow, při čimž ideje komunow dale wuwiwa, tak zo su spěchowanjakmane.
Herbst jednaćel frakcije FDP
Worklecy. Rozprawa Lubijskeho statneho pruwowanskeho zarjada wo pruwowanju Worklečanskeje gmejny za lěta 2008 do 2019 budźe jedna z temow posedźenja Worklečanskeje gmejnskeje rady zajutřišim, štwórtk, w 19 hodź. w jědźerni tamnišeje wyšeje šule. Nimo toho postaja radźićeljo termin wólbow wjesnjanosty, móžny druhi termin a wola tohorunja gmejnski wólbny wuběrk. Po sydom lětach so wólbna doba wjesnjanosty Franca Bruska (CDU) w lěću 2022 skónči.
Wusyłaja kemše z klóštra
Pančicy-Kukow. Radijowy sćelak Deutschlandfunk wusyła třeću adwentnu njedźelu Božu mšu z klóštra Marijineje hwězdy w Pančicach-Kukowje. Za to so zwučeny slěd njedźelnych kemšow změni. Rańša serbska Boža mša w 7.30 hodź. wostanje kaž kóždu njedźelu. Konwentne a němske kemše w 9 hodź. a w 10.30 hodź. njebudu. Za to budźe w 10 hodź. Boža mša rozhłosa. Nimo toho wotměje so sobotu, 11. decembra, w 19 hodź. probowy přeběh, kotryž płaći jako přednjedźelne kemše. Na wobě Božej mši su wěriwi wutrobnje přeprošeni.
Hamor (AK/SN). Při Bjerwałdskim jězoru chce gmejna Hamor přichodnje bóle na to dźiwać, zo móža tež ludźo z chorobnym stołom abo z hinašim handicapom wšitke poskitki wužiwać. To podšmórny tamniši wjesnjanosta Achim Junker (CDU) na wčerawšim posedźenju gmejnskeje rady. Hižo wot lěta 2019 komuna z wjacorymi partnerami na projekće dźěła. Při tym su mjez druhim zwěsćili, zo na přikład z chorobnym stołom k dźělej nastajenych blidow a ławkow njepřijědźeš, dokelž pućiki prawje wuhotowane njejsu. Tež blida njejsu tak twarjene, zo móžeš z chorobnym stołom za nimi sedźeć. Tohodla nastanu na namjet Hamorskeje wjesneje rady nětko nowe blida a ławki.
Rezerwy widźi Junker dale direktnje při jězoru. Přijězdy k pobrjoham su zdźěla tak špatne, tak zo je z handicapom wužiwać njemóžeš. Ludźo z wobmjezowanej mobilitu sej přeja zadźěwki wotstronić, wjesnjanosta podšmórny.
Njezbožo zawinił a ćeknył
Pančicy-Kukow. 53lětny muž je předwčerawšim popołdnju po wobchadnym njezbožu w Pančicach-Kukowje ćeknył. Wón bě w nahłej křiwicy na Chróšćanskej dróze do směra na statnu dróhu S 100 na lěwy bok jězdnje zajěł, do napřećo přijěduceho awta prasnył a městno njezboža wopušćił. Přiwołani policisća mjeno muža wuslědźichu a jeho doma wopytachu. Tam wšak zwěsćichu, zo měješe wón 1,78 promilow alkohola w kreji.
Twarske dźěła na zwjazkowej dróze B 96 mjez Budyšinom a Wojerecami su kaž planowane přewjedli, a wone wostachu tež w předwidźanym pjenježnym ramiku. Jutře wječor budu poslednje dźěła hotowe.
Kamjenej (UM/SN). Nadróžne twarnišćo na zwjazkowej dróze B 96 mjez Kamjenej pola Rakec a přijězdku ke kaolinowemu zawodej su tak derje kaž wotzamknjene. Po wšěm zdaću jutře wječor dróhu za wobchad wotewru a amplu kaž tež wšitke dalše wobchadne znamjenja zrumuja. Tež kolesowanska šćežka, kotraž za čas twarskich dźěłow jako prowizoriska dróha słužeše, hodźi so potom zaso normalnje wužiwać. Dotal wjedźechu wobchad z amplu wotměnjejo raz do jednoho, raz do tamneho směra přez twarnišćo.