Wojerecy (SN/MWj). Wot minjeneho štwórtka ma Wojerowski coo dalšu atrakciju, mjenujcy dwulětnu kobłu, wjelbłuda (dwuhorbateho kamela) Soraya. Wona je so dwójce Jeanine a Gerda přidružiła. „Sym dołho za dalšej žónku za naš zwěrjenc pytał. Ćim bóle mje zwjesela, zo sym tajki rjany eksemplar namakał“, powěda coologiski nawoda Eugène Bruins w nowinskej zdźělence.
Zańdźeny štwórtk dopołdnja je młoda dama z nižozemskeho zwěrjenca Dierenrijk Nuenen dojěła. K zadźiwanju tamnych zwěrjatow jědźeše wona na swojim transportnym wozu direktnje hač k swojej nowej hródźi. W njej tydźeń wostanje, zo by so zažiwiła. Hakle po wšitkich skótnolěkarskich přepytowanjach móže sej Soraya potom wonkowne připrawy wobhladać. Zeznała pak wona Jeanine a Gerdu hižo je, dokelž je w hródźi wot njeju jeno z połwysokej murju dźělena.
Dźěwin (AK/SN). Hospodarski plan srjedźołužiskeje gmejny Dźěwin za tele lěto je wulkich sumow za wutwar šěrokopasmoweje techniki chětro poćeženy. Na to skedźbni komornica Carmen Petrick na zašłym posedźenju gmejnskich radźićelow. Woni lětuši etat přiwšěm jednohłósnje schwalichu.
Hač budźe lětsa w lěću scyła móžno so w zjawnej kupjeli wočerstwjeć, je wulke prašenje. Přiwšěm město Běła Woda za swoju kupjel pjenjezy přewostaji a hižo nětko sezonu planuje.
Běła Woda (AK/SN). Jahnowa přirodna kupjel w Běłej Wodźe ma hižo bórze wopytowarjow witać. Wobhospodarjeć chce ju w lěće 2021 město Běła Woda same. Za to přewostaji wone 30 000 eurow ze swojeho komunalneho etata, kaž měšćanscy radźićeljo na swojim zašłym posedźenju wobzamknychu.
Kupjel běchu w lětomaj 2019 a 2020 ze spěchowanskimi srědkami z Europskeho fondsa za regionalne wuwiće přetwarili. Zo bychu po přetwarje wobhospodarjenje zaručili, měšćanscy radźićeljo hižo lěta 2018 wobzamknychu, zo měło město 30 000 eurow za kupjel přewostajić. Tule sumu su do lětušeho hospodarskeho plana zapřijeli. Na přichodnym posedźenju w meji dyrbja so radźićeljo wospjet z Jahnowej kupjelu zaběrać a potom wustawki wo popłatkach wobzamknyć.
Biskopicy (SN/at). Přesunjenja koronapandemije dla w Budyskim wokrjesnym zwjazku Budyšin Swobodnych wolerjow dale z wulkej starosću sćěhuja. Wokrjesne předsydstwo je tohodla tři minimalne žadanja formulowało, wo kotrychž informowachu wčera w nowinskej zdźělence. Tudyši Swobodni wolerjo su přećiwo kóždemužkuli wobmjezowanju, bydlenje wopušćić. Gastronomiske zarjadnišća maja hnydom zaso wočinić. Při tym wobsteji winowatosć nahubnik wužiwać, wotstawki dodźeržeć a koncentraciji aerozolow zadźěwać. Wotewrěć dyrbja dale sportowe a wólnočasne připrawy pod hołym njebjom.
„Wot nazymy postajene zawrjenja w gastronomiji, sportowych připrawow kaž tež wuchodowe a kontaktne wobmjezowanja we wonkownych wobłukach su ludnosć dźeń a bóle do priwatneho wobłuka nuzowali. Z tajkimi njepřihódnymi naprawami je so pandemija prawdźepodobnje hišće přiwótřiła, z čimž dyrbi nětko kónc być. Nadźijamy so dosć konstruktiwneje debaty w zwjazkowym sejmje a w naslědnym jednanju w Zwjazkowej radźe“, w informaciji dale rěka.
Ličba natyknjenjow dale přiběra
Budyšin. W Budyskim wokrjesu informowachu wot pjatka hač do wčerawšeho wo 323 dalšich natyknjenjach z koronawirusom. Ličba smjertnych padow powjetši so wo tři na 823. Kaž sobotu rěkaše, su dotal we 80 testowanskich centrumach 40 000 spěšnotestow přewjedli. Incidenca wučinja po RKI dźensa 256,5. We wokrjesu Zhorjelc rozprawjachu wčera wo 28 dalšich koronainfekcijach. Tamniša incidenca je po RKI dźensa 248,1.
Testowanski centrum w NSLDź
Budyšin. 23. apryla wočinja w Budyskim NSLDź testowanski centruma. Słužić ma wón jako zakład za modelowy projekt w měsće. W socieće na Burskej hasy móža so wšitcy darmotnje na koronawirus testować dać, trěbna za to je chipowa kartka chorobneje kasy. Terminy su móžne na internetnej stronje . App „Schnelltest.click“ wo wuslědku testa informuje.
„Łužiskohórski spěšnik“ po puću
Radwor (SN/MkWj). Financne połoženje gmejny steješe w srjedźišću srjedowneho posedźenja Radworskeje gmejnskeje rady. Komornica Melanie Mihan měješe dosć wobšěrnu prezentaciju přihotowanu, zo by radźićelow a hosći informowała. Gmejna chcyła nimale runje telko wudać, kaž ma dochodow. Te ma gmejna předewšěm z klučowych připokazankow swobodneho stata, z podźěla na wjacehódnotowym dawku, z přemysłoweho dawka a z ležownostneho dawka. Koronapandemije dla su straty pola přemysłoweho dawka tónraz wosebje bolostne: Dochody woteběrachu loni wot 1,1 miliona na runje hišće 110 000 eurow, komornica rozłoži.