Njebjelčicy (SN/JaW). Nimale z eklatom je so zašłe wuradźowanje Njebjelčanskeje gmejnskeje rady minjeny štwórtk w tamnišim gmejnskim centrumje zakónčiło. Přičina su rozestajenja w gremiju nastupajo lětuši hospodarski plan.
Prěnju konsekwencu komuna skostnjenych frontow w swójskich rjadach dla hižo ma. Ke kóncej posedźenja Frank Domš připowědźi, zastojnstwo złožić. Za přičinu mjenowaše wón njeakceptabelne mjezsobne wobchadźenje radźićelow. „Njewidźu za sebje hižo wjace móžnosć, gmejnje pomhać a dale dźěłać.“
Prěni raz delta-mutaciju zwěsćili
Zhorjelc/Budyšin. Wo prěnim natyknjenju ze strašnišej delta-mutaciju koronawirusa su po sekwenciji minjeny pjatk w Zhorjelskim wokrjesu rozprawjeli, kaž tež wo dalšej zwěsćenej infekciji. Incidenca po RKI je tam dźensa 5,1. W Budyskim wokrjesu informowachu nastupajo koronu wot pjatka hač do wčerawšeho wo třoch nowych natyknjenjach a jednym smjertnym padźe. Incidenca po RKI je tu dźensa 5,3.
Namjetuja swjatočnosć w Zahorju
Njechorń. Rozjimajo lětuše projekty wupraja so čłonojo předsydstwa župy „Jan Arnošt Smoler“ Budyšin za to, wjacore popołdnja za swójby w župje podpěrać. Za lěto Zejlerja a Smolerja namjetuja woni, w decembrje 2022 swjatočnosć w Zahorju pola Budestec na česć Korla Awgusta Kocora wuhotować. Třěšny zwjazk měł zarjadowanje organizować.
W zastojnstwje wobkrućeny
Motorske so zwróćiło
Židźino. Na Starej Berlinskej w Židźinom je minjenu nóc wokoło 22.15 hodź. motorske znjezbožiło. Na statnej dróze S 234 zwróći so z dotal njeznateje přičiny šofer ze swojej mašinu, jako bě do směra na Wojerecy po puću. Ćežko zranjeneho muža nětko w chorowni lěkuja.
Na Hłownej dróze znjezbožiłoj
Korzym. Tež přičina njezboža w Korzymje dotal znata njeje. Tam stej wčera wječor awće Audi a Seat při wotbočacej Hłownej dróze do so zrazyłoj. Dwě wosobje so zraništej, zo dyrbjachu jej lěkarsce zastarać. Dobrowólna wohnjowa wobora Korzym-Rodecy je so wo wuběžane kapaliny starała. Policija njezbožo nětko dale přepytuje.
Kamjenc. Přichodnu póndźelu, 21. junija, wotewru Kamjensku kupjel tež zaso za wopytowarjow a towarstwowy sport. Šulerjo poskitk hižo wjacore tydźenje zaso wužiwaja. Płuwać móža zajimcy tam zaso w zwučenych časach, nimo srjedy. Tón dźeń je kupjel stajnje zawrjena. Sawnu wopytać njeje płaćiwych postajenjow korony dla móžno. Wosebity poskitk maja pjatk wot 9.45 do 10.45 hodź. To su předewšěm rentnarjo do hale přeprošeni. W hali pak njemóža zajimcy jeničce čary płuwać, ale móža tež wulke suwadło a dalše poskitki zabawneho razu wužiwać.
Dalše wolóženja čitarjam
Kamjenc/Njebjelčicy (SN/MiR). Wobdźěleni na Dnju wotewrjenych zahrodkow, kotryž towarstwo Stadtwerkstatt Kamenz-Bürgerwiese z podpěru Kamjenskeho citymanagementa přewjedźe, su nimo Kamjenčanow tež lětsa zaso mějićeljo zahrodkow na wsach wokoło Lessingoweho města, druhi króć mjeztym Čornakecy w Njebjelčicach. Tak móža sej wopytowarjo zajutřišim, njedźelu, wot 10 do 18 hodź. tež pola nich zaso tójšto nowe wotkryć.
W Kamjencu a wokolinje chce lětsa na wšě 23 hobbyjowych zahrodkarjow zajimcam wrota do swojeho raja wotewrěć. Njedźelu změja tuž wćipni mcy w Lessingowym měsće samym na wjacorych městnosćach składnosć so wobhonić, kak móža sej zahrodku wuhotować. Tam su šesćo nowi partnerojo.
Wšelcy hosćencarjo w Kamjencu so na wosebity dźeń přihotuja a poruča poskitki, kaž bowlu z kćenjow a truskalcowe speciality. Nimo toho chcedźa hudźbni šulerjo muzicěrować a spěwać.
Wot dopołdnja dźesaćich was tule rady witaja
W Kamjencu samym:
- swójba Hasselbach / Eickhoffowa – Połčničanska 32 / Schillerowe promenady
- swójba Schöne – Połčničanska 78
- swójba Schönherr – Połčničanska 61
- swójba Tschentscher – Lěsna zahroda na Reinhardsbergu
- swójba Peuker – Połčničanska 73 (nowy wobdźělnik)
- swójba Wolf – Schillerowe promenady / Połčničanska 6 (nowy wobdźělnik)
- swójba Friedrich / Bäuerlowa – Zelena hasa / při Pollakec polstrowarni (nowy wobdźělnik)
- swójba Kirschke – Wojerowska 43 (nowy wobdźělnik)
- swójba Pastor – Hasa při tworowym dwórnišću (Güterbahnhofstraße) / Kinsporkska přijězd k Scheffler (nowy wobdźělnik)
- swójba Braun – Lessingowe naměsto 13 (nowy wobdźělnik)
Wjesne dźěle w susodnych gmejnach:
- swójba Čornakec – Njebjelčicy, Hłowna 4
- swójba Glücklich – Jěžow, Njeswačanska 20
- swójba Fessel – Čornow, Při lětanišću 22
- swójba Peters – Lückersdorf, Am Walberg 11
- swójba Bräuer – Hennersdorf, Bischheimski puć 2
- swójba Hilsberg – Běła, Stara šulska 2
- swójba Röseberg – Běła, Stara šulska 5b (nowy wobdźělnik)
- swójba Hetmank – Schönbach, Chójnowy puć 14 (nowy wobdźělnik)
- Frau Zens – Brěznja, Brěznjanski cyrkwinski puć 60a (nowy wobdźělnik)
- Mareen Hoch a Silke Wild, Brěznja, Biskopska 25
Ralbicy (JK/SN). Gmejnska rada Ralbicy-Róžant je na wčerawšim posedźenju swojeho swěrneho čłona Michała Šołtu (Swobodne wolerske zjednoćenstwo Delany) z čestnohamtskeho skutkowanja w gmejnskim parlamenće rozžohnowała. Po wjac hač 30 lětach dźěła w zastupnistwje gmejny, z toho wjacore lěta jako zastupowacy wjesnjanosta, so Šołta nětko na zasłuženy wuměnk poda.
Za spomóžne skutkowanje na dobro komuny dźakowachu so jemu wjesnjanosta Hubertus Ryćer (CDU) runje tak kaž zastupjerjo wšitkich w gmejnskej radźe zastupjenych frakcijow. Michała Šołtu wuznamjenja wosebje jeho měrne, posrědkowace a wujednawace wašnje, štož je so na mnohe rozsudy gmejnskeje rady pozitiwnje wuskutkowało. Jako jeho naslědnika zawjazachu Konječana Křesćana Gruhna (Swobodne wolerske zjednoćenstwo Delany), kiž ma tohorunja hižo wjacore lěta nazhonjenja w čestnohamtskim dźěle jako gmejnski radźićel.
Hamor (AK/SN). Bjerwałdski jězor ma turistiski magnet wostać. Zdobom maja tam rědke družiny ptačkow škitane być. Na wódnej płoninje w formje trapeca nimaja tuž přichodnje žane wodojězdźidła po puću być. To je dopóznaće krajneje direkcije Sakska, kotraž reaguje na protesty Hamorskeje gmejny, sakskeho zwjazka płachtakowarjow a krajneho zwjazka wudźerjow. 27. apryla bě wjesnjanosta Achim Junker (CDU) prezidentce direkcije Reginje Kraushaar wotpowědny list ze stejišćemi přepodał. Přichodne posedźenje gmejnskeje rady ma słužić dorozumjenju. Zaměr direkcije je, wot potrjechenych stron akceptowane prawniske žadanja za časowje wobmjezowane wužiwanje docpěć. „Krajna direkcija žane přirodoškitne pasma njepostaja. Wona pak wukazuje dźěle wodźiznow, kotrež nimaja wodojězdźidła wužiwać, dokelž zwjazkowy zakoń wo škiće zwěriny zakazuje dźiwje ptaki kruće škitanych družin mylić“, zdźěli rěčnik zarjada dr. Holm Felber.