Zrěčenje rozwjazaja
Budyšin. Serbske šulske towarstwo pušći swojeho jednaćela Markusa Bjeńša. To wobkrući našemu wječornikej předsydka SŠT Katharina Jurkowa. Přičiny, čehodla su hakle w aprylu přistajeneho rodźeneho Konječana wupowědźili, pak Jurkowa žane njemjenowaše. Nadawki jednaćela SŠT přewozmje nětko najprjedy raz komisarisce dotalna zastupjerka Bjeńša Kerstin Šołćina.
Wot jutřišeho z nahubnikom
Budyšin. W mnohich wobłukach płaći w Budyskim wokrjesu wot jutřišeho štwórtka zaso winowatosć nahubnik wužiwać. Wšako bě incidenca wčera pjaty dźeń za sobu kritisku hódnotu překročiła. Po RKI wučinja wona dźensa w Budyskim wokrjesu hižo 15,1, wčera běchu tu štyri natyknjenja z koronawirusom. W Zhorjelskim je incidenca na 20,5 postupiła.
Schadowanka lětsa budźe
Wulku škodu načinili
Bart. Znowa wołachu předwčerawšim policiju do Barta. Hakle spočatk awgusta běchu tam njeznaći historiski bazaltowy zawod pomórali. Tónraz zadobychu so do towarstwoweho domu. Tam su wšitke durje namócnje zwočinjeli, wokna rozbili a rumnosće přepytali. Najskerje chcychu tež telewizor pokradnyć, wostajichu pak jón stejo. Sobu wzali su sportowu tobołu a alkoholiske napoje w hódnoće 80 eurow. Wěcna škoda je wjele wjetša a wučinja něhdźe 8 000 eurow.
Běły Chołmc (AK/SN). Za Běły Chołmc, Tři Žony, Roholń (Riegel) a a Tyhelk (Tiegling) maja so srědki z krajneje pawšale za sylnjenje wjesneho ruma za lěta 2019 do 2021 zaměrnje zasadźeć. To podšmórny Běłochołmčanski wjesny předstejićer Tobias Tillack na zašłym posedźenju wjesneje rady. Za wšitke štyri wjesne dźěle Łazowskeje gmejny maja dohromady 14 000 eurow k dispoziciji.
Hosćency a korčmy su za towaršnostne žiwjenje wažne městna, wšako so tam ludźo rady zetkawaja. Často maja tež zajimawe stawizny. W swojej lětnjej seriji tajke gastronomiske předewzaća předstajamy, dźensa „K serbskej bróžni“ w Nowym Měsće. (17)
Šěsnaće kilometrow sewjerowuchodnje Wojerec je wjes Nowe Město nad Sprjewju. Sydlišćo z něhdźe 400 wobydlerjemi słuša dźensa k Budyskemu wokrjesej. Něhdy bě to ryzy serbske sydlišćo, štož Arnošt Muka 1885 dopokaza. Tež Arnošt Černy tam hišće 1956 zwěsći, zo tři štwórćiny ludźi serbsce rěčachu. Dźensa je tomu bohužel dospołnje hinak. Zwjesela pak, zo maja w Nowym Měsće hosćenc, kiž wjace serbskosće skići hač jenož pomjenowanje „K serbskej bróžni“.
Budyšin (CS/SN). „Bouncować w Budyšinje“ rěka młodźinski festiwal, kotryž towarstwo Kamjentny dom zhromadnje z wjacorymi partnerami – mjez druhim su to Caritas, Němsko-Serbske ludowe dźiwadło, Filmowy festiwal Nysa (NFF) a Wokrjesny sportowy zwjazk Budyšin – wot 16. do 19. septembra wuhotuje. Štyridnjowske zarjadowanje wopřijima dohromady 33 programowych dypkow. Byrnjež so wuraznje wo młodźinski festiwal jednało, je akcija na zajimcow kóždeje staroby wusměrjena. Festiwal ma „dynamiku a pohib do města přinjesć a wobydlerjow do rozmołwy wjesć“, kaž na internetnej stronje zarjadowarjow rěka.
Škitny nahubnik zaso trěbny
Budyšin. We wokrjesu Zhorjelc je wot jutřišeho we wjacorych wobłukach zaso škitny nahubnik trěbny, dokelž bě incidenca po RKI dźensa z 15,2 pjaty raz za sobu kritisku hódnotu dźesać překročiła. Wot soboty hač do wčerawšeho zwěsćichu tam 13 natyknjenjow z koronawirusom. Nahubnik budźe wot štwórtka tež w Budyskim wokrjesu trěbny. Incidenca po RKI dźensa je ze 13,4 pjaty dźeń za sobu nad dźesać.
Přihotuja změnu nošerstwa
Choćebuz. Choćebuski Carla Thiemowy klinikum chcedźa na uniwersitny klinikum w nošerstwje kraja wutwarić, zo bychu w delnjołužiskej metropoli medicinarjow wukubłali. Změnu nošerstwa ma dźěłowa skupina přihotować, připowědźi braniborska ministerka za wědomosć Manja Schüle (SPD) wčera na wosebitym posedźenju tamnišeje zhromadźizny měšćanskich zapósłancow.
Wo wužadanjach debatowali