Budyšin (SN/MWj). Njewšědny pad wobydlerskeje kuraže je policija dźensa w Budyšinje počesćiła. Za swoje zmužite jednanje je Jasmin Schwarz přijała kwěćel a prezent z rukow nawody wobchadneje policajskeje inspekcije, policajskeho wyšeho rady Franka Wobsta, a nawody wobchadneje njezbožoweje słužby Zhorjelskeje policajskeje direkcije, prěnjeho policajskeho wyšeho komisara Martina Hottingera.
15. decembra 2023 bě so na zwjazkowej dróze B 6 pola Błócan (Plotzen) ćežke wobchadne njezbožo stało. Šofer nakładneho awta typa Fiat běše z dotal njeznatych přičin na napřećiwnu jězdnju zajěł. Tam přijěducy wodźer transportera so jemu wuwinyć spyta a zhubi při tym kontrolu nad swojim Mercedesom. Wón zrazy do napřećo jěduceho Audija a skónčnje w přirowje stejo wosta. 64lětny wodźer transportera hišće na městnje wobchadneho njezboža swojich ćežkich zranjenjow dla wudycha. Tež 31lětny wodźer Audija so ćežko zrani. Pozdatny zawinowar njezboža porno tomu prosće ćekny.
Njebjelčicy (AKR/SN). Na wupředatej žurli Njebjelčanskeje „Bjesady“ witaštaj princ Tobias I. a princesna Lucija II. z Wotrowskeho hojenskeho hrodźišća sobotu na prěni kapičkowy wječor lětušeje karnewaloweje sezony. Wosebitaj hosćej běštaj princesna Hanka a princ Franc, kotrejuž jeju staršej přewodźeštaj. Po zaćahu witaše prezident karnewaloweho towarstwa Daniel Wätzig norow a po tym předstaji škričkowa garda ze zapalom gardowu reju. W swojej narěči wěnowaše so Daniel Ričl klimowym aktiwistam, změnje klimy a stawkam burow. Jako Kornelija Kurjatowa za mikrofon stupi, njemějachu mužojo ničo k smjeću. Na to skoržachu akterojo skupiny 0815 (Roman Krječmar, Měrćin Domš a Mathias Wencl) při jědnatce na swoje mandźelske, kotrež problemy mužow chutnje njebjeru. Jich towarš (Tomaš Matka) jim bjezstarostne žiwjenje nježenjenca kaž měd wokoło huby mazaše. „Brunčate bary“ (Chrystof Cyž, Chrystof Mikławšk, Jurij Langa) spěwachu wo wólbernym swěće a problemach klimy.
W zarjadniskim zwjazku Při Klóšterskej wodźe w Pančicach-Kukowje maja wot spočatka lěta Sernjančana Andréja Kobera jako noweho wobydlerskeho policista.
„Jako wobydlerski policist reprezentuju policiju na městnje. Steju při prašenjach kołowokoło policajskich naležnosćow k dispoziciji. Z tym skići so wobydlerjam krótki puć k rjadowanju wobstejnosćow,“ wón rjekny.
Krute sydło ma André Kober dale w Kamjenskim policajskim rewěrje, rěčne hodźiny pak poskićuje kóždu wutoru wot 16.00 do 18.00 hodź. a po dorěčenju w Pančicach-Kukowje. „Njejsym do wšědneho dnja policistow na rewěrje zapřijaty, ale wupomham při wosebitych słužbach kaž běše to njedawno na přikład při stawkowanju burow.“
Planuja skóržbu
Drježdźany. Sakska přetrjebarska centrala planuje zhromadnu skóržbu přećiwo streamingowej platformje Amazon Prime Video. Tuta je mjenujcy připowědźiła, zo chcedźa wot póndźele mjez widejemi wabjenje šaltować. Štóž to nochce, ma měsačnje někak tři euro wjace płaćić. Tute postupowanje je po měnjenju centrale ilegalne.
Wotpokaza zapalerstwo
Wulke Rědorjecy. Poł lěta po tym, zo je so měšćanska cyrkej we Wulkich Rědorjecach wotpaliła, ma so podhladny zapaler wot dźensnišeho před sudnistwom zamołwić. Hnydom na zahajenju procesa w Budyšinje wón wumjetowanja wotpokaza. Wón drje bě na městnje, ale jako wěriwy muž, njeby nihdy na nihdy cyrkej zapalił, wón wuzběhny.
Jězdźenki bórze dróše?
Prawy pokiw dał
Budyšin. Po pokiwje wobydlerja je policija srjedu dopołdnja na zwjazkowej dróze B 6 mjez Budyšinom a Lubijom šofera lepiła, kiž pod wliwom drogow steješe. Wón bě napadnył, dokelž razantnje jězdźeše a riskantnje přesćahowaše. Alarměrowana wobsadka policajskeho awta móžeše 40lětneho čěskeho šofera skónčnje zadźeržeć. Při kontroli so wukopa, zo bě wón konop brał. Nimo toho zastojnicy wotpowědnu substancu w awće namakachu. Dale jěć muž njesmědźeše.
Chrósćicy. Tole staj Choćebuskaj dźiwadźelnikaj Matthias Greupner a Sylvia Burza w dźesać lětnych etapach zmištrowałoj. Startowałoj staj w Zhorjelcu, cil rěkaše Santiago de Compostela w sewjernej Španiskej. Při tym sćěhowaštaj slědam swjateho japoštoła Jakuba. Rady chcetaj přisłucharjow sobu wzać w swojim němskorěčnym přednošku na tutón napjaty puć přez Němsku, Šwicarsku, Francosku a Španisku. W słowach a wobrazach wopisujetaj swoje dyrdomdeje a dataj tež putniskim zajimcam a nowačkam wažne pokiwy za jich prěnje putnikowanje. Přednošk dožiwja zajimcy sobotu, 3. februara, w 19.45 hodź w Chróšćanskej putniskej hospodźe. W 16 hodź su dźěći na serbske dźěćace kino přeprošene.
Debja jutrowne jejka
Budyšin (CS/SN). We wobłuku diskusije wo hospodarskim planje města Budyšina je so srjedu na posedźenju měšćanskeje rady kontrowersna diskusija wo financowanju Kamjentneho domu wuwiła. K tomu bě frakcija Budyski wobydlerski zwjazk namjet zapodał, budget sociokulturneho centruma wo 60 000 eurow skrótšić. Po měnjenju předsydy frakcije Steffena Techa, dóstawa Kamjentny dom wjace pjenjez hač druhe towarstwa. Srědki pak měli so mjez wšitkimi młodźinskimi zarjadnišćemi jenak rozdźělić. Tež tamne towarstwa bědźa so ze stupacymi wudawkami za energiju a dalšimi kóštami wobhospodarjenja. To dyrbja wone z dróšimi čłonskimi přinoškami wurunać. Tež Kamjentnemu domej hodźało so přicpěwać, zastupne pjenjezy snadnje zwyšić. Frakcija AfD namjet podpěrowaše, dokelž po jeje měnjenju poměr mjez spěchowanjom Kamjentneho domu a tamnych towarstwow w měsće njetrjechi.
Wot lěta 2020 su w Rakečanskej gmejnje we wobłuku wosebiteho projekta kamjentne časowe swědki ponowili. Po tróšku ćežkim započatku móžachu projekt nětko dokónčić.
Rakecy (UM/SN). Ponowjenje historiskich pućnikow na teritoriju Rakečanskeje gmejny je wotzamknjene. Kaž wjesnjanosta Swen Nowotny (CDU) zdźěli, móžachu wot lěta 2020 dohromady 23 kamjentnych stołpow při dróhach a pućach po cyłej gmejnje saněrować. „Hač před něšto lětami tele kamjenje runjewon žadyn rjany wonkowny wobraz njemějachu. Čas bě na nich swoje slědy zawostajił“, praji Rakečanski wjesnjanosta.
Lammerta znowa přeprosyli
Budyšin. Bywši prezident zwjazkoweho sejma Norbert Lammert chce na 30. politisku popjelnu srjedu sakskeje CDU w Budyšinje rěčeć. Tole wuchadźa z přeprošenja na zarjadowanje 14. februara. CDU sej kóžde lěto prominentnych hosći na politisku popjelnu srjedu přeprosy, Lammert bě hižo w lěće 2009 z hosćom.
Zwjazk dalekubłanja załoženy
Budyšin. Zastupjerjo chorownjow a wukubłacych domjacych lěkarkow kaž tež domjacy lěkarjo Budyskeho wokrjesa su dalekubłanski zwjazk „Domjacy lěkarjo za wokrjes Budyšin“ załožili. Zaměr zwjazka je mj. dr. dorost při dalekubłanju na powšitkowneho medicinarja podpěrać. Tak ma so přiběracym wobmjezowanjam mediciniskeho zastaranja zadźěwać.
Honjaki F-35 do Čěskeje