Drogi namakali

Radwor. W dwěmaj bydlenjomaj w Ra­dworju je policija předwčerawšim popołdnju dohromady wjace hač 50 gramow drogow namakała. Jako prěnje wobhladachu sej popołdnju po pokiwje swědka bydlenje 36lětneho. Tam namakachu 32 gramow konopje, wšelake utensilije za jeje wužiwanje kaž tež tak mjenowany butterfly-nóž. Wječor wołachu zastojnikow wospjet do samsneho bydlenja. Nětko bě tam dalši 34lětny muž, kiž uniformowanym snadne mnóstwo marihuany přepoda. Na sudniski přikaz sej tež jeho bydlenje bliže wobhladachu a z pomocu psa dalše 22 gramow konopje namakachu. Policisća wšitko sćazachu a wupisachu chłostanske přizjewjenje. Kriminalna słužba Budyskeho rewěra so z padom dale zaběra.

Radźićeljo wo přichodźe zaměroweho zwjazka diskutowali

Ralbicy (JK/SN). Wokomiknje je zaměrowy zwjazk za wopłóčki Při Klóšterskej wodźe bjez jednaćela. Dotalny wotrjadnik Jan Mikel jón tuchwilu komisarisce wjedźe. Zwjazk pak trjeba po smjerći wjelelětneho jednaćela Hansa-Joachima Schöny nowe wjednistwo abo podobne zjednoćenstwo, kotrež by wjednistwo zaměroweho zwjazka přewzało. Wo tym rozmyslowali su ­čłonojo gmejnskeje rady Ralbicy-Róžant na swojim minjenym posedźenju.

Spěšnotesty na koronawirus maja so přichodny čas tež w Budyskim wokrjesu z wažnym instrumentom přećiwo koronapandemiji stać. Nětko wozjewichu lisćinu, hdźe móža so ludźo darmotnje testować dać.

Budyšin (SN/MWj). Na dokładnje 21 městnach, mjez druhim w mnohich apotekach a fyzioterapeutiskich praksach Budyskeho wokrjesa móžeš so tuchwilu na koronawirus testować dać. W dalšich 37 wjetšich a mjeńšich centrumach so na to přihotuja. Přichodne dny tam swoje dźěło zahaja, kaž w nowinskej zdźělence wokrjesa rěka. Nimo toho budu tři mobilne testowanske skupiny po puću, kotrež w Budyskim, Kamjenskim a Wojerowskim regionje dohromady 27 gmejnow docpěja. Za testowanje dyrbja sej wobydlerjo termin wujednać. We wjetšich centrumach kaž tež pola mobilnych skupin je we wuwzaćnych padach test tež bjez přizjewjenja móžny.