Zliwki a strach powodźenjow
Lipsk. Němska wjedrowa słužba warnuje před sylnymi njewjedrami z wulkimi zliwkami. Wone maja wuchodne dźěle Sakskeje w běhu popołdnja docpěć. Tež přichodna nóc ma njeměrna a dešćikojta wostać, pozdźišo wočakuja meteorologojo dalše spadki a zdźěla ćežke hrimanja. Hrozy strach powodźenjow. Jutře budźe podobne wjedro.
Prěnja delta-warianta zwěsćena
Budyšin. W Budyskim wokrjesu su wčera wo dwěmaj koronanatyknjenjomaj informowali. Prěni raz bu delta-warianta wirusa zwěsćena, a to po testowanju šulerjow w jednej Budyskej wyšej šuli, kaž z krajnoradneho zarjada rěka. Incidenca po RKI je tu dźensa 2,0. Wokrjes Zhorjelc rozprawješe wčera wo jednej infekciji a wo smjertnym padźe ze 26. junija. Incidenca po RKI je tam 0,4.
Da Vinci by so wjeselił
Za jězdźenje přemučny był
Čorny Chołmc. Wulkotnje reagowała je předwčerawšim 40lětna wodźerka awta na zwjazkowej dróze B 97 pola Čorneho Chołmca, jako před njej Škoda po puću tam a sem a zdźěla na woběmaj jězdnjomaj jězdźeše. Wona Škodu přesćahny, zadźerža ju a zazwoni policiju. Při alkoholowym tesće so wukopa, zo bě 44lětny šofer dospołnje strózby. Wón pak přizna, zo bě chětro mučny. Policistam bě spěšnje jasne, zo muža takle dale jězdźić njedadźa. Tuž jeho sami k jeho bydlenju dowjezechu, kaž w nowinskej zdźělence Zhorjelskeje policajskeje direkcije rěka. 44lětny změje so přiwšěm wohroženja nadróžneho wobchada dla zamołwić. Policija so žonje za kedźbliwosć dźakuje.
Dźěl kolesa spakosćili
Budyšin. Wot kolesa při Budyskich Schillerowych zelenišćach su njeznaći předwčerawšim prědnje koło wotšrubowali a sobu wzali. Hódnotu rubizny trochuja na něhdźe 120 eurow. Kriminalna słužba Budyskeho rewěra před přepytuje.
Smječkecy (DR/SN). W Domje swj. Jana w Smječkecach su wobydlerjo 19. junija po dołhich přihotach swój lětuši lěćny swjedźeń wotměli. Tydźenje dołho běchu so na njón přihotowali. Skónčnje bě zaso dowolene zhromadnje swjećić. A tak zahaji hudźbny program spěwarka Stefanie Hertel, kotraž wo rjanym blečku zemje spěwaše. Slědowaštaj skupina Puhdys a Rex Gildo, kiž je přitomnych w myslach na mexiski swjedźeń přeprosył. Při słódnym burskim tykancu a dobrej šalce kofeja knježeše rjana bjesada. Jako dźak pilnym pčołarjam Smječkečanskeho domu zanjeseštej jim pčołce swětoznaty spěw Karela Gotta „Pčołka Maja“. Nana Mouskouri přepoda publikumej róže z Athena, Peter Maffay pućowaše po sydom mostach. Pod dešćom papjerjanych wutrobičkow a tójšto mydliznojtych pucherjow słuchachmy a pohibowachmy so k ludowemu spěwej duwa Wildecker Herzbuben. Mócny přiklesk a sobuspěwanje běštej dopokaz, zo so wobydlerjo na čas młodosće dopominachu.
Budyšin (CS/SN). Twarski wuběrk města Budyšina je na swojim wutornym wuradźowanju rozjimał planowany zatwar připrawy, kotraž warnuje před zadobywanjom do Muzeja Budyšin. W přihotach na inwesticiju dyrbjachu přepruwować, kotre kable w domje hižo maja. Za to trěbny wotpowědny nadawk běchu loni w awgusće wupisali. Nažel běchu poskitki wo wjele wyše hač limit 20 000 eurow a ležachu wšitke pola něhdźe 85 000 eurow.
Nadawk bu tuž dalši króć jako wobmjezowany wupisany a poskićerjej, kiž chce jón za 28 000 eurow spjelnić, přewostajeny. Je to předewzaće Elektrobau Drježdźany-wuchod, kotrež je dźěła mjeztym nimale zakónčiło. Tak hodźi so předwidźana alarmowa připrawa nětko dale planować.
Pančicy-Kukow (SN). Pančičansko-Kukowski wjesnjanosta Markus Kreuz (CDU) wjeseli so runja swojemu koleze ze Šěrachowa-Korzyma kaž tež nawodnicy hłowneho zarjada města Njedźichowa. Wšako su zhromadnje z wohnjowymi wobornikam njedawno z rukow přirjadnicy Budyskeho krajneho rady Birgit Weber klučiki za swoje nowe wohnjowoborne awta typa LF-KatS přijeli. Jězdźidła narunaja stare awta typa LF 16-TS, kotrež běchu wot lěta 1994 zasadźene. Hódnota tajkeho noweho jězdźidła wučinja něhdźe 230 000 eurow. Wone su wobšěrnje za hašenje wohenjow a za technisku pomoc wuhotowane a přinjesu hač do dźewjeć wobornikow na zasadźenje. We wobłuku katastrofoweho a ciwilneho škita hodźa so tele jězdźidła za zastaranje z hašenskej wodu na dlěše čary sobu zasadźeć. W tym zwisku čaka Budyski wokrjes hišće na připokazanje Zwjazka za dalše, štwórte tajke woborne awto. Potom budźe cyłkowny wobstatk hašenskich jězdźidłow wobnowjeny.
Wotchadnicy zaso swjeća
Budyšin. Absolwenća serbskich wyšich šulow a Budyskeho Serbskeho gymnazija smědźa pod wolóženymi wuměnjenjemi pandemije lětsa zaso wotchadnički swjećić. 17. julija chce nawoda gymnazija René Wjacławk lětušim wotchadnikam, zhromadnje z wučerjemi w Němsko-Serbskim ludowym dźiwadle abiturne wuswědčenja přepodać. Na to slěduje abibal w Chróšćanskej „Jednoće“, kotryž maturanća nětko po hygienowym koncepće přihotuja.
Wjetšina komunow bjez korony
Budyšin. W 43 mjez 57 komunami Budyskeho wokrjesa žadyn koronapad wjace njeje, krajnoradny zarjad wčera zdźěli. Dotal je wjace hač 110 000 wobydlerjow jónu pře koronu šćěpjenych, 85 000 dospołnje. Incidenca po Roberta Kochowym instituće we wokrjesu wučinja dźensa 1,3. Zhorjelski wokrjes ma po RKI druhi dźeń incidencnu hódnotu nul.
Srědki za cyłodnjowske poskitki
Budyšin. Rěčny centrum WITAJ přeproša na čitanski dyrdomdej, kotryž wotměje so lětsa na Budyskich wěžach. Pjatk, 9. julija, přewjedźe RCW znowa w kooperaciji z Němsko-Serbskim ludowym dźiwadłom z 20 šulerjemi 3. a 4. lětnika serbskich šulow wosebite čitanje. W starym měsće wopytaja wobdźělnicy tři wšelake wěže, zhonja wo jich stawiznach a čitaja sej na wěžach mjez sobu ze swojich najlubšich serbskich knihow. Piknik, zabawne hry a kónčny kwis zhromadne dožiwjenja skulojća. Na prašenja wotmołwja Michaela Hrjehorjowa w RCW pod telefonowym čisłom 03591 /550414.
Wuznamjenja najlěpše ideje
Kulow. Dobyćerjo idejoweho wubědźowanja Leaderoweje kónčiny Hornjołužiska hola a haty 2021 přijmu swoje myto tónle pjatk, 9. julija, w 10 hodź. při Krabatowej steli na Kulowskim torhošću. Tam prezentuja potom tež dobyćersku ideju „Bachtać ze Šajatovićom“. Wšitcy zajimcy, kotřiž chcedźa z časom być informowani, su přeprošeni. Wothłós na wubědźowanje k sylnjenju małeje turistiskeje infrastruktury běše chětro wulki. Dóšło je 22 přinoškow z cyłeho regiona.
Třo ćežko zranjeni při njezbožu
Horni Wujězd. Při najězdźe Horni Wujězd na awtodróhu A 4 do směra na Drježdźany je wčera wokoło 11 hodź. k ćežkemu njezbožu dóšło. Šoferka wosoboweho awta VW Touran přewidźa při wotbočenju na A 4 napřećo jěducy Škoda, kotryž měješe předjězbu, a zrazy do njeho. Tři wosoby so při tym ćežko zranichu, tři dalše lochko. Wohnjowi wobornicy z Hornjeho Wujězda a z Jědlicy kaž tež policija běchu spěšnje na městnje. Za čas wobdźěłanja njezboža dóńdźe do wšěch směrow ke kopjenju wobchada, dokelž je tež Porchowski najězd na A 4 twarskich dźěłow dla zawrjeny.