Wojerowske dźěłaćerske dobroćelstwo (AWO) a Łužiski jězorinowy klinikum hižo­ lěta wuske partnerstwo hajitej a stej njedawno wažne kooperaciske zrěčenje podpisałoj. W nowym zrěčenju dźe wo digitalizaciju w hladanskej branši. Hižo klětu w měrcu ze stron Wojerowskeje chorownje swobodnemu statej Sakska kaž tež Zwjazkej projekt předpołoža, kotry­ puć chcedźa w přichodnych lětach z mnohimi dalšimi partnerami kročić. To rěka tež z Kamjenskej chorownju runje tak kaž z powołanskim centrumom Zuse. Wšako ma dźensniše wjednistwo klinikuma wokoło jednaćela Jörga Scharfenberga we wizěrje, we Wojerecach wu­tworić strowotniski centrum Hornjeje Łužicy, campus. Před durjemi steji strukturna změna wuhla dla. Wuhlowe jamy chcedźa nanajpozdźišo w lěće 2038 za­wrěć a zo njebychu tysacy bjez dźěła na puću stali, maja dźensa mudre a směrodajne naprawy zahajić. Na pjenjezach na kóncu zaležeć njebudźe, wšako steji za strukturnu změnu we Łužicy cyłkownje něhdźe 40 miliardow eurow k dispoziciji. Njeparujomny puć je dźě permanentne wuwiće digitalizacije tež w strowotnistwje.

Wobšudźić so njedał

Bischheim. Z přilubjenjom, zo je wjacore tysac eurow dobył, chcychu njeznaći před­wčerawšim 79lětneho muža w Bisch­hei­mje w gmejnje Haselbachtal wobšudźić. Skućićeljo rentnarjej při telefonje rjeknychu, zo měł wón w kupnicy tak mjenowane steam-karty w hódnoće 500 eurow kupić a pozdźišo w dalšim telefonaće wot­powědne čisła podać, zo móhł wupłaćenje dobyća wotzamknyć. Rentnar to wotpokaza a zazwoni policiju.

Budyšin. Štwórtk, 27. awgusta, přeprosy wokrjesny radźićel Lěwicy, prawiznik Hajko Kozel, na darmotne socialne po­radźowanje do Njebjelčic. Zhromadnje z prawiznikom Gregorom Janikom, kiž je w socialnym prawje wosebje wobhonjeny, móže wón pomoc skićić při roz­risanju problemow, kotrež so husto w socialnych prašenjach jewja. Poradźowanje budźe wot 14 do 16 hodź. w rumnosćach Njebjelčanskeho gmejnskeho zarjadnistwa. Zajimcy njech sej pod telefonowym čisłom 0 35 91 / 49 09 76 termin dorěča.

Proba budźe w sportowni

Budyšin. Čłonojo 1. serbskeje kultur­neje brigady su wutrobnje přeprošeni na chórowe proby štwórtk a pjatk, 27. a 28. awgusta, wot 9.30 do 14.50 hodź. Proby wotměja so we wulkej sportowej hali na Třělnišću. Brigadnicy njech přinjesu sej sami dosć k jědźi a k piću sobu­. Nimo toho pła­ća krute korona-předpisy, potajkim dosć wulke wot­staw­ki, nahubny škit a wužiwanje desinfekciskeho srědka.

Nowe rjadowanje wo sirenowej signalnej probje ani tak nowe njeje

Budyšin (SN/MWj). Hdyž prěnju sobotu měsaca dypkownje připołdnju w dwanaćich sireny ruja, so čłowjek jenož krótki wokomik nastróži a je hnydom zaso změrowany. W tym času su minjene lěta mjenujcy signal sirenow wupruwowali. To pak so nětko změni. Sireny dyrbja tež přichodnje wupruwować. To pak nječinja hižo prěnju sobotu měsaca w 12 hodź., ale wot septembra kóždu srjedu w 15 hodź., dalokož to žadyn zakonski swjaty dźeń njeje.