Pjanemu so wuwinyć dyrbjeli
Biskopicy. Bjezmała by předwčerawšim připołdnju w Biskopicach k wobchadnemu njezbožu mjez policajskim jězdźidłom a napřećo přijěducym awtom Kia dóšło. 57lětny šofer wodźeše je dospołnje wopity po Drježdźanskej dróze a měrješe so runjewon na policajske awto w napřećiwnym wobchadźe. Zastojnicy so wuwinychu, zawróćichu so a spytachu podhladneho ze sirenu a módrej swěcu zadźeržeć. Po pospyće ćeknjenja Kia skónčnje na Nowoměšćanskej dróze zasta. Při wotpowědnym tesće so wukopa, zo měješe jeho wodźer 2,78 promilow alkohola w kreji.
Nětko dyrbi nóžkować
Budyšin. Wodźer BMWja z Wojerowskim čisłom je předwčerawšim ze 194 km/h přez kontrolu spěšnosće na awtodróze A 4 při wotbóčce Budyšin-wuchod smalił. Dowolenych pak je na wonym městnje jeničce 120 km/h. Muž dyrbi nětko z tym ličić, zo změje pokutu płaćić, zo dóstanje dypki w Flensburgu, zo budźe so swojeho awta chwilu wzdać a město toho wěsty čas nóžkować dyrbjeć.
Budyšin (SN/bš). Tele dny přebywa žurnalist David Cordoba Bou we Łužicy, zo by so wo Serbach informował a jich zeznał. 33lětny Španičan pochadźa z Valencije, kotraž słuša do sydlenskeho ruma Katalanow. Nimo španišćiny wobknježi David Bou tuž tež katalanšćinu. Jeho zajimujetej wosebje połoženje a přichod narodnych mjeńšin.
Wo Serbach je hižo tójšto čitał. „Hdyž přisłušeš narodnej mjeńšinje, so bóle za wobstejnosće druhich zajimuješ. Chcu widźeć, wuknyć a sej z druhimi nazhonjenja wuměnić“, praji David Bou, kiž dohromady pjeć rěčow rěči. Prěni dźeń we Łužicy je wón hižo dwaj muzejej a serbski hosćenc wopytał. Hač do 10. oktobra chce hišće po Hornjej a Delnjej Łužicy pućować. Štóž ma zajim, jeho zeznać abo wo Serbach rozprawjeć, móže z Davidom Bouwom přez Serbske Nowiny (0 35 91 / 57 72 25, ) kontakt nawjazać.
Njebjelčicy (SN/JaW). Za zdźěłanje nowych wohnjowobornych wustawkow dyrbi Njebjelčanska gmejna wjace pjenjez wudać, hač bě planowała. Dotal wobličenym 17 000 euram dyrbja tam hišće 4 000 eurow přidać. Wo tym je Njebjelčanski wjesnjanosta Tomaš Čornak (CDU) tamnišich gmejnskich radźićelow na njedawnym posedźenju informował. Eksterne zdźěłanje nowych wohnjowobornych wustawkow je trěbne, dokelž dotalne hižo aktualnym wobstejnosćam njewotpowěduja. Kaž wjesnjanosta Čornak wuswětli, „zarunamy přidatne wudawki za zdźěłanje wustawkow z dochodow předanje stareho jězdźidła Pěskečanskeje wohnjoweje wobory“. Předań je komunje 4 650 eurow wunjesła, tuž su přidatne kóšty wjac hač zarunane, a radźićeljo dodatne wudawki jednohłósnje přizwolichu.
Hamor (AK/SN). Koncern Łužiska energija a milinarnje (LEAG) chce na kromje Wochoz (Nochten) něhdźe 21 hektarow wulki solarny park natwarić. Wobhospodarjeć chcedźa jón potom znajmjeńša 30 do 35 lět. Wukon ma 20 megawattow wučinjeć. „Solarny park milinarnja Hamor“ ma na bywšich hórnisce wužiwanych, rekultiwowanych a dźensa ratarsce wužiwanych přestrjenjach nastać. Z wjetšinu hłosow – dwaj radźićelej běštaj přećiwo tomu, jedyn so hłosa wzda – je Hamorska gmejnska rada tuž wobzamkła zestajeć wobtwarjenski plan.
„Dyrbimy sčasom wobydlerjow informować. Zarjady a dalšich nošerjow zjawnych zajimow mamy hižo zahe do předewzaća zapřijeć“, rjekny Annett Rötschke, managerka firmy EP New Energies, kotraž w nadawku LEAG projekt wuwiwa. Klětu chcedźa płoninu kartěrować a po tym chce LEAG z gmejnu Hamor měšćansko-twarske zrěčenje podpisać, kotrež zwoprawdźenje projekta zaruča. Nalěto 2023 chcedźa twarić započeć, nazymu potom ma solarny park hižo hotowy być.
Kulow (SN/JaW). Zjednoćene młodźinske kluby Kulowa United Clubs for Kulow (UCfK) maja nowe předsydstwo. Čłonske kluby su na hłownej zhromadźiznje minjeny pjatk na žurli wustawa Jakubetz Martina Kretschmera w zastojnstwje 1. předsydy wobkrućili. Dale přisłušeja nawodnistwu Daniel Schiemann (zamołwity za material), Luisa Rose (2. předsydka), Vivien Jahn (zamołwita za zjawnostne dźěło) a Franz Wiedemann (pokładnik).
Rozžohnowali su z předsydstwa dotalneho 2. předsydu Mathiasa Klimanka. Kulowski Serb, kotryž dźěła jako wučer serbšćiny na Ralbičanskej wyšej šuli, wjednistwo po šěsć lětach skutkowanja wopušći, runje tak tež Lorenz Lippitsch.
Kaž towarstwo na Instagramje informuje, su minjeny pjatk nimo cyłkow Flames of Pils a Kulow Section tež wjacorych jednotliwcow přiwzali. „Wobaj klubaj běštej so do toho z wurjadnymaj prezentacijomaj čłonam zwjazka předstajiłoj“, rěka we wozjewjenju UCfK.
Nětko popřeje sej Kulowski zwjazk młodostnych UCfK krótku přestawku, nadźija pak so, zo móže kónc nowembra woblubowanu, tak mjenowanu „Tingle Party“ přewjesć.
Budyšin (SN/at). Wokrjes Budyšin wobdźěli so na zwoprawdźenju projekta „Serbski forum wědy při Lawskim arealu“. Wokrjesny sejmik je na swojim wčerawšim posedźenju w Budyskej „Krónje“ wotpowědne wobzamknjenje schwalił. 78 wokrjesnych radźićelow hłosowaše za to, dwaj radźićelej běštaj přećiwo tomu a pjećo so hłosa wzdachu.
Na zakładźe wčerawšeho wobzamknjenja ze stron wokrjesa nawoda zarjada za twarjenja a ležownosće, nawoda wokrjesneho wuwićoweho zarjada kaž tež nawodnica Serbskeho muzeja w projektowej dźěłowej skupinje sobu skutkuja. Wotzamknyć chcedźa kooperaciske dojednanje ze Załožbu za serbski lud, kotrež wokrjesnemu sejmikej za wobzamknjenje předpołoža. Nimo toho wobdźěli so wokrjes z přiražku we wobjimje tuchwilnych wudawkow za Serbski muzej na wobhospodarjenju foruma wědy.
Tež we wokrjesu Zhorjelc płaći 3G
Budyšin. W Budyskim wokrjesu běchu wot soboty hač do wčerawšeho 90 natyknjenjow z koronawirusom a jedyn smjertny pad. Po RKI je incidenca dźensa ze 94 zaso pod 100. W Zhorjelskim wokrjesu płaći wot dźensnišeho rjadowanje 3G, nimo toho zwěsćeja kontakty. Incidenca tam wučinja po RKI 63,3. Wot pjatka bě we wokrjesu Zhorjelc 44 infekcijow.
Prěni króć w Praze pódla
Drježdźany. Sakska wobdźěli so wot jutřišeje srjedy hač do 10. oktobra pod hesłom „Design – Made in Saxony“ prěni króć na festiwalu DESIGNBLOK w Praze. Mjez 16 wustajerjemi su corporate friends z Kamjenca a Biskopičanska modowa designerka Bettina Kletzsch. Dalši wobdźělnicy zaběraja so z ilustraciju, truženjom, designom lampow a debjenkow, hornčerjenjom a lećom papjery.
Chce adwentne wiki zmóžnić
Awće do so zrazyłoj
Salow. Třo zranjeni běchu wuslědk wobchadneho njezboža sobotu wječor w Salowje. 31lětna wodźerka Škody jědźeše tam do směra na Kulow. Na kromje wsy pak so zaso zawróći. Za njej jěduca 37lětna wodźerka Hyundaja njemóžeše hižo borzdźić a zrazy ze swojim awtom do Škody. Wobě šoferce kaž tež 29lětna sobujěduca Škody so zranichu. Wěcnu škodu trochuja na něhdźe 10 000 eurow.