Policija (04.08.21)
Trik bohužel zaso fungował
Njedźichow. 35 000 eurow je rentnarka předwčerawšim w Njedźichowje na wobšudnikow zhubiła. Pozdatny policist bě pola 78lětneje zazwonił a jej napowědał, zo je jeje syn wobchadne njezbožo zawinił a mać z dźěsćom ćežko zranił. Z pjenjezami móhła staruška zadźěwać, zo syn do jastwa přińdźe. Pjenjezy přepoda žona na to posołej.
Rjedźa nětko Mału Sprjewju
Wosebite přirodoškitne žadanja dyrbja dodźeržeć
Lichań (SN/MWj). Krajne zarjadnistwo rěčnych zawěrow (LTV) je tele dny započało Mału Sprjewju wot Lichanja we Wulkodubrawskej gmejnje hač do Złyčina we Łazowskej gmejnje rjedźić a hladać. W mjenowanym wotrězku chcedźa přichodne tři lěta brjóhi rěki wobstajnje syc a zadźěwki w rěčnišću wotstronić. Nimo toho dyrbja škody na skłoninach a na pobrjohu wotstronić. Kaž z nowinskeje zdźělenki LTV wuchadźa, budu dźěła, kotrež dohromady něhdźe 520 000 eurow płaća, ze srědkow Swobodneho stata Sakskeje financowane.
Zachowuja stawizny wsy
Pjenjezy ze sakskeho fondsa „Čiń sobu!“ móžachu hižo na mnohich městnach zmysłapołnje zasadźeć. Tež towarstwo z Ptačec je so wuspěšnje na wubědźowanju wobdźěliło. Wone přihotuje so nětko na mały jubilej.
Ptačecy (AK/SN). Šulska a domizniska stwa w Ptačecach wobsteji mjeztym dwaceći 20 lět. Na tule róčnicu so tamniše towarstwo ze swojimi jědnaće čłonami intensiwnje a kreatiwnje přihotuje, kaž předsydka Martina Petschikowa podšmórnje. Rumnosć wo domizniskich a šulskich stawiznach je nětko přewidnišo wuhotowana. Za to su swoje žórła a podłožki přehladali a eksponaty znowa wupytali. Drohoćinki kaž šulska chronika wot lěta 1909, nastawki a wuswědčenja su we witrinach widźeć.
Mjeztym zo minjene lěta kukurica na polach suchoty dla tak prawje ...
Policija jara zwólniwa w krizy naprawy zwoprawdźić
Kak funguje sakska policija w krizowych časach? Nowa přepytowanska studija je wo tym slědźiła – a wuslědki překwapjeja.
Rózbork (UM/SN). Policija wotbłyšćuje towaršnosć, takle to rady ze stron politiki rěka. To po zdaću tež studija wobkruća, kotruž su wčera na policajskej wysokej šuli w Rózborku (Rothenburg) předstajili. W njej přepytowaše tam zaměstnjeny Institut za policajske a wěstotne slědźenje (SIPS), kak začuwaja zastojnicy swoju słužbu w času koronapandemije. Twjerdźenje wšak cyle tak njetrjechi.
Wjesna kupnica z přikładom była(2)
Na wsy wobchod měć dźensniši dźeń wjace samozrozumliwe njeje. We wobłuku lětušeho lětnjeho seriala smy so na wsach rozhladowali, zo bychmy swojim čitarjam tu abo tamnu wjesnu předawarnju předstajili.
Nadměru wulki teddyjowy bar trónuje nad polcami z hrajkami. Zdawa so, kaž by wón wony wobłuk we „wobchodźiku na róžku“ při Rakečanskim torhošću derje wobstražował. Namakaš tam najwšelakoriše wudźěłki, kotrež dadźa wutrobam naj- młódšich kupcow hnydom spěšnišo bić.
„Hrajki su jedyn stołp mojeho poskitka, z kotrymž sym nimo pisanskich tworow wobchod 1995 wotewrěła.“ To praji Martina Kappler, mějićelka małeho raja tysac drobnych tworow. We Wojerowskim hosćencu Treff 8 wukubłana kucharka dźěłaše za čas Němskeje demokratiskeje republiki w kuchni wuwozneho mosta w Bjerwałdskej brunicowej jamje. „Sym rady kuchariła. Towaršnostny přewrót pak skićeše mi šansu so zesamostatnić. Dach so w Budyšinje na drobnowikowansku překupču překubłać. Wšako chcych něšto činić, při čimž mam zwisk k ludźom“, wona powěda.
Krótkopowěsće (04.08.21)
Ideje prašane rěč wožiwić
Budyšin. Załožba za serbski lud přihotuje wupisanje idejoweho wubědźowanja „Rěč zwjazuje. Rěc zwězujo. Sorbisch verbindet.“ Prašane su inowatiwne a naslědne ideje za konkretne regiony, kak hodźała so serbšćina wožiwić a we wšědnym dnju lěpje zakótwić, zo by serbsku zhromadnosć sylniła a identitu skrućiła. Wupisane budu myta w cyłkownej hódnoće 80 000 eurow.
Spontanje so šćěpić dali
Budyšin. Wjace hač 200 ludźi je so wčera w Budyskim Centeru na Žitnych wikach pře koronu šćěpić dało. Akciju chce Budyski wokrjes hromadźe z tamnišim wokrjesnym zwjazkom DRK jutře we Wojerowskim Łužiskim centeru wospjetować. Incidenca w Budyskim wokrjesu je po informaciji RKI dźensa snadnje na 6,3 woteběrała, w Zhorjelskim wučinja wona dale 2,0.
Plany předpołožili
Policija (03.08.21)
Čisło pobrachowało
Miłkecy. Dokelž na jeho jězdźidle prědnje čisło pobrachowaše, je předwčerawšim wječor 22lětny wodźer kwada po puću mjez Miłkecami a Łahowom wobsadce policajskeho awta napadnył. Jako zastojnikaj jeho kontrolowaštaj, napadny jimaj „chorhojčka“ młodeho muža. Test na to wunjese, zo měješe 22lětny 0,66 promilow alkohola w kreji. Dale jěć wón wězo njesmědźeše. Šofer kwada ma nětko z chłostanjom a wotpowědnym sudniskim jednanjom ličić.
Kniha změje premjeru
Budyšin. Křesćan Krawc předstaji zajutřišim, 5. awgusta, swoju knihu „Was wir in uns tragen“ w Budyskej Smolerjec kniharni, a to nimale po zwučenym wašnju w 19 hodź. na městnje. W Ludowym nakładnistwje Domowina wušła zběrka portretow je přełožk publikacije „Sej statok stajili“ a wopřijima tohorunja reportažu wo „Chróšćan zběžku“. Wopytowarjo měli płaćiwe postajenja hygieny wobkedźbować.
Pomhaja pěstowarni
Budyšin. Na iniciatiwu Budyskeho Lionsoweho kluba su so štyri kluby regiona k zhromadnej akciji zjednoćili pomhać wot přepławjenja potrjechenej kónčinje nad rěku Mosel. Budyski klub wobdźěli so z 5 000 eurami. Dorostowa organizacija kluba Leo Club je 2 000 eurow přinošowała. Pjenjezy su za dospołnje skóncowanu pěstowarnju w porynsko-pfalcskim Salmtalu. Dalše pjenežne dary na konto Lionsoweho kluba pod čisłom DE39 8509 0000 5091 8010 37 su rady witane.
Cyła wjes na swjedźenju sportowała
Sernjany (CŠ/SN). W Sernjanach wotměchu minjeny kónc tydźenja swój wjesny swjedźeń w mjeńšim kruhu. Wšako bě hłownje za wjesnjanow samych mysleny. Hibanje a sport steještej při tym w srjedźišću.
Sobotu přeprosychu najprjedy koparjow na wurisanje do tak mjenowaneje socceroweje areny. To je začinjeny dźesać króć 15 metrow wulki štyriróžk, w kotrymž bul cyle spěšnje běži. A to bě něšto za starych knjezow. Wótre wóčko a spěšne přihrawki wjedźechu jich na prěnje městno před Róžeńčanskej młodźinu. Dohromady bě pjeć cyłkow nastupiło. Paralelnje mějachu popołdnju dźěćace poskitki, a to tajke prawe klasikarje. Plackowaj mužej tam běštaj a zdobom drjewjana žerdź, na kotruž móžachu dźěći lězć, zo bychu sej słódkosće abo darik wottorhnyli. Něhdźe 200 dźěći a jich staršich, ale tež młodźi a starši ze susodnych wsow je so na swjedźenišću za wohnjowej woboru zabawjało. Wšako mějachu za nich tež samopječeny tykanc a kofej spřihotowany.
