Nowe dwurěčne tafle připrawili
Adwentny kalender za dźěći
Worklecy. Dekanatne dušepastyrstwo za dźěći we Worklecach poskići lětsa adwentny kalender za dźěći. Wšědnje dóstanu wone z póštu adwentne woknješko připósłane. Protyčka je w třoch wariantach za pěstowarske dźěći kaž tež za šulerjow 1. do 4. lětnika a 5. do 8. lětnika přihotowana. Zajimcy njech so hač do srjedy, 25. nowembra, přez link, podaty pod www.posol.de, přizjewja. Nadrobniše informacije dóstanu woni we Worklecach pod telefonowym čisłom 03 57 96 / 8 87 07 abo e-mailnje pod .
Wustajeńcu přestorča
Budyšin. Wot 28. nowembra měješe wosebita wustajeńca „Smjerć & ritual. Předstawizniske chowanja pola Delnjeje Kiny“ zajimcow do Muzeja Budyšin wabić. Techniskich přičin dla pak dyrbja swoju přehladku přestorčić. Kaž muzej zdźěli, pokazaja ju tuž wot 15. oktobra 2022 hač do 15. januara 2023. Tule wosebitu wustajeńcu prezentuje Budyski muzej w kooperaciji z Kamjeničanskim statnym muzejom za archeologiju a ze Sakskim krajnym muzejom za archeologiju.
Koncert wotprajeny
Lipa korony dla přestorčena
Na Njebjelčanskim swjedźenišću wosebity štom sadźić chcyli
Njebjelčicy (UM/SN). Při rejwanju za hwězdami přimać – tule romantisku předstawu zwjazuja hižo lětstotki z rejowej lipu. Wuměłsce zhotowjene podesty, kotrež wušikni rjemjeslnicy wokoło štomow natwarichu, dachu rejwacym začuće, zo su njebju kusk bliže byli. Ći, kotřiž lipu jako mały štomik sadźa, wšak to lědma dožiwja. Hakle jich dźěći, snano tež hakle wnučki maja móžnosć, mjez hałzami narosćeneho štoma rejwać.
„Wnučkokmane“ – tele słowo zda so za ideju rejoweje lipy runje prawe być. Wnučkokmanosć je tež jedne z hesłow Njebjelčanskeje gmejny. „Při wšěm, štož planujemy a rozsudźamy, myslimy tež na wuskutki za tych, kotřiž za nami přińdu“, rozłožuje wjesnjanosta Tomaš Čornak (CDU). W zwisku z rejowej lipu to najprjedy raz woznamjenja, zo změja wnučki dźensnišich Njebjelčanow rjane rejwanske městno.
W křesle sedźo muzej wopytać
Wojerecy (SN/MWj). Z nowymi postajenjemi korony dla dyrbješe tež Wojerowski Zusowy kompjuterowy muzej ZCOM swoje durje za wopytowarjow zawrěć. Zo bychu publikum dale docpěli, je ZCOM swój poskitk z digitalnymi zarjadowanjemi rozšěrił. Kaž w nowinskej zdźělence rěka, móža so zajimcy w nowembru a decembru online na wodźenjach a webinarach wobdźělić a tak muzej wopytać. Jeničke wuměnjenje su z internetom zwjazany kompjuter, smartphone abo tablet. Poskitki su darmotne. Přizjewić a wobdźělić móža so přez internetnu stronu muzeja.
Hdyž budźe w lětušim dohodownym času nimale wšitko trochu hinak ...
Krótkopowěsće (19.11.20)
Rekordna ličba infekcijow
Budyšin. Dotal najwjetšu ličbu 300 natyknjenjow z koronawirusom w běhu jednoho dnja wozjewichu wčera w Budyskim wokrjesu. Štyrjo dalši pacienća su w zwisku z koronu zemrěli. Aktualnje schorjenych je 2 133 (+57), w chorowni lěkuja 88 z nich (+11). Wot wčerawšeho płaći wudospołnjene powšitkowne korona-postajenje. Tak maš sej w zachodnym wobłuku wobchodow a na jich parkowanišćach nós a hubu zakryć.
Hotuja so na wulki jubilej
Slepo. Za dwě lěće zhladuja Slepjenjo na 750 lět wobstaća swojeje wsy. Hižo nětko tam towarstwa jubilejne lěto planuja. Swjedźenje chcedźa na wjacorych dnjach w běhu lěta přewjedować. Planowane je mjez druhim tohorunja wotměć tradicionalny mjezynarodny festiwal dudakow. K róčnicy chcedźa wudać wosebitu knihu wo stawiznach gmejny z fotami serbskich kwasow we wosadźe.
NDRska tramwajka dale jězdźi
Z nowymi awtami na dobro pacientow po puću
Budyšin (SN/MWj). Na dróhach Budyskeho wokrjesa wuhladaja wobydlerjo nětko nowe chorobne awta, z kotrymiž přijědu w nuznych padach pomhać abo z kotrymiž pacientow transportuja. Dohromady jědnaće tajkich jězdźidłow su tele dny wšelakim wuchowanskim stražam we wokrjesu přepodali. Z nowymi awtami narunaja starše modele, kotrež hižo šěsć do wosom lět wužiwaja. Te zasadźa wotnětka jako rezerwowe awta abo je scyła wjace njebjeru.
Policija (17.11.20)
Wjacore delikty naraz
Budyšin. Předwčerawšim připołdnju je 35lětny wodźer Forda na Budyskej Listowej před policiju ćěkał. Ta z awtom za nim smaleše a spěšnje přičinu jeho zadźerženje zwěsći. Němski staćan scyła žanu jězbnu dowolnosć njeměješe a steješe nimo toho po wšěm zdaću pod wliwom drogow. Wotpowědny test reagowaše mjenujcy pozitiwnje na amfetaminy. W awće namakachu policisća snadne mnóstwo drogow. Na to dyrbješe młody muž krej „darić“. Wón změje so nětko mjez druhim jězdźenja bjez dowolnosće a jězdźenja pod wliwom drogow dla na sudnistwje zamołwić.
Wotnětka w starowni pomhaja
Po pjeć dnjach hišće žane wuslědki testy personala nastupajo
Chrósćicy (SN/MWj). Po namołwje Chróšćanskeho Domu swj. Ludmile minjeny tydźeń w socialnych syćach, zo trjebaja nuznje dobrowólnych pomocnikow za hladanje a zastaranje wobydlerjow, je so něhdźe dwaceći zajimcow přizjewiło. Prěni z nich su tam dźensa dźěłać započeli, zdźěli nawodnica Mónika Wenclowa. Někotři su fachowcy na wuměnku, dalši maja nazhonjenja při hladanju starych. „Su pak tež młodźi ludźo, kotřiž wotydźenja na dźěło chodźa a bychu nam kónc tydźenja pomhali“, rozprawja nawodnica. Jako prěnich zasadźichu dźensa bywšich sobudźěłaćerjow. Woni so wuznawaja a njetrjebaja wjele nawoda, na přikład, kak wobydlerjam hladarnje jědź podawać abo kak jich myć.
Maja zastupowaceho fararja
Dokelž w swójbje Slepjanskeje fararki Jadwigi Malinkoweje dorost wočakuja, maja w tamnišej wosadźe nětko takrjec nachwilnu personelnu změnu, kotraž pak tam cyle njeznata njeje.
Slepo (CK/SN). Božu słužbu na jutřišim pokutnym dnju w Slepom změje predikant Manfred Hermaš. Fararka Jadwiga Malinkowa, kotraž so na swoje třeće dźěćo wjeseli, by poprawom hakle 8. decembra do maćerneho dowola šła. Koronapandemije dla pak su jej poručili, swoje dźěło hnydom wotpočować dać. Zastupować budźe ju w přichodnym połdra lěće Wojerowski farar Jörg Michel, kiž jednaćelstwo w Slepjanskim farskim zarjedźe kaž tež dušepastyrske nadawki přewozmje. Podpěrany budźe wot fararja Steffena Krolla z Markersdorfa, kiž při chowanjach a křćiznach wupomha.
