Sćijecy (SN/MWj). Dźakowano angažementej Sćiječanskeje wjesneje rady, pjenježnym a wěcnym daram mnohich firmow kaž tež skutkownej podpěrje mnohich staršich, dźěći, młodostnych, dźědow a wowkow je nětko w Sćijecach pola Budyšina nowe hrajkanišćo nastało. Wone ma so z dalšim zetkanišćom za młódšich a staršich w tymle měšćanskim dźělu Budyšina stać.
Minjeny štwórtk je sej fachowc TÜVa jednotliwe nastroje na hrajkanišću wobhladał a njeměješe na nich ničo porokować, rěka w zdźělence Budyskeho měšćanskeho zarjadnistwa. Tak hodźeše so hrajkanišćo hižo zjawnje wužiwać. Runje w tym wokomiku přichadźeštaj dźěd a wowka ze swojej wnučku. Wonaj běštaj hakle njedawno z Durinskeje do Budyšina přićahnyłoj a staj minjeny čas wobkedźbowałoj, kak nowe hrajkanišćo nastawa. Nětko chcyštaj z wnučku pohladać, kak daloko wšitko je. To běchu sej wšitcy třo runje prawy wokomik wupytali. Dwulětna holčka bě takrjec prěnje dźěćo, kotrež so na přepodatym hrajkanišću w Sćijecach pospyta a sej tam jednotliwe nastroje dokładnje wobhlada.
Łaz (AK/SN). Předewzaće za wobnowjomne energije Ostwind z Regensburga chce na terenje bywšeje Šibojskeje (Scheibe-) brunicoweje jamy solarny park natwarić. „Na te wašnje hodźał so něhdyši industrijny teren zmysłapołnje wužiwać“, podšmórny twarski nawoda Łazowskeje gmejny Wolfgang Tietze na zašłym posedźenju jeje radźićelow. Woni jednohłósnje schwalichu, za tónle projekt zdźěłany twarski plan wupołožić.
Dźěl wuchodneho teritorija Budyskeho wokrjesa je škitne pasmo přećiwo hrožacej afriskej swinjacej mrětwje. To zaběra tež wjesnjanostow a měšćanostow potrjechenych komunow.
Rakecy (CS/SN). Wjesnjanosća komunow, kotrež su dospołnje abo zdźěla jako pasmo přećiwo afriskej swinjacej mrětwje wupokazane, z naprawu poměrnje jednorje wobchadźeja. Wotpowědnje postajenjam wosebite informacije při wjesnych taflach na pasmo skedźbnjeja. Rakečanski wjesnjanosta Swen Nowotny (CDU) je wjesoły, zo swojej gmejnje hižo žane wjetše kormjernje swini nima. Kelko wobydlerjow pola sebje doma swinje plahuje, wo tym wón žadyn přehlad nima. Znajmjeńša dotal žane informacije k tomu dóstał njeje. Tuchwilne połoženje Nowotny hišće za překritiske nima.
Radworska wjesnjanostka Madeleine Rentsch (Domizniscy přećeljo Minakał) praji, zo je jenož sewjerny dźěl teritorija jeje gmejny potrjecheny, předewšěm wokoło Minakała. Tam su tež wotpowědne informacije připrawili, kotrež běchu wot wokrjesa dóstali.
Wot jutřišeho wolóženja cofnu
Budyšin. Wokrjes Budyšin wot jutřišeho wolóženja pod wuměnjenjemi koronapandemije zaso cofnje. Wšako bě minjena sobota třeći dźeń za sobu, hdźež bě incidenca wokrjesa po RKI hódnotu sto překročiła. Sakske škitne postajenje korony dla krok předpisuje. Přez kónc tydźenja zwěsćichu tu 299 nowych infekcijow a dwaj smjertnej padaj. RKI mjenowaše dźensa rano incidencu 185,5.
Za a přećiwo MSPI
Kiel/Podstupim. Hinak hač Braniborski krajny sejm je parlament Schleswigsko-Holsteinskeje pjatk wobzamknył wobydlersku iniciatiwu Minority SafePack (MSPI) dale podpěrać. Wjetšina wšitkich frakcijow bě za to hłosowała. Srjedu bě so w braniborskim sejmje dwanaće zapósłancow za podpěru MSPI wuprajiło, 53 přećiwo tomu – mjez nimi ministerski prezident Dietmar Woidke –, jedna zapósłanča so hłosa wzda.
Čas a městnosć kongresa jasnej
Wobchadne znamjenja fuk
Debricy. Njewšědnu rubiznu wupytali běchu sej njeznaći w nocy na srjedu w Debricach (Döbra) we Wóslinčanskej gmejnje. Tam zhubi so z twarnišća na Młynskim puću sydom wobchadnych znamjenjow. Kaž policija zdźěli, jedna so mjez druhim wo znamjenja za wobmjezowanje spěšnosće, stop, zakaz přesćehnjenja a dalše. Jich hódnotu trochuja na něhdźe 500 eurow.
Budyšin. Slěd Budyskich komornych koncertow dale planuja. Dotal drje je kaž planowane wotměć njemóžachu, za to pak su za kóždy jednotliwy koncert narunanski termin našli, mjez druhim za Lipšćanski načolny ansambl acappella-sceny. Folkowe spěwy ansambla Calmus njebudźe tuž kaž najprjedy předwidźane jutře, 27. měrca, ale 28. meje w Budyskej cyrkwi swjateju Marje a Marty.
Porěča wo brunicy
Budyšin. Wuskutki wužiwanja brunicy w Sakskej steja w srjedźišću wirtuelneho zarjadowanja, na kotrež přeprosy Budyski Zeleny wobchod póndźelu, 29. měrca, wot 19 hodź. Zakład diskusije budźe wuhlowy atlas, wudaty wot organizacije BUND a Heinricha Bölloweje załožby. Wo atlasu porěča Jutta Wieding ze sakskeho předsydstwa BUND, statny sekretar w sakskim ministerstwje za energiju, wobswět a ratarstwo dr. Gerd Lippold a zapósłanča Zelenych w krajnym sejmje Lucie Hammecke. Daty za přistup k zarjadowanju dóstanu zajimcy e-mailnje pod .
Wojerecy (AK/SN). Po dobrych nazhonjenja w lětomaj 2019 a 2020 chce město Wojerecy tež za 2021/2022 dwójny etat nastajić. Měšćanscy radźićeljo maja jón 11. meje wobzamknyć. Do toho budźe naćisk wot 20. do 28. apryla zjawnje wupołoženy. „Najebać napjate połoženje chcemy so ze strukturnej změnu dokładnje zaběrać. Za to planujemy hač do 2025 kóžde lěto 400 000 eurow. Te njesměmy šmórnyć“, wuzběhny wyši měšćanosta Torsten Ruban-Zeh (SPD) předwčerawšim na wobydlerskej zhromadźiznje. Něhdźe 20 zajimcow bě do awle Léona Foucaultoweho gymnazija přišło.
Jedne z ćežišćow etata je znowawožiwjenje industrijnišća w Ćisku. Hač do lěta 2025 chcedźa tam za nimale dźesać milionow eurow puće saněrować. Nimo toho planuja přemysłowe ležownosće wot priwatnikow wróćo kupić a je potom nowym inwestoram poskićeć. W tym zwisku so Ruban-Zeh nadźija, zo móža pola města dwě nowej městnje za hospodarske spěchowanje wutworić.
Planowana připrawa za kompostowanje organiskich wotpadkow pola Miłoćic njewuwabja kontrowersnu diskusiju jenož mjez Miłočanami, kaž bě wčera na posedźenju gmejnskeje rady słyšeć.
Njebjelčicy (JK/SN). Hižo na swojim minjenym posedźenju su Njebjelčanscy gmejnscy radźićeljo wo planowanej kompostowej připrawje za organiske wotpadki pola Miłoćic wuradźowali. Młody ekoratar Ignac Wjesela planuje na ležownosći pola Miłoćic, kotraž bě jónu jako přemysłowa přestrjeń za gmejny zarjadniskeho zwjazka Při Klóšterskej wodźe předwidźana, natwarić připrawu za kompostowanje organiskich wotpadkow kaž tež halu za ratarske mašiny a składowanje agrarnych produktow.