Radwor (SN/MkWj). Radworska gmejna chce so na twarskim projekće wjesneje dróhi K 7283 w Boranecach wobdźělić a tamniše busowe zastanišćo ponowić. To su gmejnscy radźićeljo na swojim posedźenju wutoru tydźenja jednohłósnje wobzamknyli. W Boranecach přewjeduja we wobłuku tak mjenowaneje zhromadneje naprawy wobšěrne twarske dźěła. Próstwu wo spěchowanske srědki je gmejna zapodała. Wobstejacu drjewjanu čakarnju chcedźa na hinaše wašnje wu­žiwać.

Energetisce wobnowić chcedźa wjesny dom zhromadźenstwow w Chelnje (Dorf­gemeinschaftshaus), bywšu gratownju wohnjoweje wobory. Srědki za zatwar nowych woknow a durjow we wobjimje 90 procentow přinošuja z fondsa za strukturne wuwiće bywšich brunicowych kónčin.

Wjesnjanostka Madeleine Rentsch radźićelow a hosći wo tym informowaše, zo nastupi nowy domownik šule a wjacezaměroweje hale „Slavia“, Stefan Paška z Radworja, dnja 1. apryla swoje zastojnstwo. Jeho běchu z cyłkownje 26 poža­darjow wuzwolili.

Wojerecy (SN). Wojerowska biblioteka Brigitty Reimann je koronapandemije dla dale zawrjena, swojich čitarjow pak nochce zhubić. Tak su tam čas wužiwali namakać poskitki, kotrež móža zajimcy přiwšěm wužiwać. Wobłuk digitalnych poskitkow je nětko rozšěrjeny. Za wšěch tych, kotřiž chcedźa nowu rěč nawuknyć abo hižo wobstejace znajomosće cuzeje rěče rozšěrić, maja tam wosebitosć. To płaći za němčinu jako cuzu rěč, za jendźelšćinu, španišćinu, francošćinu a italšćinu na wšitkich rěčnych schodźenkach.

Z nowej, bjezpłatnej eLearning platformu LinguaTV móža wšitcy přizjewjeni wužiwarjo biblioteki z pomocu widejow so z cuzej rěču zaběrać. Za to njetrjebaja do biblioteki přińć. Poskitk wužiwać hodźi so wot doma. Kursy su zestajene z widejow, zwučowanjow, wuknjenskich hrow a treninga za wokable.