Ralbicy (SN/MWj). Jako su Ralbičanscy wohnjowi wobornicy před časom w tak mjenowanym wohnjowym kontejneru w Kamjencu zwučowali, dožiwichu woni njelubozne nazhonjenje. Jim mjenujcy rjeknychu, zo drastu tych kameradow, kotřiž w padźe wohenja z dychanskim nastrojom ludźi z płomjenjow wuchowaja, hižo wužiwać njesmědźa. Jeje čas je takrjec wotběžał abo hinak prajene: Wona hižo žadyn TÜV nima. Michał Majwald je gmejnske zarjadnistwo na to skedźbnił, a gmejnscy radźićeljo dyrbjachu so na swojim wčerawšim posedźenju chcyjo nochcyjo z naležnosću zaběrać. Wšako je wohnjoškit winowatostny nadawk gmejny.
Zastojnikej do rukow běžała
Budyšin. Komisar připad je předwčerawšim tomu dopomhał, zo je so padustwo w Budyskim wobchodźe cyle spěšnje wujasniło. Policist widźeše po swjatoku na Stieberowej młodu žonu z drogerije přińć a so spěšnje wotsalić. Dokelž při tym alarm wobchoda piwčeše, tukaše wón na to, zo móhło so wo padustwo jednać, a spěchaše za padušnicu. W samsnym wokomiku kriminalist w słužbje blisku tankownju wopušći, a ćěkaca jemu direktnje do rukow běžeše. Wobaj ju na to zaještaj a alarmowanym kolegam z policajskeho rewěra přepodaštaj. 22lětna bě we wobchodźe kosmetiku a parfim w hódnoće 400 eurow pokradnyła. Twory móžachu wobchodej hnydom zaso wróćić.
Hórki (SN/MWj). Wosebite dźěło zdokonjała je minjene dny w Hórkach Hańža Štrawbina. Wona je w zašłych tydźenjach družču drastu wušiwała a ju nětko přepodała. To drje w katolskich Serbach někotražkuli žona čini, kotraž so z tymle sporym dźěłom zaběra. Hańža Štrawbina pak je mjeztym 94 lět, hakle njedawno je tule wysoku starobu docpěła.
„Hižo w šulskim času jako młoda holcy sym wušiwać započała. Tehdy mějachmy w šuli ručne dźěło. Tam sym najskerje zakład za to dóstała“, wona powěda. Što je jako prěnje wušiwała, na to so Hórčanka hižo při najlěpšej woli dopominać njemóže. „Pozdźišo sym tež wjele pletła, zwjetša za sebje samu. Tehdy tola ničo dóstał njejsy. To sym sej pulower abo pjezl sama napletła.“
Kamjenc/Zhorjelc (SN/BŠe). Towaršnosć za strowotnistwo a zastaranje w Sakskej (GGS) přewozmje nošerstwo Kamjenskeje chorownje swj. Jana kaž tež Zhorjelskeje Carolusoweje chorownje. Předewzaće chce wšitke hospodarske podźěle maltezow přewzać, wo kotrež so dotal mjenowanej klinice staratej. Wotpowědne zrěčenje su předwčerawšim podpisali. Wobě chorowni matej swoje ćežišća zachować, tak zo je medicinske zastaranje na městnje móžne. Kaž nowy nošer přilubi, wobhospodarjenje mjenowaneju bjez změnow dale dźe, štož je dołhodobnje zawěsćene. Nichtó njebudźe wupowědźeny. Hladanje staršich a pomoc potrěbnych ludźi kaž tež dalše aktiwity, kotrež maltezojo w kónčinje poskićeja, dale wostanu.
W Kamjenskej chorowni je tuchwilu 160 łožow za pacientow. Wo něhdźe 7 600 pacientow so tam 330 sobudźěłaćerjow wob lěto stara. W Zhorjelcu maja 120 łožow k dispoziciji a 270 sobudźěłaćerjow. Wob lěto lěkuja tam něhdźe 4 800 stacionarnych pacientow. W dwěmaj medicinskimaj zastaranskimaj centrumomaj hladaja nimo toho něhdźe 20 000 ambulantnych pacientow wob lěto.
Njesměrnje wysoka incidenca
Budyšin. Po cyłej Němskej druhu najwyšu incidencu po RKI ma Budyski wokrjes dźensa z hódnotu 1 683,8. Wokrjes informowaše wčera wo 1 029 natyknjenjach z koronawirusom a třoch smjertnych padach. Njesměrnje postupiła je incidenca po RKI w Zhorjelskim wokrjesu, hdźež rozprawjachu wčera wo 1 960 nowoinfekcijach a štyrjoch zemrětych pacientach.
Nowe šćěpjenske městnosće
Budyšin. Wot póndźele poskića šćěpjenja w Kamjenskej wotnožce wokrjesneje uniwersity (póndźelu/štwórtk), na Wojerowskej žurli Vis-à-Vis na Hrodowym měsće (wutoru/pjatk) a w Budyskej wjacezaměrowej hali na Třělnišću (srjedu/štwórtk), a to wot 11 do 17 hodź. Dotalne mobilne poskitki we Wojerowskim Łužiskim centeru a w Budyskim ECE wjace njebudu.
Polěpša zwisk do Łužicy
Nimale 70 procentow wšěch Němcow nad dwanaće lětami je mjeztym dwójce přećiwo koronje šćěpjenych. W našich susodnych krajach kaž w Nižozemskej, Belgiskej a Francoskej maja šćěpjenske kwoty nad 80 procentami. Po informacijach strowotniskeje organizacije WHO su po cyłym swěće wjace hač tři miliardy ludźi dwójce šćěpjene, kóždy druhi čłowjek na swěće znajmjeńša jónu. W chudšich krajach swěta so ludźo wo šćěpiwo torhaja, zo bychu skónčnje před wirusom škitani byli. W Němskej pak mamy přeco hišće tójšto ludźi, kotřiž radšo dale a krućiše postajenja za nješćěpjenych znjesu, město toho zo bychu sej srědk, kotremuž njedowěrjeja, injicěrować dali. Přewulke su njewěstosće. Lědma štó dźě wě, kak tajke šćěpjenje scyła funguje. Chcu jako student mediciny štyri šćěpiwa, kotrež su w Europje dotal dowolene, předstajić a rozkłasć, na kotre wašnje wone před koronawirusom škitaja.
Šćěpiwa z mRNA