Krótkopowěsće (14.09.21)
Dźěl dochodow daruja
Chrósćicy. Dźěl dochodow ze zastupnych pjenjez za předstajenja serbskeje pop-opery „Carpe Noctem – Njeskónčna nóc“ daritej młodźinske towarstwo Pawk a hudźbny kolektiw „Trio a kumple“ organizacijam a pomocnym skutkam, kotrež pomhaja na kóžnu chorosć xeroderma pigmentosum schorjenym. To zdźělištej wčera na poslednim, šulerskim předstajenju pop-opery w Chrósćicach. Schorjenje bě zdobom tema opery. Hudźba budźe jako CD a na hudźbnych platformach kaž Spotify wozjewjena. Z widejoweho materiala ma DVD nastać.
Incidenca tróšku woteběrała
Budyšin. Incidenca w Budyskim wokrjesu je po wčera wozjewjenych 23 nowych natyknjenjach z koronawirusom wot minjeneho pjatka do njedźele tróšku woteběrała. Roberta Kochowy institut poda dźensa hódnotu 26,5. Aktualna incidenca we wokrjesu Zhorjelc po RKI je 23,5. Tam bě wot pjatka 13 infekcijow.
Ochranowske hesła 2022 wušli
Angažowanymaj wobydlerjomaj myto spožčili
Slepo (CK/SN). Šesty raz je Slepjanska wjesna rada njedawno Čestne myto spožčiła a tak ludźi do srjedźišća stajiła, kotřiž na dobro wsy a gmejny skutkuja. Wuznamjenili su Petru Nakońcowu. Swoju zwjazanosć z ródnym Slepom njepokazuje jeno z čłonstwom we wohnjowej woborje. Wona tež předewšěm staršim ludźom při wobstaranju a spjelnjenju wšědnych nadawkow pomha. „Za swój nadawk wona ma, druhim ludźom zhromadne dožiwjenja zmóžnić a jim tak rjane stronki žiwjenja zbližić“, chwaleše ju wjesny předstejićer Wolfgang Goldstein.
Dalše Čestne myto spožčichu Richardej Mazuli za jeho angažement při přetwarje towarstwoweho domu, při wonkownym wuhotowanju wsy a za jeho towarstwowe dźěło. Woběmaj přepodachu skulpturu Slepjanskeho drjeworězbarja Thomasa Schwarza.
Policija (13.09.21)
Brónje namakali
Čorny Chołmc. Při kontroli na čaporowych wikach w Čornochołmčanskim Krabatowym młynje je policija kónc tydźenja pola dweju wikowarjow wjacore wjetše nože a dalše brónje namakała, nimo toho njedowolene symbole z Třećeho reicha. Zastojnicy wšitko zawěsćichu a sćazachu. Wikowarjow su chłostajomneho njeskutka dla přizjewili.
B 96 znowa zawrjena
Rakecy. Wot dźensnišeho hač do pjatka, 17. septembra, na zwjazkowej dróze B 96 wot wotbóčki do Šešowa hač do Rakec hornju asfaltowu worštu ponowjeja. Po něhdźe połdra kilometra dołhim twarskim wotrězku je dróha dospołnje zawrjena. Wokołopuć wjedźe wot Njeswačidła přez Šešow a Nižu Wjes do Rakec.
Prawniske poradźowanje
Budyšin. Prawiznica Ursula Mrosk-Fröde rozjimuje wutoru, 14. septembra w 17 hodź. w Budyskim žónskim centrumje na Marxowej „prěnje kroki w zwisku z dźělenjom mandźelstwa“. Poskitk žónskeje iniciatiwy sprjewineho města je darmotnyo. Tež hladanje dźěći je móžne. Zajimcy njech přizjewja so pak z mejlku na pak telefonisce pod 03591/4 23 53.
Gratownja budźe towarstwowy dom
Chelno (BB/SN). Dotalne twarjenje wohnjoweje wobory w Chelnje móža klětu přetwarić. 89 lět stary dom budźe potom wjesne zetkawanišćo. Tajke dźě wobydlerjo hižo dlěši čas paruja. Minjeny štwórtk je sakski statny sekretar dr. Frank Pfeil Radworskej gmejnje přizwolenski spis spěchowanja přepodał.
Lěta 1932 běchu Chelnjenjo srjedź wsy dom za swoju wohnjowu woboru natwarili. Pozdźišo hišće mału kulturnu rumnosć přitwarichu. Dokelž pak stary depot zakonskim předpisam hižo njewotpowědowaše, su loni dospołnje nowy natwarili. Tak móža Chelnjanscy wobornicy – jich je 20 aktiwnych – swoju techniku nětko do moderneho twarjenja stajeć. Z něhdyšeje kulturneje rumnosće pak bu předrasćernja wobornikow, a tak wjesne towarstwa swoje zetkawanišćo zhubichu. Tónle brach so bórze zminje. Přetwar stareho twarjenja płaći něhdźe 231 000 eurow, znajmjeńša po dotalnych planach. Z toho přińdźe 75 procentow ze sakskeho programa „Witalne wjesne srjedźišća“, potajkim něhdźe 173 000 eurow.
Samo historiski ćah jězdźił
Za hewak zawrjenymi durjemi so rozhladować móhli
Budyšin (CS/SN). Wjacore tysacy ludźi běchu na wčerawšim dnju wotewrjeneho pomnika w sprjewinym měsće a wokolinje po puću, zo bychu so za hewak zawrjenymi durjemi rozhladowali.
Wobsedźerjo a hladarjo pod pomnikoškitom stejacych objektow běchu sej znowa tójšto prócy dawali, zo bychu hosćom pomniki tež derje předstajili. A mnozy mějachu njeličomne wodźenja zmištrować a sej tak nimale jazyk zasukachu, na telko prašenjow mějachu wotmołwjeć. Tak mjez druhim architektka Urte Falk, kotraž da tuchwilu barokny dom při Mjasowych jětkach 7 saněrować. Wo wuměłstwowe poskitki postara so tohorunja Budyski zamołwity za marketing Marcus Gießler. Dale dožiwichu zajimcy małe koncerty hudźbnych šulerjow, designerka Corinna Seiler je swoju modu wustajała.
Na zahonje pola błótowskich Bórkowow je tamniše domizniske a ...
Krótkopowěsće (13.09.21)
Gerald Stone njeboh
Budyšin/Oxford. Znaty jendźelski slawist a přećel Serbow dr. Gerald Stone z Oxforda je njeboh. Kaž jeho swójba wčera zdźěli, je wón 11. septembra po krótkej chorosći 89lětny zemrěł. Jako jednomu z njewulkeje ličby běžnje serbowacych slawistow we wukraju spožči Domowina Geraldej Stonej lěta 2019 swoje najwyše wuznamjenjenje, Myto Domowiny.
Čas snadneje incidency nimo
Budyšin. Roberta Kochowy institut je dźensa za Budyski wokrjes incidencu 26,8 podał, za Zhorjelski 30,3. We wokrjesu Budyšin bě minjeny pjatk 21 natyknjenjow z koronawirusom. Tam wot 113 schorjenych dweju w klinice lěkuja. Zhorjelski měješe pjatk dźewjeć infekcijow. Kónctydźenske ličby wobaj wokrjesaj hakle dźensa popołdnju wozjewitej.
Nowa čěsko-pólska zwada
Dwórnišćo sej wobhladać
Radwor. Poněčim so Radworske dwórnišćo na integraciske zetkanišćo a přebywanišćo přeměnja. Kohož zajimuje, što je hižo nastało, njech pozastanje tam njedźelu na dnju wotewrjeneho pomnika. Towarstwo dwórnišćo inkluzije Radwor přeproša wšitkich zajimcow cyle wutrobnje na wodźenje po wobnowjenych rumnosćach. Wosebje rady chcedźa nowu kuchnju za projektowe dźěło prezentować. Wo ćělne derjeměće so wězo tež postaraja, poskićejo hrochowu poliwku, gulaš z kotoła a samopječeny tykanc.
Darmotnje do muzeja
Budyšin. We wobłuku dnja wotewrjeneho pomnika zajutřišim, njedźelu, budźe tež Budyski Serbski muzej přistupny, a to darmotnje. Na tamnišej žurli kaž tohorunja na dalšich stacijach pokazaja stawizny domu. Nimo toho móža zajimcy wosebitu wustajeńcu „machot časa – wot běłeho k čornemu“ wopytać.
Literatura w radiju
Policija (10.09.21)
Pod wliwom drogow z awtom jěł
Chrósćicy. Hdyž lepja policisća wodźerja awta, kiž pod wliwom drogow jědźe, je to zwjetša w městach. Druhdy pak su zastojnicy tež na wsy wuspěšni, kaž pokaza so to předwčerawšim w Chrósćicach. Tam zadźeržachu w 13.30 hodź. na Hórnikowej 18lětneho šofera VW Golfa. Při tesće so wukopa, zo bě wón amfetaminy brał. Za njeho bě jězba wězo nablaku nimo. Policisća su młodostneho hnydom k wotedaću kreje sobu wzali a jeho delikt přizjewili.
