Worklecy budu bórze wo zajimawostku bohatše, hdyž tam nowa dnjowa hladarnja oficialnje dźěłać započnje. Pjatk, 18. junija, móža sej zajimcy wšitko dokładnje wobhladać.

Worklecy (SN/MWj). Po jednym lěće twarskeho časa a dalšej chwili přihotow je nětko we Worklecach nowa dnjowa hladarnja za staršich ludźi hotowa. Nastała je wona w bywšej wjesnej předawarni, kotruž staj Šnajderec mandźelskaj Jěwa-Marija a Carsten kupiłoj a wobšěrnje přetwariłoj. Rady byštaj wonaj hladarnju z jeje 18 městnami hižo prjedy wotewrěłoj, ale běrokratiske zadźěwki běchu zdźěla hoberske a dyrbjachu so hakle přewinyć.

Nowe dopóznaća wo stawiznach, ze Serbami zwjazanych

Čorny Chołmc (SiR/SN). Susann Wuškec a Hans-Jürgen Schröter staj minjene šěsć měsacow pod nawodom Čornochołmčanskeho Krabatoweho młyna so ze stawiznami wsy kaž tež z jeje historiskimi zwiskami a jeje wokolinu, z Krabatowej baju a z Chorwatskeje pochadźacym wyškom Jankom Šajatovićom zaběrałoj. ­Minjenu sobotu staj wonaj projekt wo­srjedź wsy, na naměsće před Frenclowym domom, předstajiłoj. „Team je so jara angažował a přewšo hódne fakty wotkrył. Njedosaha jeničce na powjerchu škrabać. Sym dźakowny za historisce hłuboko sahace dźěło. Tajki projekt w tej formje dotal njemějachmy“, podšmórny jednaćel Krabatoweho młyna Tobias Čižik. Zdobom so wón wjeseleše, zo bu předewzaće z kulturneho fondsa Budyskeho wokrjesa financowane.

Wjace hač 40 připosłucharjow běše přeprošenje sćěhowało, mjez nimi iniciatorka młyna Gertrud Wincarjowa. Woni zhonichu na přednošku pak jeničce dźěl dotalnych dopóznaćow. Wobsah slědźenjow je wo wjele wobšěrniši.

W Čornym Chołmcu husto z nowinkami překwapjeja. Samo hižo spisane stawizny njejsu do kamjenja bite. To znajmjeńša lubja dopóznaća Susanny Wuškec a Hansa-Jürgena Schrötera. Sym hižo časćišo w Čornochołmčanskej Marinej cyrkwi była. Zo pak bě wona do reformacije putniska cyrkej – za katolskich wěriwych – to dotal njewědźach. Jónu běch słyšała, ale wědome mi to hižo njebě, zo ležeše Čorny Chołmc něhdy na kromje saksko-braniborskeje mjezy. Znowa wuwědomiła sej sym, zo bě so tam narodźił sławny Serb a wučer Dabit Boguwěr Głowan. Prašam so jeno, čehodla je so pozabyło na hódnotu wsy jako „kowarnje“ kubłanych dźěći a młodostnych? Dźensa wšak we wsy ani hižo šulu nimaja. Wěm pak sej předstajić, kak je k wuslědkam slědźenja dóšło. Duch Krabata, historiskeho kaž tež bajoweho, we Łužicy nadal skutkuje. Snadź nětko, napjelnjeni ze staro-nowymi dopóznaćemi, wědomišo do Čorneho Chołmca „putnikujemy“. Milenka Rječcyna

Dźeń a mjenje natyknjenjow

Budyšin. W Budyskim wokrjesu informowachu wčera wo jednym natyknjenju z koronawirusom. W tudyšich chorownjach lěkuja tuchwilu 44 koronapacientow, z nich dwanaće na intensiwnej sta­ciji. Incidenca po RKI je tu dźensa 13,7. We wokrjesu Zhorjelc registrowachu wot soboty hač do wčerawšeho tři dalše infekcije a dwaj smjertnej padaj z časa wot 2. do 4. junija. Incidenca po RKI je tam 6,7.

Sputnik z ekologiskeje surowizny

Eespo/Paris. Finske předewzaće Arctic Astronautics a europska swětnišćowa agentura ESA wuwiwatej prěni přewažnje drjewjany satelit, kotryž chcedźa hišće lětsa do orbita dowjezć. Zaměr projekta „WISA Woodsat“ je wobkedźbować, kak so bjezćežitosć a radiacija w kosmosu na drjewo wuskutkujetej, a wuslědźić, hač hodźało so wone tam jako alterna­tiwa na přikład k zwjazowanskim maći­znam (Verbundstoffe) wužiwać.

Nahrawaja w Čěskej Šwicy