Za druhe bydlenje dawki płaćić
Z wosebitymi wustawkami přidatne dochody za Hamorsku gmejnu
Hamor (AK/SN). Štóž ma w Hamorskej gmejnje druhe bydlenje přizjewjene, dyrbi za to wot 1. januara 2021 dawki płaćić. Tole je gmejnska rada na swojim zašłym posedźenju z jednym wzdatym hłosom wobzamknyła. Z tym slěduje Hamor přikładej druhich komunow, přetož tež w Krušwicy, Běłej Wodźe, Zhorjelcu a Drježdźanach tajke wustawki maja. „Zasadnje dźe wo to, zo ći z druhim bydlenjom za wužiwanje gmejnskeje infrastruktury sobu płaća“, rozłoži sobudźěłaćerka komornistwa Antje Lukas. „Jako komuna prócujemy so wo přidatne dochody. Kelko to dokładnje budźe, njemóžemy hišće rjec.“ Po słowach Antje Lukas jedna so wo něhdźe 150 bydlenjow. To pak dyrbi zarjadnistwo Hamorskeje gmejny najprjedy dokładnje pruwować.
Wikowarjam poskićeja pomoc
Mjez tymi, kotřiž pod pandemiju sobu najbóle ćerpja a kotrychž eksistenca je dla toho wohrožena, su drobnowikowarjo. Jim skićeja wot přichodneho tydźenja znajmjeńša mału škričku nadźije.
Kamjenc (SN/MWj). Wobchody, kotrež wudźěłki wšědneje potrjeby njeposkićeja, su wot spočatka nowembra zašłeho lěta zawrjene. To wone tež dale wostanu, ale znajmjeńša móža swoje twory pod wěstymi wuměnjenjemi internetnje abo při telefonje poskićeć a kupcy smědźa sej je wotewzać. Po wuprajenju sakskeho hospodarskeho ministerstwa je tak mjenowany „Click & collect“ wot 15. februara dowoleny. Z tymle rozsudom skićeja drobnowikowarjam w swobodnym staće samsne móžnosće kaž na přikład gastronomam, kotřiž smědźa swoje jědźe k sobuwzaću tohorunja předawać.
Tuchwilna kruta zyma je za mnohich z wobćežowanjemi zwjazana. Runje ...
Krótkopowěsće (11.02.21)
Incidenca pod 100 padnyła
Budyšin. Wokrjesny strowotniski zarjad je wčera wo 73 zwěsćenych nowonatyknjenjach z koronawirusom a pjeć smjertnych padach w zwisku z nim w Budyskim wokrjesu informował. Wot 436 schorjenych (-6) lěkuja 99 (+9) w chorowni. Incidenca je tu 114,6. Zhorjelski wokrjes je wčera wo 54 nowoinfekcijach a 19 zemrětych pacientach rozprawjał. Incidenca tam je ze 96,94 pod sto padnyła.
Nowe Płomjo online
Budyšin. Februarske čisło serbskeho dźěćaceho časopisa Płomjo je w interneće přistupne. Zamołwity redaktor Pětr Šołta je jón pod https://www.yumpu.com/xx/document/read/65287595/plomjo online stajił. Wudaće chowa w sebi mjez druhim dožiwjenske rozprawy dźěći wo dowolowym času. Na čitarjow čakaja trysk z Feliksom a Florianom, powědančka, hódančka a rozprawy.
Dźěćom bjezpłatny ćopły wobjed
Policija (10.02.21)
Šoferaj do so šłoj
Kinspork. Na zwjazkowej dróze B 97 mjez Kinsporkom a Łužnicu staj so předwčerawšim wodźerjej čěskeho nakładneho awta a němskeho wosoboweho awta typa Mercedes mjez sobu wo zadźerženju we wobchadźe powučowałoj. Na kóncu situacija eskalěrowaše. Najprjedy spyta šofer Mercedesa Lkw přesćahnyć, štož pak so njeporadźi. Jako bě wón skónčnje nimo, awto před Lkw-jom wotpohladnje pomału jědźeše. We Łužnicy dyrbještaj wobaj před twarskej amplu zastać. Tam dóńdźe skónčnje k rozestajenju, při čimž šofer Pkw-ja tamnemu šmóratko z ruki dyri. Šofer Lkw-ja wotmołwi z dyrom mjezwoči a tamneho snadnje zrani. Wobaj změjetaj so nětko nuzowanja w nadróžnym wobchadźe a zranjenja ćěła dla zamołwić.
Wjele wróblow, mało sykorkow
Nowačkow přizjewić
Chcedźa nowu pěstowarnju
Njeswačanska gmejnska rada měri so na wulki projekt
Njeswačidło (JK/SN). Hižo loni zahajeny proces, so prócować wo narunanje za aktualnu pěstowarnju, nabywa w Njeswačidle dźeń a konkretniše formy. Na wčerawšim posedźenju tamnišeje gmejnskeje rady, prěnim lětušim, wobzamknychu radźićeljo dalši wažny krok přihotow.
Dom chcedźa energetisce saněrować
Wojerecy (AK/SN). We wobłuku strukturneje změny Łužicy chce město Wojerecy z originelnymi a derje přemyslenymi idejemi sobu skutkować. Za to zesylnja město swój wobłuk hospodarskeho spěchowanja. Tole wuzběhny wyši měšćanosta Torsten Ruban-Zeh (SPD) tele dny před nowinarjemi. Hospodarskemu spěchowarjej Alexanderej Kühnej steji přichodnje bywši nowinski rěčnik Bernd Wiemer poboku. „Třo dalši maja so přidružić“, rozłoži wyši měšćanosta. Za to prócuja so wo wotpowědne spěchowanje.
Jedyn z najwažnišich projektow budźe přetwar a modernizowanje Łužiskeje kupjele. Mjeztym 21 lět wobstejaca kupjel ma přichodnje moderniša, kreatiwniša, ekologiska a bóle z domiznu zwjazana być. W aprylu 2024 ma kupjel po dwěmaj lětomaj zaso wočinić. Za projekt je tuchwilu něhdźe 15,4 miliony eurow předwidźanych. Za to nadźijeja so srědkow z programa za strukturnu změnu. Při tym by Zwjazk hač do 87 procentow wudawkow njesł, štož wučinja něhdźe 11,8 milionow eurow. Měšćanske hospodarske zawody jako wobsedźer Łužiskeje kupjele bychu 13 procentow njesć dyrbjeli, potajkim něhdźe 3,6 milionow eurow.
We wuhenju woheń wudyrił
Kulow (PM/SN). Zo je wuheń w bydlenskim domje přewšo sensibelna naležnosć a zo dyrbiš jón wobstajnje wot fachowcow hladać dać, wě kóždy, kiž měješe z tym hižo raz ćeže. K nim słušeja nětko bohužel tež wobydlerjo domu na Kamjenskej dróze w Kulowje. Tam dyrbješe předwčerawšim wohnjowa wobora přijeć. Na zbožo móžachu kameradojo wjetšej katastrofje zadźěwać.
Wobydler domu bě runje na hornim poschodźe, jako słyšeše spodźiwne a njezwučene zwuki, kotrež pochadźachu z tepjenskeje připrawy. W tym wokomiku bě so wuheń nutřkownje palić započał. Při tajkim wohenju so na sćěnach wuhenja wotsadźene sazy zapala a płomjenja zdźěla z wuhenja šuskaja. Najprjedy spyta wobydler z dwěmaj wohnjohašakomaj płomjenja sam podusyć. Skónčnje pak alarmowaše wón policiju. Zhromadnje ze saznikom so wobornikam poradźi, wuheń mjesć, z čimž płomjenjam móhłrjec jich zakład wzachu. Na zbožo so při tym nichtó zranił njeje.
