Smolerjec kniharnja wočinjena
Budyšin. Wot dźensnišeho je Budyska Smolerjec kniharnja zaso přistupna. Wot 10 do 18 hodź. móža sej tam zajimcy wudźěłki z bohateho poskitka serbskeje literatury wupytać. Kaž nawodnica kniharnje Annett Šołćic wobkrući, njetrjebaja so kupcy do toho přizjewić.
Nowa nawodnica pěstowarnje
Dźěwin. Pěstowarnja „Ptače hnězdo“ w Dźěwinje ma wot 1. měrca nowu nawodnicu. Wjesnjanosta Helmut Krautz je 25lětnej Nadine Pötschke přepodał zamołwitosć. Jeje předchadnica Sigrid Baatz poda so wuměnk. Pötschke chce za dwě lěće dalokostudij socialneho dźěła wotzamknyć.
Policija (08.03.21)
Wopity wokoło so třělał
Wojerecy. Wobydler we Wojerecach je sobotu wječor zdźělił, zo na Heinowej něchtó w bydlenju třěla. Zastojnicy móžachu tam 42lětneho muža přewinyć a jeho trašawku kaž tež wotpowědnu municiju sćazać. Za bróń wón žanu dowolnosć njeměješe, měješe pak chětro wjele alkohola w kreji. Pola njeho naměrichu mjenujcy 2,2 promilej.
Wobydlerjo maja dale čakać
Budyšin (SN/MiR). Frakcija CDU Budyskeje měšćanskeje rady reaguje ze zadźiwanjom na postupowanje wyšeho měšćanosty Alexandera Ahrensa (SPD). „Nimam scyła zrozumjenje za to, zo dyrbimy jako radźićeljo z rozhłosa a socialnych medijow wo turistiskim posudku města Budyšina zhonić“, rjekny na naprašowanje SN měšćanski radźićel CDU Heinrich Schleppers. Zarjadnistwo bě studiju w zwisku z projektom, twarić nowy móst nad Sprjewju, zadźěłać dało. Ahrens bě informacije sam šěrił a zdobom zwuraznił, zo so rozsud wobydlerjow na temu móst dale wotstorči.
Wsam rjeńši napohlad dać
Wochozy so na wubědźowanju za wsy wobdźěla
Hamor/Klětno (AK/SN). Wjesne rady gmejny Hamor planuja, byrnjež wuměnjenja runjewon jednore njebyli, dźěłowe lěto 2021. Na to pokazachu wone w hamtskim łopjenu z widom na prěnje lětuše schadźowanje. „W měrcu chcemy rjedźić, w aprylu ma nalětni swjedźeń slědować, w juniju chcemy wobydlerski forum z bydlenjotwarskim předewzaćom přewjesć, w nowembru budźe nazymske rjedźenje“, pisa gmejnska radźićelka a wjesna předstejićelka za Hamor a Sprjowje Marianne Zich. Spočatk decembra chcedźa ze seniorami adwentničku swjećić a hodowne wiki přewjesć. Wšitke terminy planuja z widom na dalše wuwiće korony dla. W młodźinskim klubje w Sprjowjach dyrbja po wobškodźenju wody dla špundowanje wobnowić. Młodźinski klub Wotoka njezamóže reparatury sam zrjadować. Wjesna rada je tuž słała list koncernej LEAG, w kotrymž wo podpěru prosy.
Dom kamelijow wostanje zawrjeny
W Kinsporskim kamelijowym domje tuchwilu najstarša kamelija kćěje. Wobhladać pak sej ju njemóžemy. Wobmjezowanja korony dla tomu zadźěwaja. A tomu lětsa dale tak wostanje.
Kinspork (SN/MiR). Nimo najstaršeje kamelije wupřestrěwa tež jara rědka wisata kamelija swoje kćenja do wysoka, runje tak kaž wonjace družiny. Normalnje bychu tam ludźo dźensa po stach za zastupnym lisćikom stali – wosebje kónc tydźenja. Šulerjo Kinsporskeje zakładneje a wyšeje šule wodźachu stajnje w měrcu slepych po wustajenišću, pěstowarnjam poskićachu „bajkowy přewod“. Lětsa wostanje dom zawrjeny. Tamniše domizniske towarstwo chce pak ludźi přiwšěm zawjeselić. Tuž je zarjadował serwis za rozesłanje skazankow kaž tež za zajimcow, kotřiž chcedźa sej twory wotewzać. Nowy kamelijowy parfim kaž tež za njón wužiwane kćějace wonjace kamelije družiny „Minato no akebono“ su runje tak wosebite dary k jutram kaž młode rostlinki třoch najstaršich kamelijow družin „Alba Plena“ a „Althaeflora“ inkluziwnje certifikata ryzosće. Při wotewzaću je snadź tež móžno do kamelijoweho domu pokuknyć.
Wotstronjeja slědy dźiwich swini
Ličby RKI su měritko
Wolóženja a přiwótřenja koronanaprawow wot třoch faktorow wotwisne
Budyšin/Zhorjelc (SN/JaW). Wot dźensnišeho su tež we wokrjesomaj Zhorjelc a Budyšin nowe postajenja wo škiće před koronawirusom płaćiwe. Tak smě so nětko najwjac pjeć wosobow z dweju domjacnosćow zetkać, zběhnjene su tohorunja zakaz přebywanja zwonka bydlenja, wobmjezowanja wuchodźowanja a zakaz alkohola. Dale su wot dźensnišeho kniharnje zaso wočinjene, runje tak twaršćiznowe wiki, kwětkarnje a štomownje.
Žonjace akciske tydźenje zahajene
Krótkopowěsće (08.03.21)
Wobchody z click & meet
Budyšin. Aktualneje incidency pod 100 po Roberta Kochowym instituće (RKI) dla su w Budyskim a Zhorjelskim wokrjesu wobchody wotnětka po systemje click & meet wočinjene. W Budyskim wokrjesu zwěsćachu wot pjatka 140 koronanowoinfekcijow a tři smjertne pady. Incidenca bě po podaću wokrjesa 97, po RKI dźensa rano 98,1. We wokrjesu Zhorjelc bě wčera 26 nowonatyknjenjow a indicenca 82,30, po RKI je 66,9.
Hudźbne dny zaso přestorčene
Wojerecy. 55. Wojerowske hudźbne swjedźenske dny, kotrež běchu wot 11. apryla do 2. meje planowane, su zamołwići znowa wo lěto přestorčili. Kaž zdźěli nawoda Łužiskeje hale Dirk Rolka jako zarjadowar, su přičina połoženje korony dla a z tym zwisowace škitne naprawy. Njewěste dale je, hač smědźa so přeprošeni wukrajni wuměłcy wobdźělić. Zastupne lisćiki wostanu płaćiwe.
Matura bjez pruwowanjow?
Policija (05.03.21)
Z dróhi runu smuhu do jastwa
Budyšin. Na awtodróze A 4 pola Budyšina zwěsći policija tele dny při kontroli, zo bě šofer małotransportera bjez jězbneje dowolnosće po puću. Za 30lětnym hižo pytachu, dokelž njebě pokutu wjacorych stow eurow płaćił. Dokelž njemóžeše ju zapłaćić, dowjezechu jeho do jastwa.
Njerjad rěčku zanjerodźił
Budyšin. Wohnjowu woboru z wokoliny sprjewineho města su wčera rano na Budyski puć Při Špitałskich łukach wołali. Tam běchu wobydlerjo wolij na Albrechtowce wuhladali. Přičina bě wočiwidnje preč ćisnjeny njerjad pod mostom při zaliwje do rěčki. Wobornicy připrawichu wotpowědnu zawěru. Pad zanjerodźenja policija nětko přepytuje.
