Skład wurumowany

Dźěžnikecy. Móhłrjec wšo, štož móžachu dosahnyć, su njeznaći w Dźěžnikecach pokradnyli. Tam běchu so minjeny tydźeń na dotal njeznate wašnje do skła­dowanskeje hale zadobyli. Kaž Zhorjelska policajska direkcija hakle nětko zdźěli, spakosćichu z njeje dwě kolesy, telewizoraj, tak mjenowanu soundbaru, hudźbnu připrawu kaž tež wšelki grat za dźěło w zahrodce. Po informacijach policije ma rubizna hódnotu něhdźe 7 000 eurow. Nimo toho načinichu paduši něhdźe 50 eurow wěcneje škody. Zastojnicy zawěsćichu slědy a zhotowichu wotpowědne wozjewjenje. Kriminalna słužba Budyskeho policajskeho rewěra pad nětko dale přepytuje.

Budyšin. Wobšěrnych žadanjow hygieny dla, kotrež bychu při předawanju hodownych štomikow z Budyskeho měšćanskeho lěsa trěbne byli, so tudyše zarjadnistwo lětsa předanje wzda. Město ma dwě štomowej plantaži, na kotrymajž hodowne štomiki plahuja. Zajimcy móžachu sej tam štomik wupytać a čerstwy podrězać. Dokelž bě nawal minjene lěta stajnje jara wulki, chce zarjadnistwo w času pandemije kóždežkuli riziko wotwobarać. Kaž w nowinskim zdźělenju města dale rěka, ma wotprajenje termina jednu lěpšinu. Wobstatk štomikow móže so po suchich lětach wočerstwić a budźe 2022 hišće rjeńši.

Młodźinsku woboru załožili

Wojerecy. Planowane swjedźenske za­rjadowanje składnostnje załoženja młodźinskeje wohnjoweje wobory Wojerecy-stare město dźensa přewjesć njemó­žachu. Město toho su woboru jenož formal­nje w najmjeńšim kruhu załožili, zdźěli rěčnica měšćanskeho zarjadnistwa. Ručež to połoženje zaso dowoli, chcedźa z dźěćimi, staršimi, sponsorami a nawodami woborow oficialne załoženje nachwatać.

Sportowa jednotka njemóže wobnowjenje sportnišća sama zapłaćić

Njebjelčicy (JK/SN). Hižo dlěje planuje Sportowa jednotka Njebjelčicy, swoje sportnišćo wobnowić. Na to je so wobšěrnje přihotowała a sej nastajiła plan trěbnych naprawow, kaž tež jich finan­cowanje. Za předewzaće, w kotrymž ma škitne saki za wrotami kaž tež wonkowny wobłuk stadiona wobnowić, su po prěnjej kalkulaciji wudawki 79 000 eurow předwidźane. Za planowanu naprawu je sportowe wjednistwo próstwu wo spěchowanje zapodało, kotraž bu tež při­zwolena. Swójski podźěl sportoweje jednotki pak njedosaha. W spěchowanskej próstwje kalkulowaše wjednistwo towarstwa swójske dźěła sportowcow z pře­rěznej hódnotu 25 eurow na hodźinu. To bě Sakskej natwarnej bance (SAB) pře­wjele. Wona připóznawa jeno 9,70 eurow na hodźinu.

Za přetwar bywšeje Wojerowskeje wyšeje šule „Na kromje města“ na nowu zakładnu šulu „Handrij Zejler“ z hortom je 365 000 eurow wjace trěbne, hač bě dotal zaplanowane. Cyłkowne twarske kóšty podróša so wot 4,580 milionow eurow na 4,945 mio.

Wojerecy (AK/SN). Přidatne wudawki móže město ze swójskeho etata zwjesć. To je měšćanska rada na swojim wčera­wšim posedźenju jednohłós­nje wobzamknyła. Pozadk su přidatne wudawki za podróšene twaršćizny a njeplanowane přidatne trěbne dźěła za šulu.

Kubłanišćo bu 1959 twarjene a 1995 saněrowane. Lětsa w februaru započachu je přetwarjeć. Hač do julija 2022 ma wšitko­ hotowe być, tak zo móža wu­knja­cy zakładneje šule „Handrij Zejler“ spočatk šulskeho lěta 2022/2023 do twarjenja zaćahnyć.