Při najlěpšim wjedrje wužichu mnozy zajimcy zašłu njedźelu popołdnju składnosć a podachu so na Dnju wotewrjenych duri k wětrnikej na hórce Łóžko mjez Chasowom a Łuhom. Tam běchu rjemjeslnicy w zašłych měsacach něhdyši „Dom kata“, prěnjotnje z Lišeje Hory, znowa natwarili.
Łuh (JN/SN). Historiska chěža ze stołom pochadźa ze zažneho 18. lětstotka a běše na originalnym stejišću w jara hubjenym stawje a zjawnosći njepřistupna. Jako posledni znaty tykowany dom kata w Sakskej měješe pak wysoku hódnotu za regionalne a twarske stawizny a bu samo w powěsći wo Krabaće naspomnjeny. Tuž bu pod režiju Přećelow domizny a kultury Njeswačidło z.t. wot fachowcow wuměrjeny, dokumentowany, loni wottwarjeny, w ćěsliskej dźěłarni Martina Fricke w Thalheimje restawrowany a lětsa na Łóžku pódla wětrnika zaso natwarjeny.
Zhorjelc (AK/SN). Hladajo na přetwar a rozšěrjenje Zhorjelskeho krajnoradneho zarjada liči wokrjes z jasnje wjace wudawkami, wuswětli póndźelu tamniši komornik Thomas Gampe. W prěnim nětko zahajenym twarskim wotrězku dźe wo to, wobstejace historiske twarjenja ze załožićelskeje doby na Berlinskej a Salomonskej dróze ponowić. „Na Berlinskej dyrbi so třěcha saněrować. Potom chcemy dale postupować“, komornik rozłoži. Wosebitosć je, zo ma z bydlenskich a bywšich wobchodniskich twarjenjow přichodnje zarjadniske twarjenje nastać, při čimž dźiwaja na bjezbarjernosć.
Lětuše Wjacławske wiki w sprjewinym měsće steja znowa na hračkach. Wo tym bě wčera rěč na posedźenju Budyskeje měšćanskeje rady. Nimo toho wuznamjenichu třoch młodych ludźi z Radnej medalju města Budyšina.
Budyšin (CS/SN). Z Radnej medalju města Budyšina počesći měšćanska rada wčera Annu Mariu Wendler ze Schilleroweho gymnazija, Kevina Valdeza Aguirrea ze Spěchowanskeho centruma na Třělnišću a Davida Seckela z tudyšeho powołanskošulskeho centruma. Šulscy nawodźa namjetowachu wšěch třoch, dokelž nimaja jenož wuběrny wuknjenske wukony, ale su so za čas koronapandemije z wurjadnej pomocliwosću wuznamjenili. Kevin je sobušulerjam přidatnu pomoc při wuknjenju poskićił. Davida pomhaše šulerjam z ćežemi online a wosobinsce a bě zdobom wučerjam narěčenski partner nastupajo online-wuknjenje. Anna Maria bě rěčnica rjadownje a kursa, a organizowaše šulerske wólby, za čož samo wólbnu platformu wutwori.
Dźeń a wjace infekcijow
Budyšin. Incidenca w Budyskim wokrjesu je po RKI dźensa na 70,1 stupała. 42 nowonatyknjenjow z koronawirusom je tamniši strowotny zarjad wčera zwěsćił. Za Zhorjelski wokrjes podachu dźensa po RKI incidencu 54,7. Tam su wčera 45 nowych infekcijow registrowali, štyri z toho z delta-wariantu wirusa.
Mjenje bjezdźěłnych
Budyšin. W septembrje je wolóženje dźěłowych wikow we wuchodnej Sakskej pokročowało. Tak je tu aktualnje 17 074 bjezdźěłnych, 437 resp. 2,5 procentow mjenje hač w awgusće, kaž Budyska wotnožka Zwjazkoweje agentury za dźěło dźensa informuje. Kwota bjezdźěłnosće je na 6,2 procentaj spadnyła, to je 0,4 mjenje hač měsac do toho. Bjezdźěłnosć bliži so pomału niwowej do koronapandemije, piše předsydka jednaćelstwa Budyskeje agentury Kathrin Groschwald.
Jenož mało dešćika
Wjacezaměrowa hala je dołhodobny a wulki projekt za Łazowsku gmejnu.
Hamor (AK/SN). Jednohłósnje je Hamorska gmejnska rada wobzamknyła dwójny etat za lětsa a klětu. Lětsa chce komuna hišće 1,7 milionow eurow inwestować, klětu pjeć milionow, a to za wšelake předewzaća. Ćežišća su dalše saněrowanje Zakładneje šule Hamor, spotorhanje bywšeje awle a jako wulkoprojekt twar wjacezaměroweje hale w Hamorje. K tomu přińdu naprawy za dróhotwar, kaž je to puć přez Cympl (Zimpel), naprawy za pohrjebnišća a za zjawny wosobowy bliskowobchad w Klětnom (Klitten) a w Delnim Wujězdźe (Uhyst/Spree). „Znowa a přijomniše wuhotować chcemy zhromadnje ze zaměrowym wobchadnym zwjazkom Hornja Łužica-Delnja Šleska přechody mjez busami. Nastać maja parkowanišća a płoniny za wotstajenje awtow a kolesow“, rozłoži komornik Ulrich Bänsch na minjenym wuradźowanju gmejnskeje rady.
Zwučowanja za hortske dźěći
Wojerecy. Njeje scyła lochko po wěstym puću dróhu překročić. To zwěsćichu tele dny hortske dźěći z Wojerec. Póndźelu popołdnju su wone pod dohladom policajskeju zastojnikow zwučowali, zo bychu na kóncu přijeli pas za pěškow. Kedźbliwje a z wulkej zahoritosću su so dźěći w starobje šěsć do sydom lět na praktiskim treningu w ramiku wobchadneho kubłanja wobdźělili. Wobydlerskej policistaj běštaj jim w zašłych tydźenjach teoretiske zadźerženje jako pěšk wujasniłoj. Nětko su dźěći cyle praktisce zwučowali, swoju wědu w zjawnym wobchadźe dopokazali a z wulkim wjeselom jednotliwe nadawki pod kedźbliwym wóčkom policistow zmištrowali. K zakónčenju prewenciskeho zarjadowanja a po wuspěšnym dokonjenju wšitkich zwučowanjow staj jim zastojnikaj přepodałoj požadany pas za pěškow a zešiwk Poldi.