Kupnicu wobšudźili
Wojerecy. Z woporom njeznatych telefonowych wobšudnikow je so minjenu sobotu kupnica na Wojerowskim Łužiskim naměsće stała. Něhdźe w 17.30 hodź. tam cuzy zazwoni a wudawaše, zo kupnica wěstu ličbu tak mjenowanych Google-Play-kartow hižo předawać njesmě. Njeznaty předawarku namołwi, zo měła jemu cody jednotliwych kartow mjenować. Pozdźišo so wukopa, zo běchu wobšudnicy karty bjezposrědnje po tym na pjenjezy zaměnili. Wojerowskej kupnicy nasta na te wašnje dohromady něhdźe 4 500 eurow škody.
Budyšin (CS/SN). Wotsrjedź januara steji na terenje Budyskeje chorownje blisko Flincoweje wulki kran. Hižo spočatk lěta su tam twarsku jamu wuzběhować započeli, po tym zo běchu loni w lěću stary přitwar wottorhali. Nětko twarja tam nowe laborowe twarjenje, z kotrymž Medicinski labor wuchodneje Sakskeje powjetša. Wón ma wot lěta 2006 swoje hłowne sydło w lěkarskim domje na Hornčerskej 17, w bywšej poliklinice. Zapřijimajo twarjenje, kotrež podołhojće k Flincowej steji a w kotrymž běchu něhdy krej darowanska centrala a labory Hornjołužiskich klinikow zaměstnjene, změje medicinski labor potom 2 000 město dotal 1 200 kwadratnych metrow městna. Podołhojte twarjenje nětko wobšěrnje saněruja.
Mało nowych natyknjenjow
Budyšin. Kónca tydźenja dla je ličba zwěsćenych natyknjenjow z koronu hač do wčerawšeho wo 16 přiběrała, kaž krajnoradny zarjad zdźěli. Třo pacienća w starobje 69 do 92 lět su zemrěli. Wot 622 schorjenych (-70) lěkuja 168 (+9) w chorowni. Aktualna incidenca je 153,6. Wo jednej dalšej infekciji a sydom smjertnych padach informuje Zhorjelski wokrjes. Incidenca wučinja tam 140,86.
Krajny biskop přeprosył
Drježdźany/Hodźij. Ewangelski krajny biskop Tobias Bilz je serbskich křesćanow Hodźijskeje wosady kónc februara na wosobinsku rozmołwu do Drježdźan přeprosył. Tući běchu so na njeho kaž tež na synodu Ewangelsko-lutherskeje krajneje cyrkwje Sakskeje z próstwu wobroćili, podpěrać serbske zajimy při znapřećiwjenju wot krajneho cyrkwinskeho zarjada jednostronsce přetłóčenej strukturnej reformje.
Namjety hišće hač do pjatka
Kamjenc (SN). Tak mjenowana hornjołužiska „onleihe“, digitalne wupožčowanje medijow we wjacorych bibliotekach Hornjeje Łužicy, je loni w dwójnym zmysle přirost registrowała. Na jednym boku přiběraše ličba digitalnych wupožčowanjow na cyłkownje 140 833 titlow, štož woznamjenja 14 502 wjace porno lětu 2019. Na tamnym boku rozšěrichu měšćanske knihownje w Budyšinje, Biskopicach, Ebersbachu-Neugersdorfje, Zhorjelcu, Wojerecach, Kamjencu, Lubiju, Niskej, Ottendorfje-Okrilli, Radebergu, Radebeulu, Běłej Wodźe a Žitawje swoju zhromadnu wirtuelnu wotnožku z nowym poskitkom digitalneho wuknjenja, kotryž mjenuja e-learning.
Strašny płun zawěsćili
Kamjenc. Rutinowe zasadźenje wuchowanskich mocow wjedźeše předwčerawšim wječor k wohnjowobornemu alarmej w Kamjencu. Krótko do 19 hodź. wołachu sanitetarjow do seniorskeho centruma na Wysokej wo pomoc. Tam měrjenske nastroje pomocnikow pokazachu, zo bě koncentracija wuhlikoweho monoksida w domje přewulka. Na to alarmowachu wohnjowych wobornikow. Kameradojo wšitke stwy ze sensibelnej techniku přepytachu, zo bychu zwěsćili, zwotkel strašny płun pochadźa. Po něhdźe dwěmaj hodźinomaj zasadźenje zakónčichu, dokelž ničo namakali njeběchu a dokelž bě so koncentracija płuna zaso normalizowała. Zranił so nichtó njeje. Dróha před starownju bě sčasami dospołnje zawrjena.