Běrokratiskeho zadźěwka dla so znowa zetkać dyrbjeli
Konjecy (aha/SN). Hońtwjerske drustwo Konjecy-Šunow ze swojimi nimale 70 čłonami chcyše wotpowědnje swojim wustawkam hižo lětsa w měrcu swoju hłownu zhromadźiznu přewjesć. Koronapandemije dla pak njebě to spočatk nalěća móžno, tak zo dyrbjachu swoju „hłownu“ na pozdźiši termin přepołožić. Tomu Křesćan Gruhn, kiž z časa załoženja w lěće 1994 drustwo nawjeduje, wotpowědowaše. Nimale 40 zapisanych čłonow so tuž w awgusće zeńdźe. Mjez druhim tehdy wupłaćenje wotnajenskeho přinoška wobzamknychu. Tola runje to měješe hońtwjerski hamt krajnoradneho zarjada za njepłaćiwe, dokelž njebu wotpowědny termin w gmejnskej nowinje sčasom wozjewjeny. Tuž dyrbjachu to nětko znowa zrjadować, zo móhli wotnajerjam přinošk wupłaćić.
Tohodla je předsydstwo hońtwjerskeho drustwa swojich čłonow minjeny pjatk wospjet na žurlu Konječanskeho towarstwoweho domu přeprosyło. Nětko 16 přitomnych jednohłósnje wupłaćenju wotnajenskeho wunoška přihłosowachu.
„Čmjeła Hana“ njepoleći
Ralbicy. Přichodna serbska premjera NSLDź noweho wukaza k wobmjezowanju koronoweje pandemije a zakaza wšeje wólnočasneje zaběry dla wupadnje. „Čmjeła Hana chce do dowola lećeć“, z pjera a pod režiju Měrka Brankačka by jutře, srjedu, swoju premjeru w Ralbičanskej pěstowarni měła. Je to interaktiwna hra a mjeztym štwórte čisło woblubowaneho rjadu, kiž maćernorěčne a serbšćinu wuknjace dźěći w kubłanišćach zawjesela. Ručež zakazy zběhnu, chce tež čmjeła Hana skónčnje zaso do pěstowarnjow a zakładnych šulow lećeć.
Biblioteka tola wočinjena
Přidatne njedostatki zwěsćili
Pjenjezy z komunalneje pawšale rozdźělili a strach wotwobarali
Trjebin (CK/SN). K wurjadnemu posedźenju Trjebinskeje gmejnskeje rady běchu jeje čłonojo tele dny zwołani. Woni mějachu wo rozdźělenju pjenjez z komunalneje pawšale Swobodneho stata Sakskeje rozsudźić, „zo bychu móžny hrožacy strach wotwobarali“, kaž wjesnjanosta Waldemar Locke (CDU) wopodstatni.
W septembru běchu gmejnscy radźićeljo wobzamknyli, tankowe hašenske jězdźidło wohnjoweje wobory TLF 24/50 porjedźeć dać. 27 lět stare jězdźidło, kotrež Trjebinjenjo wot lěta 2011 wužiwaja, dyrbješe do generalneje reparatury, a to za 40 000 eurow. Jako su jězdźidło za TÜV přihotowali, pak zwěsćichu, zo běchu spinanske hadźicy dodźeržane a wobě prědnjej duri běštej puknjenej. Tute njedostatki wotstronić płaći přidatnje 7 217 eurow.
Wiki wjeselo wobradźili
Hižo do wospjetneho zlemjenja zjawneho žiwjenja buchu minjeny kónc tydźenja najwšelakoriše zarjadowanja wotprajene. Znajmjeńša Wojerowske wuměłstwowe wiki pak smědźachu so kaž planowane wotměć.
Wojerecy (KD/SN). Našočasnym wuměłcam skića Wojerowska Kulturna fabrika wobstajnje składnosć, w zjawnosći swoje twórby pokazować. To je za čas koronoweje pandemije ćim wažniše. Jedna tajka składnosć běchu minjeny kónc tydźenja mjeztym hižo 15. wuměłstwowe wiki, kotrež so kóžde druhe lěto we Łužiskej hali wotměja. Kaž jednaćel Kulturneje fabriki Uwe Proksch zdźěli, je so dohromady 65 molerjow, grafikarjow, zhotowjerjow debjenkow, rězbarjow a dalšich wuměłcow, přewažnje ze Sakskeje a Braniborskeje na lětušich wikach wobdźěliło. Z jich grafikow, skulpturow, mólbow a dalšich twórbow běštaj kuratoraj Uwe Handrick a Ines Lenke kaž tež přihotowanski team Kulturneje fabriki wustajeńcu we Łužiskej hali natwarili.
Na wjacorych městnach Budyšina su wčera za telewizijny sćelak ...
Z dobrym začućom
Zwjazkowa wobora měła pomhać
Ličba koronainfekcijow w Budyskim wokrjesu je z dohromady 445 padami minjeny pjatk, sobotu a njedźelu sylnje postupiła. Wčera njeje krajnoradny zarjad jenož wo 39 dalšich natyknjenjach informował, ale tež wo tym, zo je Zwjazkowu woboru wo personalnu pomoc prosył, zo hodźeli so kontaktne wosoby zaměrnišo zwěsćić. Nimo toho su testowu strategiju přiměrili.
Budyšin (SN/at). „Na zakładźe stupacych ličbow padow a zo bychmy zaručili kontaktne wosoby sćěhować, smy dźensa Zwjazkowu woboru wo pomoc prosyli“, su słowa 1. přirjadnika krajneho rady Uda Wićaza (CDU), wo kotrychž je Budyski krajnoradny zarjad wčera informował. Nadrobnosće zasadźenja tuchwilu rozjimaja, wojacy maja hižo wosrjedź tydźenja dźěłać započeć. Dalšu podpěru změje tudyši strowotniski zarjad wot přistajenych swobodneho stata. Nimo toho pomha dalšich 55 sobudźěłaćerjow z tamnych fachowych zarjadow krajnoradneho zarjada předewšěm kontakty slědować.
Krótkopowěsće (03.11.20)
Woidke z koronu natyknjeny
Podstupim. Braniborski ministerski prezident Dietmar Woidke (SPD) bu pozitiwnje na koronawirus testowany. Wón njeje po prěnich zjawach nazymjenja njedźelu žane dalše słužbne terminy wukonjał, zdźěli dźensa knježerstwowy rěčnik Florian Engels. Nětko kontaktowe wosoby identifikuja.
Podpěra promowowacym
Drježdźany. Sakska tři městna promowowacych na Uniwersiće Zjednoćenych narodow w Drježdźanach financnje podpěruje. Spěchuja doktorandki a doktorandow z prohowych a wuwićowych krajow při slědźenjach na temu „Wot Covid-19 wotkryte prašenja resursoweho zwiska powołanskich skupin w agarnym a žiwidłowym zastaranskim rjećazu“. Při tym dźěłaja tež ze slědźenskim institutom za globalne změny Čěskeje akademije wědomosće CzechGlobe hromadźe.
Zetkanje přestorčene
Wobšudnicy wužiwaja koronu za swoje zaměry
Budyšin (SN/MWj). Kaž zo njeby koronowa pandemija ludźom hižo dosć starosćow načiniła, nětko tež wobšudnicy tuchwilne połoženje za swoje zaměry wužiwaja, kaž Zhorjelska policajska direkcija rozprawja. Minjene dny je njeznaty w Zhorjelcu w připołdnišim času pola muža zazwonił. Wón wuda so jako lěkar, kiž runje syna zazwonjeneho do Drježdźan lećeć da. Jako přičinu mjenowaše njeznaty natyknjenje z koronawirusom a kritiski strowotny staw syna. Pozdatny lěkar dale rozprawješe, zo trjeba schorjeny nuznje ruski medikament, kiž pak by Zhorjelčan z 8 000 eurami sam zapłaćić dyrbjał. Tón na to prawje reagowaše, rjekny, zo žane pjenjezy nima, a telefonat skónči.
Policija wuraznje před nowej metodu warnuje, z kotrejž spytaja skućićeljo tuchwilu njewěstosć a strach mjez wobydlerjemi znjewužiwać. Kliniki sej telefonisce ženje žane pjenjezy za medikamenty nježadaja.
Wšitko wotprajili
Smochćicy. Smochčanske kubłanišćo swj. Bena a Katolska akademija Drježdźansko-Mišnjanskeho biskopstwa stej aktualneho wuwića koronoweje pandemije dla wšitke tak mjenowane prezencne zarjadowanja najprjedy raz hač do 30. nowembra wotprajiłoj. „Rozsud njebě lochki, dokelž su runje nětko zetkanja a rozmołwy wažne. Kóždy pak móže pomhać, zo so wirus dale njerozpřestrěwa“, zdźěli rektor kubłanišća swj. Bena Sebastian Kieslich.
Na wiki jeno z masku
Budyšin. W zwisku ze sakskimi koronowymi postajenjemi skedźbni město Budyšin na to, zo ma so na tudyšich tydźenskich wikach na kóždy pad škitny nahubnik wužiwać. Zelene wiki wotměja so wutoru wot 8 do 13 hodź. a sobotu wot 7 do 12 hodź, měšane wiki štwórtk wot 8 do 17 hodź., a to jeničce na Žitnych wikach. Tu móža so wotstawki lěpje dodźeržeć hač na Hłownym torhošću.
