Slepo (AK/SN). We wobłuku komunalnych projektow za strukturnu změnu njejsu gmejny Łaz, Slepo, Trjebin a Sprjewiny Doł ze žanym předewzaćom za­stu­pjene, kotrež je regionalny přewodźacy wuběrk za Łužiski rewěr poručił spě­chować. Runje wone gmejny běchu a su wot brunicowych jamow a jich sćěhow wosebje potrjechene.

Slepjanski wjesnjanosta Jörg Funda (CDU) ma diferencowany wid na rozsudy přewodźaceho wuběrka. Wón pak zdobom wobkruća, čehodla w gmejnje dotal hišće žane swójske projekty njepředleža. „Mamy tuchwilu ruce połnej dźěła, zo bychmy njezeskutkownjene inwesticije zwoprawdźili resp. nastorčili, kotrež wurostu ze swój čas planowaneho wužiwa­nja wulkeho dźěla našeho gmejnskeho teritorija za hórnistwo. Bojimy so, zo so tu znowa do špatneho połoženja dósta­njemy.“

Žane dalše natyknjenja

Budyšin/Zhorjelc. Nastupajo staw infekcijow z koronawirusom njeje so ani w Budyskim ani w Zhorjelskim wokrjesu porno wčerawšemu ničo změniło. No­wo­natyknjenja njejsu žane zwěsćili. Incidencna hódnota wučinja po Roberta Kocho­wym instituće 0,0 za wokrjes Zhorjelc resp. 2,3 za Budyšin. We woběmaj wokrjesomaj tuchwilu dohromady jenož hišće třoch pacientow stacionarnje lě­kuja.

Krawcowy „Statok“ w němčinje

Budyšin. Na předań je w Ludowym nakład­nistwje Domowina wušła kniha Křesćana Krawca „Was wir in uns tragen – Sorbische Lebenswege“. Publikacija je něm­ska wersija tohorunja wot LND wuda­teje zběrki portretow „Sej statok stajili“ z wosebitym kapitlom wo Chróšćan zběžku. Awtor sam bě so wo přełožk swojeje knihi postarał.

Alimenty nachwilnje stat zaruna

Praha. Płaćenje alimentow za mało­lětnych nastupajo zličeja w Čěskej republice tučasnje 120 000 dołžnikow. Wot započatka julija je pak móžno tele pjenjezy wot stata zarunane dóstawać. Maksimalnje jedna so wo měsačnje 3 000 krónow na dwě lěće. Wupłaćenu sumu sej stat potom wot dołžnikow wróćo žada.

Wětrow/Bóšicy (SN/MiR). Wjacegeneraciske zetkanišćo we Wětrowje čaka nětko na hosći. Jutře, 14. julija, w 16 hodź. móža so zajimcy prěni króć po domskim rozhladować a sej snadź hižo termin za zetkanje ze swójbnymi knihować. Wužiwać móža zetkanišćo předewšěm Wětrowčenjo a wobydlerjo dalšich wsow Bóščanskeje gmejny. Wětrowčanka Ingrid Konschakowa, kotraž ma zetkanišćo čestnohamtsce nawjedować, pak je tež dalšim ludźom poruča.

Wulce zajimawa budźe wopytowarjam biblioteka. Tydźensce srjedu, stajnje wot 16 do 18 hodź., móža sej tam wćipni čitarjo knihi wupožčić, abo tež na městnje čitać. Wšako maja w domje čitanski róžk z přijomnym konopejom. Tež za blidom sedźo móža čitać abo so bjesadować. „To wšak běše wotmysł, tele zetkanišćo wu­tworić“, wuswětla wjesnjanosta Stanij Ryćer (Rjemjesło Bóšicy). „Wobydlerjo přejachu sej městnosć, hdźež móža so zetkać a zhromadnje swjećić.“

Budyšin. Sobotu, 17. julija, wotměje so wot 10 do 16 hodź. wuměłska dźěłarnička „wot běłeho k čornemu“ w Serbskim muzeju. Wona je myslena za młodostnych wot 14 lět. Wuchadźišćo leži we wotwažowanju a wuspytanju grafiskich srědkow a fascinaciji bjezkónčnych móžnosćow mjez běłym a čornym. Kurs nawjeduje wuměłča Maja Nagelowa, přinošk płaći 10 eurow na wosobu. Přizjewjenja su móžne pod telefonowym čisłom 03591/ 270 870 20 abo e-mailnje na , a to hišće hač do štwórtka.

Wobhladaja sej filmy

Drježdźany. We wobłuku Drježdźanskeho filmoweho festiwala pokazaja srjedu, 14. julija, wot 17 hodź. w Drježdźanskim hrodźe Lingner na Budyskej dróze 132 krótkofilmy z Łužicy. Je to zarjadowanje Sakskeho filmoweho zwjazka hromadźe ze serbsko-němskej filmowej syću Łužycafilm. Po tym budźe składnosć k rozmołwje z awtorami a režiserami na hrodowej terasy. Moderaciju změje Cosima Stracke-Nawka. Zajimcy su wutrobnje witani.