Škitarjo ptakow so zetkaja

wutora, 14. apryla 2015 spisane wot:
Njeswačidło (SN/MWj). W Klóšterskej Nowej Wsy pola Kulowa wotměje so wot jutřišeho hač do pjatka nalětnje zetkanje krajneho dźěłoweho zjednoćenstwa němskich ptačernjow. Sakska ptačernja Njeswačidło, skutkowaca we wobłuku statneje zawodoweje towaršnosće za wob­­swět a ratarstwo BfUL, ma lětsa předsydstwo dźěłoweho zjednoćenstwa na sta­rosći a nalětnje zetkanje tuž wuhotuje, piše nawoda Njeswačanskeje ptačernje dr. Joachim Ulbricht w nowinskim zdźělenju. Zastupjerjo jednotliwych zwjaz­kowych krajow chcedźa na kromje Du­brjenskeho bahna wo najwšelakorišich prašenjach škita ptakow wuradźować. Jedne z ćežišćow při tym budu milinowe wětrniki a ptački. Wobdźělnikam zet­ka­nja chcedźa nimo toho zaćišć po­srěd­kować, kak wulki wuznam pohórnistwowa krajina za někotre wohrožene dru­žiny ptakow ma. W zwisku z nalětnim zeńdźenjom w Klóšterskej Nowej Wsy přewjedu zetkanje wo ptačim monitoringu w Němskej pod nawodom zwjazkoweho zarjada za přirodoškit.

Hudźbne napřećiwnosće dožiwi minjenu sobotu sto wopytowarjow koncerta Sakskeho krajneho młodźinskeho orchestra a jazzowej­e skupiny l’arc six w bywšej chłódźerni Hórnikečanskeje Energijoweje fabriki. Barokne kruchi 18. lětstotka měšachu so tam z jazzom a swingom; samo njewšědne zwuki marimbafona běchu słyšeć. Foto: Ulrike Herzger

Potajnstwa hrodźišća sej wotkryli

wutora, 14. apryla 2015 spisane wot:

Wotrow (MP/SN). Při rjanym słónčnym wjedrje a přijomnych temperaturach zetka so zawčerawšim, njedźelu 15 zajimcow zbliska a zdaloka, zo bychu sej stare kultury a twarcow Wotrowskeho hrodźišća zbližili. Přeprosyła na nalětnju ekskursiju bě wjednica Kamjenskeho Muzeja zapadneje Łužicy Friederike Koch-Heinrichs.

Wěcywustojnje rozłožowaše wona stawizny kulturow, kotrež su w Hornjej Łu­ži­cy slědy zawostajili. Wotrowske hrodźišćo je impozantny swědk łužiskeje kul­tury, wosebje Billendorfskeje skupiny, ko­traž­ tworješe kónčnu fazu łužiskeje kul­tury. Na městnje pokaza wjednica Kamjen­ske­ho muzeja, hdźe běchu tysac lět pozdźi­šo stari Słowjenjo hrodźišćo dźělili a hdźe běštaj před sto lětami archeologaj Ludwig Feyerabend a Walter Frenzel wurywałoj.

Krótkopowěsće (14.04.15)

wutora, 14. apryla 2015 spisane wot:

Namjety zapodać

Budyšin. Domowina chce tež lětsa zasłužb­ne wosoby z Mytom Domowiny za zaměrne a wuspěšne zachowanje a wo­zrodźenje serbskeje rěče a kultury, z Mytom Domowiny za dorost a z Čestnym znamješkom Domowiny jako připóznaćom zasłužbow w towarstwowym dźěle wuznamjenić. Čłonojo župow, towarstwow a jednotliwcy su tuž namołwjeni, hač do 30. junija namjety zapodać.

Jurij Brězan tež mjenowany

Budyšin. Wotpowědnje napominanju direktora Serbskeho instituta prof. dr. Dietricha Šołty je město Budyšin informacisku taflu na Philippa Melanchthonowym gymnaziju njedawno wobnowiło. Nimo dalšich wosobinow je na tafli nětko tež Jurij Brězan mjez bywšimi šu­lerjemi mjenowany.

Bitzka oficialny kandidat

Policija (14.04.15)

wutora, 14. apryla 2015 spisane wot:

Při Nysy ćěło namakali

Zhorjelc. Po pokiwje swědki su zastojnicy cła wčera wječor w Zhorjelcu w starym industrijowym twarjenju při Nysy skeletěrowane ćěło njeznateje wosoby namakali. Statne rěčnistwo a kriminalna policija pad přepytujetej. Tuchwilu žane informacije njepředleža, kak a hdy je wosoba do hižo lětdźesatkaj njewužiwa­neho twarjenja přišła. Tež k narodnosći a splahej ćěła njehodźi so tuchwilu hišće ničo rjec, kaž Zhorjelska policajska direkcija zdźěli. Kriminalisća tukaja na to, zo bu areal jako njeoficialne přebywanišćo wužiwane. Z obdukciju ćěła matej so jeho identita kaž tež přičina smjerće wujasnić. Hač jedna so wo njeskutk abo hač hodźi so tajki wuzamknyć, móža hakle po prawniskomedicinskim přepytowanju rjec. Policija dale informowaše, zo budu spušćomne informacije wo tym hakle za něhdźe tři tydźenje předležeć.

Nowotny nowy Rakečanski wjesnjanosta

póndźela, 13. apryla 2015 spisane wot:

Wčerawša wólbna njedźela za wolerjow Rakečanskeje gmejny je z hladanišća předsydki gmejnskeho wólbneho wuběr­ka Franziski Pfeiffer a čestnohamtskich pomocnikow we wólbnych lokalach derje wotběžała.

Rakecy (aha/SN). Cyłkownje 2 947 wólbokmanych měješe rozsudźić, kotry ze štyrjoch nominowanych kandidatow ma přichodne sydom lět jako wjesnjanosta na čole gmejny z 3 607 wobydlerjemi stać. Wólbne wobdźělenje z 63 procentami, z cyłkownje 1 846 wotedatych hłosow bě 26 njepłaćiwe, swědči wo zajimje ludnosće wo dobre rozrisanje palacych načasnych problemow w gmejnje. Wužiwać móžachu ludźo wólbne lokale w Rakečanskej radnicy a sydarni Treffpunkt kaž tež w Komorowje.

Doskónčny wuslědk wotedatych hłosow přeswědča. Komorowčan Swen Holger Nowotny – nominowany wot CDU – nažnja 1 048 hłosow, štož wotpowěduje 58 procentam. Sven Barthel na lisćinje Swobodneho wolerskeho zjednoćenstwa dósta 354 a Peter Klemmer na lisćinje Njestronskich wolerjow 269 hłosow. Za njestronjana Svena Helma rozsudźi so 149 wolerjow.

Dźesać serbskich dźěći je wčera w Radworju prěni króć k blidu Božemu přistupiło. Wosadni su přewodźeli tutón wjeršk zhromadnje­ ze staršimi a z fararjom Šćěpanom Delanom na swjedźenskich kemšach. Dźewjeć němskich dźěći doži­wi prěnje swjate woprawjenje na swójskej Božej mši. Prěnje swjate woprawjenje mějachu tohorunja w Ralbicach. Foto: Bosćij Handrik

Orchideje ludźi zakuzłali

póndźela, 13. apryla 2015 spisane wot:

W Slepjanskim Serbskim kulturnym centrumje su sej sobotu a wčera sta ludź­i přewažnje z holanskeje wokoliny, z Grodkowskeho a Złokomorowskeho regiona kaž tež ze sakskich kónčin přehladku­ orchidejow wobhladali.

Lóštne štučki na žurli zaklinčeli

póndźela, 13. apryla 2015 spisane wot:

Młodźinska kapała SerBeat z 1. nalětnim koncertom

Haslow (bn/SN). Prěni nalětni koncert lětsa w Haslowje, kotryž je tamniša Domo­winska skupina z podpěru Załožby za serbski lud wuhotowała, dožiwi wčera něhdźe 80 wopytowarjow. Młoda kapała SerBeat wobradźi přihladowarjam pisany kwěćel mjenje abo bóle znatych serbskich kaž tež mjezynarodnych pěsnjow. Nimo klasiskeje rockoweje hudźby z gi­tary, basgitary a bijadłow wobstejaceje wobsadki zaklinčachu we wobdźěłanjach přewažnje cuzych kompozicijow seksteta tež trompeta, saksofon a keyboard. Tak zasłyša w přiběracej měrje roztawacy publikum­ rockowe a popowe štučki kaž tež kompetentnje zanjesene wulěty do Jamaiki – při čimž skupina hustohdy stilej­ reggae a ska bjezposrědnje do kompozicijow zapřija, kaž instrumentalny medley (mjez druhim „Ja sym najrjeńši serbski cowboy“ a „Live is Life“) pokaza. Wjerški pak běchu tola nowše, znate serbske pěsnje, kaž na přikład „Ja sym zaso kradnył“ Lózych hólcow, „Młody być“ skupiny Łužica abo za serbskich hudźbnikow drje winowatostny „Palenc, palenc“.

Dźesate pojutrowne walkowanje jejkow wotměte

póndźela, 13. apryla 2015 spisane wot:

Nowe Město (JoS/SN). Kóždu swójbu w Nowym Měsće nad Sprjewju bě tam­niše domizniske towarstwo wosobinsce přeprosyło, zo by prawje wjele ludźi na kóždo­lětne walkowanje jejkow tydźeń po jutrach na nawjes přišło. A nimale wšitcy su přeprošenje wčera popołdnju sćěhowali, wšako nalětnje słónco přidatnje wabješe. Tójšto žonow bě so serbsku narodnu drastu woblekło a tak woblubowanemu zarjadowanju wose­bi­ty raz spožčiło. Nimale w kóždej domjacnosći tajku drastu­ maja, někotre samo wjacore. Zwjesela, zo bě šwarna ličba młodych swójbow přišła, zwjetša z dźěćacym wozyčk­om. Tuž so wjesna pěstowarnja wo to starać njetrjeba, zo budźe wona tež přichodne lěta wućežena.

Lětuše walkowanje jejkow w Nowym Měsće bě dźesate tajke zarjadowanje. Započe­li běchu na małej přirodnej skłoninje, po kotrejž dachu dźěći jejka do pěskoweje hromady kuleć. Štóž je ze swojim jejkom jedne z tamnych trjechił, smědźeše sej je sobu wzać. Bjez dźiwa, zo běchu dźěći tež wčera cyle cyplkojte, zo bychu prawje wjele jejkow wotnjesć móhl­i.

nawěšk

  • 21. jolka-swjedźeń w Nuknicy je nimo. Štož zwostanje su dopomnjenki na rjany žortny a zabawny wječor w Nukničanskej Brězanec bróžni. Někotre impresije serbskeho wječora w Nuknicy, kotrež je naša fotografowka-wolontarka Hanka Šěnec zhotowiła, wam tule
  • Serbske Nowiny-LND-Tuchmacherstr. 27 02625 Bautzen: Jolka 12.01.2019
  • Serbske Nowiny-LND-Tuchmacherstr. 27 02625 Bautzen: Jolka 12.01.2019

nowostki LND