Krótkopowěsće (23.08.21)
Tudyša incidenca dale niska
Budyšin. Z hódnotu 3,2 po Roberta Kochowym instituće je dźensa Zhorjelski jedyn z pjeć wokrjesow z najnišej incidencu w Němskej. Ta wokrjesa Budyšina je dźensa 7,3. Minjeny pjatk je tamniši krajnoradny zarjad wo dwěmaj natyknjenjomaj z koronawirusom a dalšim smjertnym padom rozprawjał, w Zhorjelskim wokrjesu mějachu jednu infekciju.
Eksperća Łužicu wopytaja
Choćebuz. Poradźowacy wuběrk za ramikowe zrěčenje wo skiće narodnych mjeńšin přebywa 26. awgusta we Łužicy. Kaž Domowina informuje, chcedźa so eksperća w Žylowskej pěstowarni „Mato Rizo“ w nošerstwje Serbskeho šulskeho towarstwa rozhladować. Tu je wuměna wo wužadanjach a perspektiwach bilingualneho kubłanja předwidźana. W Domizniskim muzeju Dešno zhonja hosćo wo projekće imersije dorosćenych „Zorja“.
Dotal 180 padow ASP zwěsćili
Za poetryslam so přizjewić
Wotrow. Wot přichodneje póndźele hač do 25. awgusta přewjedźe kubłanska referentka Domowiny za młodźinu Virginia Hanuzowa dźěłarničku serbskich a druhich młodych poetow. Jessy James LaFleur dźěłarničku pod hesłom „Zhubjeni poeća“ nawjeduje. Štóž chce so wobdźělić, njech přizjewi so hač do zajutřišeje njedźele e-mailnje pod virginia. .
Hudźba při sportnišću
Němske Pazlicy. Składnostnje Kamjenskeho měšćanskeho swjedźenja, kiž so takrjec město Boršće wotměje, přeproša zajutřišim, njedźelu, wot 17 hodź. na 19. koncert dujerskeje hudźby k Němskopazličanskemu sportowemu a wólnočasnemu centrumej. Koncert wuhotuje Kamjenski dujerski orchester.
Wuhódanje dowoloweje křižowki
Koronoweje pandemije dla lětsa ani tak jednore njeje, so za kmany dowol rozsudźić. Snano měješe runje tohodla tón abo tamny chwile, našu dowolowu křižowku wuhódać. Znajmjeńša smy znowa tójšto dopisow z prawej wotmołwu „Koronu přetrajemy“ do redakcije dóstali.
Slědowacych dobyćerjow smy wulosowali: Nasćěnowu protyku „Łužica“ z Ludoweho nakładnistwa Domowina za lěto 2022 přewostajimy Alfonsej Korjeńkej w Budyšinje. „Oberlausitzer Heimatkalender 2022“ dóstanje Jan Macka w Chrósćicach. A nasćěnowu protyku Budyskeje hwězdarnje za klětu připósćelemy Luciji Endersowej w Radworju.
Policija (20.08.21)
Sornje so wuwinył
Komorow. Ćežke wobchadne njezbožo je so předwčerawšim mjez Komorowom a Rachlowom pola Rakec stało. Tam je so 42lětny wodźer transportera po wšěm zdaću sornje wuwinyć chcył, je pak při tym do štoma prasnył. Ćežko zranjeneho muža dyrbjachu z helikopterom do chorownje dowjezć. Na jeho jězdźidle nasta 21 000 eurow škody.
Wosobiny w srjedźišću
Wěža dóstanje pisany šat
K wosebitej akciji na Pastwinej horje tež Serbowce přinošowałoj
Kamjenc (SN/MWj). We wobłuku Kamjenskeho měšćanskeho swjedźenja dožiwja wobydlerjo a wopytowarjo jutře, sobotu, jónkrótnu akciju. Wěžu na Pastwinej horje z dołhimi plećenymi šlebjerdami, wobstejace z jednotliwych štyriróžkow, dospołnje zapowěsnu. Wot 10 hodź. móža sej zajimcy tole wobhladać.
Ideju měješe angažowana Kamjenčanka a nazhonita putnica Kerstin Boden. Na te wašnje zběra wona dary za ponowjenje sanitarnych rumnosćow putniskeje hospody na Pastwinej horje. Na jeje namołwu přizjewichu so putniscy přećeljo z Němskeje, Šwicarskeje a Nižozemskeje. Dohromady wjace hač 150 ludźi je plećene štyriróžki do Kamjenca pósłało. „Nimale wšědnje dóstach pakćiki a tity připósłane. To bě jara zajimawy čas“, praji 57lětna.
Krótkopowěsće (20.08.21)
Štwórta žołma započała
Berlin/Budyšin/Zhorjelc. Roberta Kochowy institut je w swojej tydźenskej rozprawje wo połoženju koronawirusa zwěsćił, zo je štwórta žołma započała. Za indic maja woni, zo infekcije hinak hač loni zašo a spěšnišo přiběraja. Wosebje młodźi dorosćeni su dźeń a bóle potrjecheni. Incidenca w běhu sydom dnjow registrowanych infekcijow z koronawirusom je po cyłej Němskej 48,8, w Budyskim wokrjesu 7,7 a w Zhorjelskim 4,4.
Serbja w Texasu zaso swjeća
Serbin. Pod serbskim hesłom „Zetkamy so na Serbskim Festiwalu“ přeprošuje towarstwo Texas Wendish Heritage Society lětsa 26. septembra znowa na „Wendish-Fest“. Loni su zarjadowanje koronawirusa dla wotprajili, lětsa wotměwa so 33. króć. Mjez druhim chcedźa wuknjacy šule tamnišeje wosady lutherskeje cyrkwje St. Paul ptači kwas předstajić.
Staroserbske hrodźišćo namakali?
Policija (19.08.21)
Wjele škody – mało rubizny
Budyšin. Hdyž so paduši něhdźe zadobudu, načinja woni druhdy jara wjele wěcneje škody, mjeztym zo je hódnota pokradnjenych wěcow skerje snadna. Tajki pad sta so w nocy na wutoru na Nowosólskej w Budyšinje. Tam zadobychu so skućićeljo do wikowanišća a wzachu z njeho někotre tyzy cigaretow sobu. Kaž Zhorjelska policajska direkcija rozprawja, wučinja wěcna škoda na wšěch 8 000 eurow mjeztym zo běchu cigarety jenož 20 eurow hódne.
Historiske traktory so wubědźowali
Koncertuja na zahrodźe
Budyšin. Na zahrodźe za Budyskim Serbskim institutom wotměje so jutře, pjatk, w 19.30 hodź. Budyski komorny koncert pod hesłom „Tango bjez hranicow – Argentinska, Němska, Budyšin“. Na koncerće pod hołym njebjom čakaja na wopytowarjow wotměnjata hudźba a kulinariske wosebitosće. Wječor wuhotuje skupina Tango Misterio, kotraž zanjese klasiski tango runje tak kaž eksperimenty z tutej hudźbnej formu. Zastupny lisćik za 16 eurow dóstanu zajimcy w Löbnerec hudźbnym domje (tel. 0 35 91 / 4 11 06) abo za 18 eurow při wječornej kasy.
Wusyłaja kemše w radiju
Slepo. Radijowy sćelak MDR Kultur wusyła njedźelu, 22. awgusta, wot 10 hodź. bohosłužbu ze Slepjanskeje cyrkwje. Prědować budźe farar Jörg Michel. Pišćele a spěwna skupina Kólesko kemše hudźbnje wobrubja. MDR Kultur hodźi so přijimać na UKW 96,2. Kemšerjo měli hač do 9.45 hodź. na swojich městnach być.
