Bjez jězbneje dowolnosće po puću

Wojerecy. Po wšěm zdaću hižo dlěje hač 16 lět Wojerowčan bjez jězbneje dowolnosće z awtom jězdźi, kaž je so předwčerawšim při wobchadnej kontroli wukopało. Krótko po 8 hodź. zadźeržachu policisća 34lětneho z jeho Polom na Kulowskej dróze we Wojerecach a chcychu jeho jězbnu dowolnosć widźeć. Tu pak wón pokazać njemóžeše, dokelž bě ju hižo lěta 2004 wotedać dyrbjał. Što je tehdy ­skućił, z policajskeje rozprawy bohužel njewuchadźa. Jako přewjedźechu pola młodeho muža na to drogowy test, reagowaše tón pozitiwnje na amfetaminy. Wojerowčan dyrbješe swój Polo tuž stejo wostajić, zastojnikam kluče přepodać, awtowe papjery wotedać a z policistami k „darjenju“ kreje sobu jěć. Přećiwo njemu přepytuja nětko jězdźenja bjez dowolnosće a pod wliwom drogow dla.

Sernjany. Wuměnkar Měrćin Wjenk ze Sernjan so rady ze swojej mandźelskej wuchodźuje. Bohužel njeje pak dotal mjez Sernjanami a Nowej Wjesku žana ławka stała, zo byštaj so posydnyć a wotpočnyć móhłoj. Tak zrodźi wón loni zajimawu mysličku. Cyłu zymu dźěłaše na ławce, kotruž je nětko hromadźe ze susodom Benom Brücknerom minjene dny stajił. Jako so wjesnjenjo runje wuchodźowachu, zetkachu jeju při dźěle. Na prašenje, štó je Měrćinej Wjenkej nadawk dał, so wón směješe a wotmołwi: ,,Štó da by mi to kazać dyrbjał?‘‘ Jakub Barč znajmjeńša bě hordy, zo smědźeše jako prěni na ławce sedźeć. Wón so w mjenje wšitkich wjesnjanow Měrćinej Wjenkej za jeho angažement dźakuje.

Budyšin. Hinak hač hišće minjene dny planowane, njemóže Budyska měšćanska biblioteka stupaceje ličby natyknjenjow z koronawirusom dla wočinić. Přiwšěm je tam dale móžno sej knihi wupožčić. Móžno je to mjez druhim přez hornjołužiski wupožčowanski zwjazk Onleihe. Ze streamingowej słužbu Filmfriend poskićeja nětko tež wulki ličbu ­filmow a dokumentacijow. Štóž chce dale prawu knihu w rukomaj dźeržeć a ju čitać, móže swoje přeća bibliotece spo­srědkować a sej skazane knihi po terminje wotewzać. Wotběžane bibliotekowe wupokazy hodźa so za čas zawrjenja telefonisce podlěšić, nowe hodźa so po samsnym puću skazać.

Wirtuelnje do muzeja

Kamjenc. Hišće hač do 11. apryla pokazuje Kamjenski Muzej zapadneje Łužicy wosebitu wustajeńcu wo kóncu lodoweje doby we Łužicy. Njedźelu, 28. měrca, w 14 hodź. poskića tam wirtuelne wodźenje po přehladce z archeologowku Hannah Knittel. Zajimcy njech přizjewja so najpozdźišo hodźinu do spočatka wodźenja pod .

Nowy błyskać nastajili

Jutrowny štomik zawjesela wot minjeneho kónca tydźenja wobydlerjow a nimo jěducych w Hórnikecach. Wupyšili su jón bywša wjesna předstejićerka Karin Turek, jeje mandźelski Johannes, dźensniša předstejićerka Ulrike Neumann a jeje mandźelski Hubertus (wotprawa). Poprawom chcychu k tej składnosći wobydlerjow na słódne plincy a małe čaporowe wiki přeprosyć, pandemije dla pak to móžno njebě, runje tak kaž hižo loni. Swójby z dźěćimi a dalši zajimcy móža jutrowny štomik před wobydlerskim centrumom rady kreatiwnje wudospołnić. Foto: Andreas Kirschke